COVID-19
អន្តរជាតិ
នយោបាយអន្តរជាតិ
IMF បន្ធូរបន្ថយការយកបំណុលពីប្រទេសក្រីក្រចំនួន ២៥ លោកស្រីនាយកគ្រប់គ្រងមូលនិធិរូបយវត្ថុអន្តរជាតិ Kristalina Georgieva, រូបភាព៖ AFP
× មូលនិធិរូបិយវត្ថុអន្តរជាតិ (IMF) នាថ្ងៃទី១៣ ខែមេសា បានសម្រេចបន្ធូរបន្ថយការយកបំណុលពីប្រទេសក្រីក្រចំនួន ២៥ ក្នុងរយៈពេល ៦ខែដំបូង ដើម្បីជួយប្រទេសទាំងនោះ ឲ្យមានលទ្ធភាពក្នុងការប្រយុទ្ធប្រឆាំងជាមួយជំងឺរលាកសួត ដែលបង្កដោយកូរ៉ូណាវីរុស (COVID-19)។
តាមរយៈសេចក្តីថ្លែងការណ៍មួយ អគ្គនាយិកាមូលនិធិរូបយវត្ថុអន្តរជាតិ Kristalina Georgieva បានលើកឡើងយ៉ាងដូច្នេះថា៖ «ថ្ងៃនេះ ខ្ញុំមានសេចក្តីសោមនស្សណាស់ ដែលក្រុមប្រឹក្សាភិបាលមូលនិធិរូបិយវត្ថុ យល់ព្រមបន្ធូរបន្ថយការយកបំណុលពីប្រទេសក្រីក្រចំនួន២៥ ក្រោមគម្រោងរបស់ ភ្នាក់ងារ Catastrophe Containment and Relief Trust (CCRT)» ។
ការបន្ធូរបន្ថយបំណុលសម្រាប់ប្រទេសក្រីក្រចំនួន ២៥នេះ ធ្វើឡើងក្នុងគោលបំណងជួយប្រទេសទាំងនោះ មានលទ្ធភាពក្នុងការប្រមែប្រមូលធនធានហិរញ្ញវត្ថុរបស់ខ្លួន ដើម្បីឆ្លើយតបទៅនឹងការរាតត្បាតនៃជំងឺ COVID-19។
គម្រោងបន្ធរបន្ថយបំណុងរយៈពេល ៦ខែដំបូងនេះ គឺជាគម្រោងរបស់ភ្នាក់ងារ Catastrophe Containment and Relief Trust (CCRT) ដែលជាផ្នែកមួយរបស់ IMF ហើយក៏ជាភ្នាក់ងារវាយតម្លៃពីផលប៉ះពាល់នៃ COVID-19 ទៅលើសេដ្ឋកិច្ចផងដែរ។ បច្ចុប្បន្ន CCRT មានទឹកប្រាក់ចំនួន ៥០០លានដុល្លារ ដែលអាចផ្តល់សេវាដោះបំណុលដល់ប្រទេសក្រីក្រ។ ទឹកប្រាក់នេះ បានមកពីការបរិច្ចាគរបស់ចក្រភពអង់គ្លេស ជប៉ុន ចិន និងហូឡង់ជាដើម។
បន្ថែមពីលើនេះ លោកស្រីអគ្គនាយិកា IMF ក៏បានអំពាវនាវឲ្យប្រទេសមហាអំណាច និងប្រទេសអ្នកមាន ឲ្យបន្ធូរបន្ថយការយកបំណុលពីប្រទេសក្រីក្ររយៈពេល ២ឆ្នាំផងដែរ ក្នុងកាលៈទេសៈប្រយុទ្ធជាមួយ COVID-19 បែបនេះ។
សូមបញ្ជាក់ថា ប្រទេស២៥ ដែលត្រូវបាន IMF បន្ធូរបន្ថយការយកបំណុលនេះភាគច្រើនគឺមកពីតំបន់អាហ្វ្រិក ហើយក៏មានប្រទេសមកពីតំបន់ផងដែរដូចជា នេប៉ាល់ អាហ្វហ្កានីស្ថាន យេមែន និងហៃទីជាដើម៕
© រក្សាសិទ្ធិដោយ thmeythmey.com