ជាតិ
បទសម្ភាសន៍
ស្ថាបនិក «Rean Extra»៖ បើបរាជ័យ ខ្ញុំខាតតែឯង តែបើជោគជ័យយើងចំណេញទាំងអស់គ្នា!
លោក ហេង សន្យា សាស្ត្រាចារ្យនៅដេប៉ាតឺម៉ង់សិក្សាអន្ដរជាតិ (DIS) នៃសាកលវិទ្យាល័យភូមិន្ទភ្នំពេញ (RUPP) និងជាស្ថាបនិក «Rean Extra—រៀនបន្ថែម»
×![]()
លោក ហេង សន្យា ជាគ្រូបង្រៀនជំនាញវិទ្យាសាស្ត្រនយោបាយ និងទំនាក់ទំនងអន្តរជាតិអាស៊ីប៉ាស៊ីហ្វិក នៅ ដេប៉ាតឺម៉ង់សិក្សាអន្ដរជាតិ (DIS) នៃសាកលវិទ្យាល័យភូមិន្ទភ្នំពេញ (RUPP)។ ក្រៅពីការងារដ៏មមាញឹក អនុបណ្ឌិតទំនាក់ទំនងអន្តរជាតិរូបនេះ សរសេរអត្ថបទវិភាគ និងបកប្រែដល់វិទ្យាស្ថានសភាកម្ពុជា (PIC) លើ ប្រធានបទភូមិសាស្ដ្រនយោបាយក្នុងតំបន់ និងការបើកវគ្គបណ្ដុះបណ្ដាល «ជំនាញវិភាគ» ដល់សាធារណជន។ សារព័ត៌មានថ្មីៗ បានកត់សម្គាល់ជាពិសេសលើគម្រោងអប់រំរបស់សាស្ត្រាចារ្យរូបនេះ ដោយគម្រោងនោះមានឈ្មោះថា «Rean Extra—រៀនបន្ថែម»( https://www.facebook.com/ReanExtra)។
តើរៀន «Rean Extra-រៀនបន្ថែម» ជាអ្វី? ហើយលោក ហេង សន្យា មានការងារអ្វីខ្លះលើគម្រោងអប់រំមួយនេះ? សូមអានបទសម្ភាសរវាងលោក ជាមួយនឹងលោក អ៊ឹម ម៉េងស៊ាង អ្នកយកព័ត៌មាននៃសារព័ត៌មានថ្មីៗ ដូចខាងក្រោម៖
លោក អ៊ឹម ម៉េងស៊ាង៖ អ្វីជាគម្រោង «Rean Exra- រៀនបន្ថែម» ? តើមានមាតិកាអ្វីខ្លះ?
លោក ហេង សន្យា៖ «Rean Extra—រៀនបន្ថែម» ជាគម្រោងរួមចំណែកពង្រឹងសមត្ថភាពប្រជាជន ជាពិសេសយុវជនកម្ពុជាទាក់ទងភាសាអង់គ្លេស និងទំនាក់ទំនងអន្ដរជាតិតាមរយៈវីដេអូមេរៀនខ្លីៗដែលផ្ដល់ចំណេះបន្ទាប់បន្សំបន្ថែមពីលើអ្វីដែលពួកគាត់ធ្លាប់បានដឹងឬរៀននៅសាលា។ បច្ចុប្បន្នគម្រោងនេះដំណើរការលើទំព័រហ្វេសប៊ុក Rean Extra—រៀនបន្ថែម ផ្ទាល់ដែលមានអ្នកតាមដានសកម្មជាង ២ម៉ឺននាក់ ក្រោយបង្កើតបានជិត៣ខែ និងលើ Youtube Channel Rean Extra ផ្ទាល់។
យើងមានមាតិកាច្រើននៅក្នុង Rean Extra—រៀនបន្ថែម តែពេលនេះយើងផ្ដោតខ្លាំងលើមាតិកាធំៗពីរគឺ ភាសាអង់គ្លេស និងទំនាក់ទំនងអន្ដរជាតិ។ ក្នុងភាសាអង់គ្លេស យើងផ្ដោតចម្បងលើ ការចេះប្រើប្រាស់ពាក្យឱ្យបានច្បាស់លាស់និងជាផ្លូវការ ក្នុងនោះមាន «ពាក្យដែលមានន័យច្រើន», «ពាក្យដែលងាយច្រឡំគ្នា» និង «ពាក្យដែលជាន់គ្នា» ជាដើម។ ក្នុងទំនាក់ទំនងអន្ដរជាតិ យើងផ្ដោតលើបទវិភាគខ្លីៗតែគួរឱ្យចាប់អារម្មណ៍លើបញ្ហាឬរឿងរ៉ាវអន្ដរជាតិធំៗ ដែលដំបូងខ្ញុំបានចេញផ្សាយជាអត្ថបទ តែបន្ទាប់មកជាសម្លេងវិញជាការឆ្លើយតបតាមការសំណូមពរភាគច្រើន។
ហើយការពន្យល់បកស្រាយទាំងអស់គឺជាភាសាខ្មែរ ព្រោះយើងផ្ដោតតែលើជនជាតិខ្មែរប៉ុណ្ណោះ។
ចំពោះការបង្កើត គឺខ្ញុំជាអ្នកផ្ដួចផ្ដើម កំណត់មាតិកា ខ្លឹមសារ និងគោលដៅ និងអនុវត្តគម្រោងនេះផ្ទាល់ ដោយមានការជួយពីអ្នកបច្ចេកទេសខ្លះៗផ្នែកវីដេអូ និងគ្រប់គ្រង Page ។
លោក អ៊ឹម ម៉េងស៊ាង៖ តើបុគ្គលប្រភេទណាខ្លះជាគោលដៅនៃគម្រោងនេះ?
