នាយករដ្ឋមន្ត្រី ផ្តាំពលរដ្ឋ ឲ្យការពារខ្លួនពីកូវីដ១៩ ពេលជិះរថយន្តចេញពីស្រុក

COVID-19

ជាតិ

សង្គមជាតិ

នាយករដ្ឋមន្ត្រី ផ្តាំពលរដ្ឋ ឲ្យការពារខ្លួនពីកូវីដ១៩ ពេលជិះរថយន្តចេញពីស្រុក

16, Apr 2020 , 12:59 pm

រូបភាព

ដោយ: ថ្មីៗ

នាព្រឹកថ្ងៃទី១៦ ខែមេសា ឆ្នាំ២០២០ បទបញ្ជារបស់រដ្ឋាភិបាល ស្តីពីការដាក់កំហិតលើការធ្វើដំណើរ ត្រូវអស់សុពលភាព ហើយប្រជាជន អាចធ្វើដំណើរដោយសេរីជាធម្មតាឡើងវិញ។

ទន្ទឹមនឹងការបើកឲ្យធ្វើចរាចរណ៍ឡើងវិញនេះ សម្តេចនាយក ហ៊ុន សែន បានផ្ញើសារជូនប្រជាជន ឲ្យប្រុងប្រយ័ត្នខ្ពស់ក្នុងការបើកបរ។ ជាមួយគ្នានេះ សម្តេចនាយករដ្ឋមន្ត្រី បានប្រាប់ប្រជាជនកុំឲ្យភ្លេចខ្លួនពីការការពារខ្លួនពីជំងឺកូវីដ-១៩ ពេលជិះរថយន្តឈ្នួល។

តាមរយៈសារលើទំព័រហ្វេសប៊ុកនាព្រឹកនេះ ប្រមុខរដ្ឋាភិបាល សរសេរដូច្នេះថា៖«...សូមបងប្អូនប្រជាពលដ្ឋនិងកូនក្មួយកម្មករ-កម្មការនីយកចិត្តទុកដាក់ ចេះការពារសុខភាពផ្ទាល់ខ្លួន កុំឲ្យឆ្លងរោគកូវីដ-១៩ ដោយពាក់ម៉ាស និងឧស្សាហ៍ដុសលាងសម្អាតដៃជាមួយទឹកអាល់កុលឬជែលកម្ចាត់មេរោគ ជាពិសេសក្នុងពេលជិះរថយន្តជាមួយអ្នកធ្វើដំណើរច្រើននាក់ជុំគ្នាក្នុងរថយន្តឈ្នួលតែមួយ»។

ដោយបារម្ភខ្លាច កម្ពុជា មានការរាលដាលជំងឺកូវីដ-១៩ ជាទ្រង់ទ្រាយធំក្នុងអំឡុងបុណ្យចូលឆ្នាំ រដ្ឋាភិបាល បានដាក់កំហិតក្នុងការធ្វើដំណើរ ពីថ្ងៃទី៩ ដល់ម៉ោង៦ព្រឹក ថ្ងៃទី១៦ ខែមេសា ដោយមិនអនុញ្ញាតឲ្យប្រជាជនធ្វើដំណើរចេញចូលរវាងរាជធានីភ្នំពេញនិងបណ្តាខេត្តនានា និងមិនឲ្យធ្វើដំណើរឆ្លងកាត់ពីខេត្តមួយទៅខេត្ត លើកលែងតែការធ្វើដំណើរឆ្លងកាត់រាជធានីភ្នំពេញនិងខេត្តកណ្តាលប៉ុណ្ណោះ ដែលមិនត្រូវហាមឃាត់។

លើសពីនេះ រដ្ឋាភិបាល ក៏បានផ្អាកពិធីបុណ្យចូលឆ្នាំដែរ ដោយអំពាវនាវឲ្យប្រជានជនរៀបចំពិធីនិងជួបជុំគ្រួសារតាមគេហដ្ឋានរៀងខ្លួន ជៀសវាងការដើរកម្សាន្តនិងចេញទៅជួបជុំនៅក្រៅផ្ទះ ដូចរាល់ឆ្នាំ។ ក្នុងអំឡុងចូលឆ្នាំសម្រាប់ឆ្នាំនេះ ទាំងស្ថាប័នរដ្ឋនិងឯកជន ត្រូវតម្រូវឲ្យនៅធ្វើការជាធម្មតា។

គិតត្រឹមព្រឹកថ្ងៃទី១៦ ខែមេសា កម្ពុជា មានអ្នកឆ្លងជំងឺកូវីដ-១៩ ១២២នាក់ តែបានជាសះស្បើយវិញ៩៨នាក់ ហើយ២៤នាក់ទៀត កំពុងសម្រាកព្យាបាល៕