កំណើនសេដ្ឋកិច្ចអាស៊ីនៅឆ្នាំ២០២០ នេះនឹងមិនជួបកំណើនជាលើកដំបូង ក្នុងរយៈពេល៦០ឆ្នាំចុងក្រោយ ដោយសារតែការរងគ្រោះមិនធ្លាប់មាន បណ្តាលមកពីវិបត្តិជំងឺCOVID-19 ដែលប៉ះពាល់ដល់វិស័យសេវាកម្ម និងការនាំចេញទៅកាន់ទីផ្សារចម្បងៗ។ នេះយោងតាមមូលនិធិរូបិយវត្ថុពិភពលោក ដកស្រង់ដោយទីភ្នាក់ងារសារព័ត៌មាន Reuters។
ក្នុងរបាយការណ៍ររបស់មូលនិធិរូបិយវត្ថុពិភពលោក ដែលចេញផ្សាយនៅថ្ងៃទី១៦ មេសានេះ សេដ្ឋកិច្ចអាស៊ីទំនងជាមិនមានកំណើនឡើយនៅឆ្នាំ២០២០នេះ។ បើតាម Reuters លោក Changyong Rhee ប្រធាននាយកដ្ឋានអាស៊ី-ប៉ាស៊ីហ្វិករបស់មូលនិធិរូបិយវត្ថុអន្តរជាតិបានថ្លែងថា អ្នកធ្វើគោលនយោបាយគួរកំណត់គោលដៅគាំទ្រដល់ក្រុមហ៊ុន និងក្រុមគ្រួសារទាំងឡាយណា ដែលរងគ្រោះខ្លាំងដោយបម្រាមធ្វើដំណើរ គោលនយោបាយគម្លាតសុវត្ថិភាព និងវិធានការទាំងឡាយណាដែលរាំងខ្ទប់ការឆ្លងរបស់ជំងឺ COVID-19។
លោកបន្ថែមទៀតថា៖«សេដ្ឋកិច្ចពិភពលោកនៅពេលនេះមានបញ្ហាប្រឈម និងភាពមិនប្រាកដប្រជាខ្ពស់។ តំបន់អាស៊ី-ប៉ាស៊ីហ្វិក ក៏នឹងមិនចៀសផុតដែរ។ផលប៉ះពាល់នៃជំងឺCOVID-19 នឹងមានលក្ខណៈធ្ងន់ធ្ងរ ប៉ះពាល់ដល់មនុស្សគ្រប់រូប និងមិនដែលធ្លាប់មានពីមុនមក»។ លោក Rhee សង្កត់ធ្ងន់ថា៖«ពេលនេះគេមិនអាចធ្វើពាណិជ្ជកម្មដូចធម្មតាឡើយ។ប្រទេសអាស៊ីទាំងអស់ ត្រូវប្រើប្រាស់គោលនយោបាយទាំងអស់ដែលខ្លួនមាន»។
បើទោះបីជាសេដ្ឋកិច្ចអាស៊ីទទួលផលប៉ះពាល់តិចជាងតំបន់ដទៃមែន តែការព្យាករណ៍នេះមានសភាពធ្ងន់ធ្ងរជាងពេលមុន ជាក់ស្តែងបើធៀបទៅនឹងអំឡុងពេលមានវិបត្តិហិរញ្ញវត្ថុពិភពលោក សេដ្ឋកិច្ចអាស៊ីមានកំណើន៤,៧ភាគរយ និងក្នុងពេលមានវិបត្តិហិរញ្ញវត្ថុអាស៊ីនៅចុងឆ្នាំ១៩៩០ សេដ្ឋកិច្ចអាស៊ីមានកំណើន១,៣ភាគរយ។
ទោះជាយ៉ាងណាក្តី មូលនិធិរូបិយវត្ថុអន្តរជាតិព្យាករថានៅឆ្នាំក្រោយ កំណើនសេដ្ឋកិច្ចនៅអាស៊ីអាចនឹងកើនឡើង៧,៦ភាគរយវិញ ដោយរំពឹងថាគោលនយោបាយទប់ស្កាត់ការឆ្លងជំងឺទទួលបានជោគជ័យ ប៉ុន្តែបន្ថែមថា ការព្យាករណ៍នេះមានភាពមិនប្រាកដប្រជាខ្ពស់។ ខុសពីវិបត្តិហិរញ្ញវត្ថុសកលនៅឆ្នាំ២០០៨ ដែលបណ្តាលមកពីការរលំរបស់បណ្តាញហិរញ្ញវត្ថុសកលLehman Brothers ជំងឺរាតត្បាតនេះប៉ះពាល់ដោយផ្ទាល់ដល់វិស័យសេវាកម្ម ដោយបង្ខំឲ្យមនុស្សនៅផ្ទះ និងបិទអាជីវកម្ម។
ចិនដែលជាក្បាលម៉ាស៊ីននាំចេញផលិតផលរបស់អាស៊ី ក៏នឹងរងផលប៉ះពាល់ខ្លាំងណាស់ដែរ ដោយសារតែការធ្លាក់ចុះតម្រូវការពីដៃគូជំនួញដូចជាសហរដ្ឋអាមេរិក និងអឺរ៉ុប។ ដោយសារតែជំងឺ COVID-19 កំណើនសេដ្ឋកិច្ចចិនធ្លាក់មកនៅត្រឹម១,២ភាគរយ ធៀបទៅនឹងការព្យាករណ៍៦ភាគរយកាលពីខែមករា ដោយហេតុតែការធ្លាក់ចុះនូវការនាំចេញ និងការបាត់បង់សកម្មភាពសេដ្ឋកិច្ចដែលបណ្តាលមកពីការអនុវត្តគម្លាតសុវត្ថិភាព។ ប៉ុន្តែសេដ្ឋកិច្ចចិនអាចនឹងមានកំណើន៩,២ភាគរយនៅឆ្នាំក្រោយ ប្រសិនបើអ្វីៗត្រឡប់មកដូចដើមវិញ។
មូលនិធិរូបិយវត្ថុអន្តរជាតិ ក៏អំពាវនាវផងដែរឲ្យប្រទេសទាំងឡាយទម្លាក់សាច់ប្រាក់ចូលក្នុងទីផ្សារ និងជួយសម្រាលបន្ទុកហិរញ្ញវត្ថុរបស់ក្រុមហ៊ុនខ្នាតតូច និងមធ្យម។ ចំពោះប្រទេសដែលមានសេដ្ឋកិច្ចកំពុងលូតលាស់ ប្រទេសទាំងនោះ គួរស្វែងរកការបង្វែរសាច់ប្រាក់ក្នុងក្របខណ្ឌទ្វេភាគី និងពហុភាគី ស្វែងរកការគាំទ្រពីស្ថាប័នពហុភាគី ក៏ដូចជាគ្រប់គ្រងមូលធនបើចាំបាច់ ក្នុងករណីមានការរំខានដោយសារជំងឺរាតត្បាត៕