អន្តរជាតិ
លោក អូបាម៉ា ប្រកាសគាំទ្រលោកបៃឌិនធ្វើប្រធានាធិបតី លោក អូបាម៉ា (ឆ្វេង) និងលោក បៃឌិន (AFP)
× អតីតប្រធានាធិបតីអាមេរិក លោក បារ៉ាក់ អូបាម៉ា នៅថ្ងៃទី១៤ ខែមេសា បានប្រកាសគាំទ្រលោក ចូ បៃឌិន សម្រាប់ការប្រជែងយកតំណែងប្រធានាធិបតី។ លោក សង្ឃឹមថា លោក បៃឌិន ដែលធ្លាប់ជាអនុប្រធានាធិបតីយូរឆ្នាំរបស់លោក មានសមត្ថភាពបង្រួបបង្រួមប្រជាជាតិអាមេរិកឆ្លងកាត់ពេលវេលាដ៏លំបាកបំផុត។
«លោក ចូ មានបទពិសោធន៍ និងបុគ្គលិកលក្ខណៈ ដែលអាចនាំផ្លូវយើងឆ្លងកាត់ពេលវេលាដ៏លំបាកបំផុតមួយ និងស្រោចស្រង់យើងតាមរយៈការព្យាបាលរយៈពេលវែង»។ លោក អូបាម៉ា និយាយបែបនេះ ដោយសង្កត់ធ្ងន់ថា លោក ជឿជាក់ថា លោក បៃឌិន មានសមត្ថភាពទាំងអស់ដែលគ្រប់គ្នាត្រូវការធ្វើជាប្រធានាធិបតី។
ក្នុងវីដេអូរយៈពេល១២នាទី ប្រធានាធិបតីស្បែកខ្មៅដំបូងរបស់អាមេរិករូបនេះ លើកឡើងទៀតថា លោក បៃឌិន បានជួយជ្រោមជ្រែងលោកគ្រប់គ្រងជំងឺផ្ដាសាយ H1N1 និងទប់ស្កាត់ Ebola កុំឲ្យក្លាយជាជំងឺរាតត្បាតសាកល ដែល COVID-19 នាពេលបច្ចុប្បន្ន។ លោក អូប៉ាម៉ា និយាយបែបនេះ ទំនងចង់រិះគន់ដល់ចំណាត់ការទប់ទល់ COVID-19 របស់ប្រធានាធិបតី ដូណាល់ ត្រាំ ដែលគេមើលឃើញកំណើនអ្នកស្លាប់និងអ្នកឆ្លងកើនឡើងឥតស្រាកស្រាន្ត។ បច្ចុប្បន្ន អាមេរិក មានករណីឆ្លងសរុប ជាង៦០ម៉ឺននាក់ និងអ្នកស្លាប់ជាង២,៦ពាន់នាក់។
លោក បៃឌិន គឺជាបេក្ខភាពមកពីបក្ខប្រជាធិបតេយ្យដែលគេដឹងជាមុនថានឹងទៅប្រជែងជាមួយលោក ត្រាំ ក្នុងការបោះឆ្នោតនាពេលខាងមុខ។ នេះគឺក៏ព្រោះតែគូប្រជែងដែលសេសសល់តែមួយលោក គឺលោក Bernie Sanders បានសម្រេចបាត់បង់ចោលការប្រជែងក្នុងបក្ខប្រជាធិបតេយ្យកាលពីសប្តាហ៍មុន។ ហើយកាលពីថ្ងៃចន្ទ ១៣ ខែមេសានេះ លោក Sanders បានប្រកាសគាំទ្រអតីតសត្រូវចាស់លោក គឺលោក បៃឌិន ដោយអះអាងថា វាពេលហើយដែលប្រជាជនអាមេរិករួបរួមគ្នាគាំទ្រលោក បៃឌិន៕
Tag:
សហរដ្ឋអាមេរិក
បារ៉ាក់ អូបាម៉ា
ចូ បៃឌិន
បោះឆ្នោត២០២០
© រក្សាសិទ្ធិដោយ thmeythmey.com