COVID-19
អន្តរជាតិ
លោកស្រី ស៊ូជី ដេរម៉ាសដោយផ្ទាល់ដៃ ដើម្បីជំរុញទឹកពលរដ្ឋឲ្យប្រើប្រាស់វិធានការប្រឆាំង Covid-19 តាមលទ្ធភាព រូបភាព៖ ហ្វេសប៊ុកផ្លូវការរបស់លោកស្រី ស៊ូជី
× ខណៈការរាលដាលនៃវីរុស Covid-19 នៅមីយ៉ាន់ម៉ានៅមិនទាន់អាចគ្រប់គ្រងបានទាំងស្រុងនោះ លោកស្រីអ៊ុងសាន ស៊ូជី ទីប្រឹក្សារដ្ឋមីយ៉ាន់ម៉ា បានបន្តផ្សព្វផ្សាយដល់ប្រជាពលរដ្ឋខ្លួនតាមរយៈគណនីហ្វេសប៊ុក ដែលលោកស្រី ទើបតែចាប់ផ្តើមប្រើប្រាស់។ ភ្ជាប់ជាមួយនឹងសារអប់រំ លោកស្រីទីប្រឹក្សារដ្ឋ បានបង្ហាញពីរូបភាពសកម្មភាពដេរម៉ាស និងពាក់ម៉ាសរបស់លោកស្រី ដើម្បីជំរុញប្រជាជន។
តាមរយៈគណនីហ្វេសប៊ុកផ្លូវការនៅចុងសប្តាហ៍មុន លោកស្រីទីប្រឹក្សារដ្ឋ អ៊ុងសាន ស៊ូជី បានលើកទឹកចិត្តដល់ប្រជាជនមីយ៉ាន់ម៉ាឲ្យអនុវត្តវិធានការឲ្យបានត្រឹមត្រូវ និងប្រើប្រាស់វិធីសាស្ត្រតាមលទ្ធភាព ដែលប្រជាជនអាចធ្វើបាន ហើយស្របតាមក្បួនវេជ្ជសាស្ត្រ។
ក្នុងនោះវិធីសាស្ត្រតាមលទ្ធភាពដែលលោកស្រីទីប្រឹក្សារដ្ឋលើកទឹកចិត្តនោះគឺ ប្រជាជនដែលរាប់បញ្ចូលទាំងស្រី និងប្រុស គួរតែដេរម៉ាសដើម្បីប្រើប្រាស់ខ្លួនឯង ដោយមិនត្រូវពឹងផ្អែកតែលើម៉ាសដែលទិញពីទីផ្សារឡើយ។ លោកស្រី ជំរុញទឹកចិត្តបែបនេះ ជាមួយនឹងរូបថតពីរសន្លឹករបស់ខ្លួន នៅពេលលោកស្រី កំពុងតែដេរម៉ាស និង យកម៉ាសមកពាក់។
សារអប់រំរបស់ប្រមុខដឹកនាំមីយ៉ាន់ម៉ារូបនេះ ធ្វើឡើងបន្ទាប់ពី លោកស្រី បានចេញសារព្រមានតឹងរឹងមួយប្រឆាំងនឹងក្រុមអ្នកឆ្លៀតឱកាសលក់គ្រឿងសម្ភារវេជ្ជសាស្ត្រ ជាពិសេសម៉ាស ក្នុងតម្លៃថ្លៃហួសហេតុពេក ខណៈដែលប្រទេសកំពុងតែស្ថិតនៅក្នុងសស្ថានភាពលំបាក។ លោកស្រី ចាត់ទុកសកម្មភាពនេះជារឿងស្មោគគ្រោក និងមិនអាចអន់ឱនបានឡើយ។
គិតត្រឹមថ្ងៃ១៥ មេសា មីយ៉ាន់ម៉ា រកឃើញករណីឆ្លងវីរុស Covid-19 សរុប ៧៤ ករណី។ ក្នុងនោះ មានអ្នកជាសះស្បើយវិញ២ករណី និងស្លាប់៤ករណី៕
Tag:
មីយ៉ាន់ម៉ា
Covid19
© រក្សាសិទ្ធិដោយ thmeythmey.com