លោក ហេង សន្យា ៖ ទស្សនិកជនគោលដៅរបស់ខ្ញុំ គឺសាធារណជនខ្មែរយើង រួមមាន សិស្ស និស្សិត បុគ្គលិកក្រុមហ៊ុន មន្ដ្រីរាជការ និងពលរដ្ឋទូទៅ ដែលចង់ពង្រឹងភាសាអង់គ្លេសនៅពេលទំនេរដោយមិនចំណាយប្រាក់កាស ឬចង់ពង្រីកការយល់ដឹងទាក់ទងនឹងប្រធានបទឬការវិវត្តលើឆាកអន្ដរជាតិ។
ពិតណាស់ការរៀនតាមរយៈវីដេអូខ្លីៗនេះមិនអាចលម្អិតគ្រប់ជ្រុងជ្រោយទេ តែគោលដៅយើងគឺ បំផុសពួកគាត់ឱ្យឆ្ងល់ ឱ្យចាប់អារម្មណ៍នឹងចំណុចតូចៗតែសំខាន់ និងផ្ដល់មូលដ្ឋានគ្រឹះឱ្យពួកគាត់យកទៅសិក្សាស្រាវជ្រាវបន្ត។ ទោះតិចតួចយ៉ាងណាក៏ប្រសើរជាងអត់សោះ ហើយបើគាត់ឧស្សាហ៍មើលមាតិកាចំណេះដឹងលើហ្វេសប៊ុក នោះប្រព័ន្ធបច្ចេកវិទ្យាហ្វេសប៊ុកនឹងបង្ហាញមាតិកាចំណេះដឹងកាន់តែច្រើនទៀតលើ Newsfeed ពួកគាត់។
លោក អ៊ឹម ម៉េងស៊ាង ៖ តើកត្ដាអ្វីជំរុញឲ្យលោកបង្កើតគម្រោងនេះឡើង?
លោក ហេង សន្យា៖ គម្រោងនេះមានលក្ខណៈឯកជនសុទ្ធសាធ ពោលខ្ញុំមានគោលដៅទាញយកប្រយោជន៍ពីវានៅពេលខាងមុខក្នុងរូបភាពណាមួយ តែខ្ញុំចង់ឱ្យប្រយោជន៍ដែលខ្ញុំទទួលបាននោះវាឆ្លុះបញ្ចាំងពីប្រយោជន៍ដែលខ្ញុំអាចផ្ដល់ទៅឱ្យសង្គមវិញ។ បើគម្រោងនេះដើរទៅមុខ នោះខ្ញុំអាចទទួលបានចំណូលពីវាដូចជាតាមរយៈ Sponsor ឬការបើកវគ្គបង្រៀនផ្ទាល់ផ្សេងៗ តែបើគម្រោងនេះលែងទៅមុខ យ៉ាងហោចណាស់ខ្ញុំទទួលបាន «ពាក្យអរគុណ» ពីអ្នកដែលទទួលចំណេះពីខ្ញុំ។
និយាយឱ្យខ្លីខ្ញុំតែងទន្ទេញឃ្លាមួយថា «បើបរាជ័យខ្ញុំខាតតែឯង តែបើជោគជ័យយើងចំណេញទាំងអស់គ្នា!» ហេតុនេះខ្ញុំធ្វើវាដោយមិនភ័យមិនព្រួយ ព្រោះទោះបរាជ័យក៏មានគេគោរពឱ្យតម្លៃដែរ។ នេះជាកត្តាជម្រុញដ៏ខ្លាំងនៅពីក្រោយគម្រោងនេះ។
លោក អ៊ឹម ម៉េងស៊ាង ៖ តើវាមានបញ្ហាប្រឈមអ្វីខ្លះ ដែលលោកជួបប្រទះ?
