COVID-19៖ ចិនដំឡើងករណីឆ្លង និងស្លាប់នៅវូហាន ដែលធ្វើឲ្យតួលេខកើន៥០ភាគរយ

COVID-19

អន្តរជាតិ

COVID-19៖ ចិនដំឡើងករណីឆ្លង និងស្លាប់នៅវូហាន ដែលធ្វើឲ្យតួលេខកើន៥០ភាគរយ

17, Apr 2020 , 9:19 pm

រូបភាព

រូបភាព៖ Xinhua

ដោយ: ធៀន ភារិន្ទ

មជ្ឈមណ្ឌលគ្រប់គ្រង និងបង្ការជំងឺរលាកសួតរបស់ចិន នាថ្ងៃទី១៧ ខែមេសា បានចេញសេចក្តីប្រកាសមួយ ស្តីពីការកែប្រែតួលេខអ្នកឆ្លង និងអ្នកស្លាប់ដោយសារ ជំងឺរលាកសួត ដែលបង្កដោយកូរ៉ូណាវីរុស COVID-19 នៅក្នុងទីក្រុងវូហាន ប្រទេសចិន។

បន្ទាប់តួលេខអ្នកឆ្លង និងស្លាប់ ដោយសារជំងឺរលាកសួតប្រភេទថ្មីនៅចិន ហាក់ដូចជាថមថយ ចិនបានចេញសេចក្តីប្រកាសថ្មីមួយជុំវិញតួលេខអ្នកឆ្លង និងអ្នកស្លាប់។ ក្នុងសេចក្តីប្រកាសនេះ មជ្ឈមណ្ឌលគ្រប់គ្រង និងបង្ការ COVID-19 បានរកឃើញអ្នកឆ្លងក្នុងពេលកន្លងមកចំនួន ៣២៥ករណី អ្នកស្លាប់ចំនួន ១២៩០ករណី នៅក្នុងទីក្រុងវូហាន។ ការណ៍នេះ បានធ្វើឲ្យអ្នកឆ្លងសរុបនៅក្នុងទីក្រុងវូហានបានកើនដល់ ៥០៣៣៣ករណី និងអ្នកស្លាប់សរុប ៣៨៦៩ករណី។

បើតាមអះអាងរបស់ចិន សម្រាប់តួលេខថ្មីនេះ គឺអាជ្ញាធរចិនទើបតែរកឃើញពីអ្នកស្លាប់ និងឆ្លង ក្នុងពេលកន្លងមក។ ចិនបានលើកហេតុផល ៣ធំៗមកសំអាង។ ទី១ កន្លងមកចិនមានបញ្ហាខ្វះខាតសម្ភារវេជ្ជសាស្ត្រ និងសមត្ថភាព ក្នុងការព្យាបាលអ្នកជំងឺ ដែលជាហេតុធ្វើឲ្យអ្នកជំងឺមួយចំនួនបានទទួលមរណភាពនៅផ្ទះ និងមិនបានមកមន្ទីរពេទ្យ។ ទី២ ក្នុងអំឡុងពេល COVID-19 អុកឡុកខ្លាំង អាជ្ញាធរសុខភិបាល ក៏ដូចជាបុគ្គលិកវេជ្ជសាស្ត្រ សស្រាក់សស្រាំធ្វើការ ដោយមិនបានរាយការណ៍ពីតួលេខអ្នកឆ្លង និងស្លាប់មួយចំនួន។ ទី៣ ចិនមានវិទ្យាស្ថាន ក៏ដូចជាកន្លែងព្យាបាលអ្នកជំងឺ COVID-19 ច្រើន ហើយកន្លែងខ្លះមិនបានផ្តល់របាយការណ៍មកមជ្ឈមណ្ឌលគ្រប់គ្រង និងបង្ការជំងឺរលាកសួត។

ក្រៅពីតួលេខបន្ថែម ចិនក៏មានអ្នកឆ្លងចំនួន២៦ករណីថ្មីផងដែរ នៅក្នុងប្រទេស និងមិនមានករណីស្លាប់នាថ្ងៃទី១៧ ខែមេសា។

គិតមកត្រឹមពេលនេះ ចិនមានករណី COVID-19 សរុបចំនួន ៨២៦៩២ករណី អ្នកស្លាប់ ៤៦៣២ករណី និងអ្នកជាសះស្បើយចំនួន ៧៧៩៤៤ករណី។ បើតាមវេបសាយ Worldometer បន្ទាប់ពីចិនកែប្រែតួលេខអ្នកឆ្លង និងអ្នកស្លាប់ អ្នកជំងឺ COVID-19 ក្នុងប្រទេសនេះ ដែលកំពុងសម្រាកព្យាបាលនៅមន្ទីរពេទ្យមានត្រឹមតែជាងពីររយករណីប៉ុណ្ណោះ៕