លោក ស៊ិនហ្សូ អាបេ នាយករដ្ឋមន្ត្រីជប៉ុនបានសម្រេចដាក់ប្រទេសទាំងមូលក្នុងស្ថានភាពអាសន្ននៅថ្ងៃទី១៦ ខែមេសា ក្នុងបំណងពន្យឺតការឆ្លងជំងឺCOVID-19។ បន្ថែមពីនេះ រដ្ឋាភិបាលជប៉ុនក៏ពិចារណាផងដែរ ក្នុងការផ្តល់សាច់ប្រាក់ដល់ប្រជាពលរដ្ឋ ដើម្បីកាត់បន្ថយផល់ប៉ះពាល់សេដ្ឋកិច្ច។
«ស្ថានភាពអាសន្ន នឹងត្រូវពង្រីកពីចំនួន៧តំបន់ មកគ្រប់តំបន់ទាំងអស់»។ នេះជាការថ្លែងរបស់លោកនាយករដ្ឋមន្ត្រី ស៊ិនហ្សូ អាបេ ក្រោយកិច្ចប្រជុំពិសេសមួយ ដោយបន្ថែមទៀតថា ការដាក់ប្រទេសក្នុងស្ថានភាពអាសន្ន នឹងបន្តមានសុពលភាពរហូតដល់ថ្ងៃទី៦ ខែឧសភា។ នេះបើតាមការផ្សាយរបស់ទីភ្នាក់ងារព័ត៌មាន AFP ។
លោកនាយករដ្ឋមន្ត្រីជប៉ុនឲ្យដឹងថា វាជារឿងសំខាន់ក្នុងការកាត់បន្ថយការធ្វើដំណើរ ក្នុងរដូវកាលឈប់សម្រាកពីចុងខែមេសា ដល់ដើមខែឧសភា ដើម្បីខ្ទប់ការចម្លងមេរោគ។ រដូវកាលឈប់សម្រាកខាងលើ ត្រូវបានគេស្គាល់ថាជា «សប្តាហ៍មាស» ដែលជាពេលអ្នករស់នៅទីក្រុងធំៗ ត្រឡប់ទៅលេងក្រុមគ្រួសារនៅជនបទ។
ការប្រកាសដាក់ប្រទេសទាំងមូល ក្នុងស្ថានភាពអាសន្នបែបនេះ នឹងអនុញ្ញាតឲ្យអភិបាលតំបន់ អំពាវនាវឲ្យមនុស្សស្ថិតនៅក្នុងផ្ទះ ក៏ប៉ុន្តែពុំមានការដាក់ពិន័យអ្វីឡើយ។ វិធានការដែលគេឃើញថា អនុវត្តនៅជប៉ុន មានសភាពធូរស្រាលជាងប្រទេសដទៃ។
តាំងតែពីការដាក់ផ្នែកខ្លះនៃប្រទេសក្នុងស្ថានភាពអាសន្ន កាលពីថ្ងៃទី៨ ខែមេសា អភិបាលតំបន់មួយចំនួន បានស្នើសុំឲ្យរដ្ឋាភិបាលដាក់តំបន់ខ្លួន ក្នុងស្ថានភាពអាសន្នដោយព្រមានពីការកើនឡើងចំនួនអ្នកឆ្លង និងចំនួនអ្នកជំងឺយ៉ាងច្រើននៅមន្ទីរពេទ្យ។ មិនតែប៉ុណ្ណោះ អភិបាលតំបន់ខ្លះបានសម្រេចប្រកាសស្ថានភាពអាសន្នដោយខ្លួនឯង បើទោះបីជាគ្មានច្បាប់កំណត់ក៏ដោយ។
កាលពីថ្ងៃទី៨ មេសា ជប៉ុនបានត្រឹមតែដាក់តំបន់មួយចំនួន ក្នុងស្ថានភាពអាសន្នប៉ុណ្ណោះ ដែលក្នុងនោះរួមមានទីក្រុងតូក្យូ និងតំបន់ចំនួន៦ផ្សេងទៀត។ នៅទីក្រុងតូក្យូ អភិបាលក្រុងនេះ បានអំពាវនាវឲ្យពលរដ្ឋធ្វើការពីផ្ទះ។ បន្ថែមពីនេះ គេក៏សង្កេតឃើញផងដែរ ការធ្លាក់ចុះនូវការធ្វើដំណើរប្រចាំថ្ងៃ ជាពិសេសតាមប្រព័ន្ធដឹកជញ្ជូនសាធារណៈ។
ជប៉ុន មានករណីឆ្លង COVID-19 ដំបូងនៅពាក់កណ្តាលខែមករា ហើយបើគិតត្រឹមថ្ងៃទី១៦ ខែមេសា ជប៉ុនាមានករណីឆ្លងចំនួន៨,៥០០ករណី និងស្លាប់ចំនួន១៣៦ករណី។
នៅក្នុងសប្តាហ៍នេះ សមាគមគ្រូពេទ្យចំនួន២ បានចេញសេចក្តីប្រកាសរួមមួយ ដោយព្រមានថា ប្រព័ន្ធសុខាភិបាលជប៉ុនកំពុងតែរលំ ដោយមិនអាចព្យាបាលអ្នកជំងឺ ក្រៅតែពីអ្នកឆ្លង COVID-19 បាន។ នៅទីក្រុង អូសាកាវិញ អភិបាលក្រុងបានអំពាវនាវឲ្យបរិច្ចាគអាវភ្លៀង សម្រាប់ប្រើជាឧបករណ៍ការពារខ្លួន បន្ទាប់ពីបុគ្គលិកពេទ្យ ត្រូវបង្ខំចិត្តប្រើថង់ជំនួសវិញ។
ទាក់ទងនឹងឧបករណ៍ការពារខ្លួននេះផងដែរ កោះតៃវ៉ាន់ប្រកាសថា ខ្លួននឹងបរិច្ចាគម៉ាស់២លានសន្លឹកទៅឲ្យជប៉ុន។ បន្ថែមពីនេះ រដ្ឋាភិបាលជប៉ុនក៏បានចេញផែនការផ្តល់សាច់ប្រាក់ចំនួន ៩៣០ដុល្លារ ដល់ប្រជាពលរដ្ឋម្នាក់ផងដែរ៕