លោក ហេង សន្យា៖ បញ្ហាប្រឈមធំបំផុតគឺពេលវេលា ព្រោះដូចដែលប្រាប់ពីខាងលើគម្រោងនេះមិនមែនជាការងារស្នូល (Full-Time Job) របស់ខ្ញុំទេ។ វាជាគម្រោងបែប «ឆ្លៀត» សុទ្ធសាធពោល៨០ភាគរយនៃការងារត្រូវបានធ្វើនៅចុងសប្ដាហ៍ ដូចជាការស្រាវជ្រាវ ការថតវីដេអូ/សម្លេង ការកាត់ត ការ កំណត់ពេលបង្ហោះជាដើម។ ហេតុនេះបើសិនមានការបង្អាក់ណាមួយនៅចុងសប្ដាហ៍វានឹងប៉ះពាល់ដល់គម្រោងនេះពេញមួយសប្ដាហ៍ខាងមុខ។ តែរយៈពេល៣ខែមកនេះ ដូចជាមិនទាន់មានបញ្ហាអ្វីធំដុំទេដោយយើងអាចគ្រប់គ្រងពេលវេលាបាន។
លោក អ៊ឹម ម៉េងស៊ាង៖ ខ្ញុំចាប់អារម្មណ៍ថា លោកក៏មានបើក «វគ្គមូលដ្ឋានគ្រឹះជំនាញវិភាគ» ផងដែរ! តើក្នុងវគ្គនេះ លោកនឹងលើកអ្វីមកបង្ហាញខ្លះ?
លោក ហេង សន្យា៖ ក្រោយបង្កើតគម្រោង Rean Extra—រៀនបន្ថែម បានមួយខែ ខ្ញុំទទួលបានសំណូមពរជាច្រើនឱ្យបើកថ្នាក់បង្រៀនផ្ទាល់ ហេតុនេះជាជំហានដំបូង ខ្ញុំសម្រេចបើកវគ្គបណ្ដុះមូលដ្ឋានគ្រឹះ «ជំនាញវិភាគ» ដែលមានក្បួនខ្នាតច្បាស់លាល់ចេញពីការស្រាវជ្រាវ បង្រៀននិងបទពិសោធន៍វិភាគខ្ញុំផ្ទាល់ ដោយផ្ដោតលើគំនិត ហេតុផល និងព្រឹត្តិការណ៍នានាភ្ជាប់ដោយឧទាហរណ៍ជាក់ស្ដែងថ្នាក់ជាតិ និងអន្ដរជាតិ និងមានលក្ខណៈទូទៅអាចឱ្យសិក្ខាកាមយកទៅប្រើជាប្រយោជន៍ក្នុងជីវភាពរស់នៅ ការបំពេញការងារ ការសិក្សា ឬប្រកបរបររកទទួលទានផ្សេងៗ។ មកទល់ពេលនេះយើងបើកបាន២វគ្គហើយ និងមានគម្រោងបើកវគ្គទី ៣ ទៅតាមតម្រូវការជាក់ស្ដែង ហើយលោកអ្នកអាចទាក់ទងព័ត៌មានលម្អិតតាមទំព័រហ្វេសប៊ុក Rean Extra—រៀនបន្ថែម។
លោក អ៊ឹម ម៉េងស៊ាង៖ តើអ្វីជាផែនការខាងមុខទៀត ដែលលោកយកទៅអនុវត្តក្នុងគម្រោងនេះ?
លោក ហេង សន្យា៖ ផែនការខាងមុខរបស់យើងមានច្រើន ដូចជា៖ បង្កើតមាតិកាធំៗផ្សេងទៀត ឬពង្រីកមាតិកាដែលមានស្រាប់ទៅតាមទំនោរគាំទ្ររបស់ទស្សនិកជន អញ្ជើញអ្នកជំនាញមកបកស្រាយប្រធានបទណាមួយ បើកវគ្គបណ្ដុះបណ្ដាលភាសាអង់គ្លេសក្នុងបរិបទផ្លូវការ និងអន្ដរជាតិដែលខ្ញុំនឹងបង្រៀនផ្ទាល់ និងផែនការធំមួយដែលយើងមិនទាន់អាចបង្ហើបបានពោលគឺនឹងបង្ហាញពេលដែលសម្រេចរូបរាងតែម្ដង។ តែផែនការទាំងនោះក៏ពឹងផ្អែកលើកត្តាពេលវេលាផ្ទាល់ខ្លួនខ្ញុំ និងសន្ទុះគាំទ្ររបស់អ្នកទាំងអស់គ្នាដែរ។
ចុងក្រោយ ខ្ញុំសូមថ្លែងអំណរគុណដល់សារព័ត៌មានអេឡិចត្រូនិចថ្មីៗដែលបានចាប់អារម្មណ៍គម្រោងតូចរបស់ខ្ញុំនេះ និងសូមបង្ហាញការដឹងគុណចំពោះលោកគ្រូអ្នកគ្រូដែលធ្លាប់បណ្ដុះបណ្ដាលខ្ញុំឱ្យមានសមត្ថភាពបណ្ដុះបណ្ដាលអ្នកជំនាន់ក្រោយបន្ត។ អរគុណអ្នកទាំងអស់គ្នាដែលគាំទ្រតាំងពីវីដេអូមេរៀនទី១ និងការផ្ដល់ទំនុកចិត្តលើ Rean Extra—រៀនបន្ថែម៕
Tag:
ហេង សន្យា
Rean Exra-
© រក្សាសិទ្ធិដោយ thmeythmey.com
