COVID-19
ជាតិ
សង្គមជាតិ
×![]()
ដោយ: ថ្មីៗ
ក្រសួងទេសចរណ៍ បានណែនាំទៅគ្រប់ម្ចាស់អាជីវកម្មទីលានវាយកូនហ្គោល ដែលមានអាជ្ញាប័ណ្ណ ឲ្យផ្អាករៀបចំព្រឹត្តិការណ៍ឬការប្រកួតដណ្តើមពានរង្វាន់កីឡាវាយកូនគោល ដើម្បីទប់ស្កាត់ការរាលដាលជំងឺកូវីដ១៩។ ប៉ុន្តែក្រសួង នៅតែអនុញ្ញាតឲ្យកីឡាករ-កីឡាការិនី ចូលលេងជាធម្មតា ដោយត្រូវអនុវត្តវិធានការការពារខ្លួនពីជំងឺកូវីដ១៩ ឲ្យបានត្រឹមត្រូវ។ 
តាមរយៈសេចក្តីណែនាំ នៅថ្ងៃទី១៤ ខែមេសា ឆ្នាំ២០២០ ក្រសួងទេសចរណ៍ ប្រាប់ម្ចាស់ឬអ្នកគ្រប់គ្រងអាជីវកម្មទីលានវាយកូនគោល ឲ្យរៀបចំកន្លែងសមរម្យ ដើម្បីត្រូតពិនិត្យកម្តៅបុគ្គលិកបម្រើការងារ និងកីឡាករ-កីឡាការិនី មុនអនុញ្ញាតឲ្យចូលេង។ ក្រសួង បន្តថា កន្លែងលេខកូនគោល ត្រូវមានឡានកូនគោល (Golf Cart) មួយសម្រាបភ្ញៀវលេងម្នាក់ និងបុគ្គលិក (Caddy) ម្នាក់ឈរខាងក្រោយ។
លើសពីនេះ ក្រសូងទេសចរណ៍ បានក្រើនរម្លឹកអ្នកដែលមានវត្តមាននៅក្នុងទីលានវាយកូនគោល ឲ្យរក្សាគម្លាតពីគ្នា ស្របតាមគោលការណ៍ណែនាំរបស់ក្រសួងសុខាភិបាល និង សម្អាតសម្ភារលេងទាំងអស់ ជាមួយទឹកអាល់កុលជាប្រចាំ មុនពេល អំឡុង និង ក្រោយពេលប្រើប្រាស់ ដើម្បីសម្លាប់មេរោគ។ ក្រសួង ក៏បានរម្លឹកដែរថា មិនត្រូវចាប់ដៃស្វាគមន៍ឡើយ ដោយត្រូវលើកដៃសំពះជំនួសវិញ ហើយត្រូវពាក់ម៉ាស់ឲ្យបានត្រឹមត្រូវនិងគ្រប់ពេលវេលា។
ក្រសួង សង្កត់ធ្ងន់ថា ក្នុង១ក្រុម មិនអនុញ្ញាឲ្យលេងលើសពី៤នាក់នោះទេ ហើយកីឡាករ-កីឡាការិនីម្នាក់ៗ អាចយកបុគ្គលិកតែម្នាក់ប៉ុណ្ណោះ និង មិនអាចប្រើប្រាស់ឬប៉ះពាល់សម្ភារក្រៅពីរបស់ផ្ទាល់ខ្លួនឡើយ។
ដើម្បីទប់ស្កាត់ការរាលដាលជំងឺកូវីដ១៩ រដ្ឋាភិបាល បានសម្រេចបិទអាជីវកម្មនានាជាបន្តបន្ទាប់ ដូចជា ក្លិងហាត់ប្រាណ ក្លិបកម្សាន្ត រោងកុន កន្លែងម៉ាស្សា ខារ៉ាអូខេ និង ប៊ីហ្កាឌិន។ សាលារៀន សារមន្ទីរ និង ព្រះបរមរាជវាំង ក៏ត្រូវបានបិទដែរ ហើយការប្រគំតន្ត្រីនិងការជួបជុំក្នុងសាសនា ក៏ត្រូវហាមឃាត់ដូចគ្នា។ រដ្ឋាភិបាល នឹងអនុញ្ញាតឲ្យអាជីវកម្មនិងកន្លែងទាំងនេះ ដំណើរការឡើងវិញ នៅពេលណាស្ថានភាពជំងឺកូវីដ១៩ នៅកម្ពុជា ធូរស្បើយ។
គិតត្រឹមព្រឹកថ្ងៃទី១៥ ខែមេសា កម្ពុជា រកឃើញមនុស្ស១២២ ដែលឆ្លងកូវីដ១៩ តែបានជាសះស្បើយ៩៦នាក់ហើយ ខណៈ២៦នាក់ទៀត កំពុងសម្រាកព្យាបាល៕
Tag:
COVID-19
កន្លែងវាយកូនហ្គោល
© រក្សាសិទ្ធិដោយ thmeythmey.com
