លោក រ៉ូឌ្រីហ្គោ ឌូទើតេ ប្រធានាធិបតីហ្វីលីពីនគំរាមថា នឹងបង្ក្រាបប្រជាជនដូចក្នុងរបបអាជ្ញាសឹក ប្រសិនបើប្រជាជននៅតែជម្នះចង់ចូលមកកាន់រដ្ឋធានីម៉ានីល ដែលកំពុងបិទមិនឲ្យមានអ្នកចេញចូល។ នេះតាមការផ្សាយរបស់ទីភ្នាក់ងារសារព័ត៌មាន AFP ។
« ខ្ញុំគ្រាន់តែសុំឲ្យអ្នកទាំងអស់គ្នាមានវិន័យបន្តិចប៉ុណ្ណោះ។ បើមិនធ្វើតាមទេ ជឿខ្ញុំចុះ ទាហាន និងប៉ូលិសប្រាកដជាចាត់វិធានការ»។ នេះជាការព្រមានរបស់ប្រធានាធិបតីហ្វីលីពីន រ៉ូឌ្រីហ្គោ ឌូទើតេ ទៅកាន់ប្រជាជនដែលមិនគោរពតាមបម្រាមរបស់រដ្ឋាភិបាល។
តាមរយៈសុន្ទរកថាក្នុងទូរទស្សន៍នៅថ្ងៃទី១៦ មេសាលោកប្រធានាធិបតី ឌូទើតេ និយាយចំៗថា ទាហាន និងប៉ូលិស នឹងចាត់វិធានការគម្លាតសុវត្ថិភាព នៅពេលបម្រាមគោចរមកដល់។ វាដូចជាច្បាប់អាជ្ងាសឹកអ៊ីចឹងដែរ។ លោក ក៏ឲ្យប្រជាជនជ្រើសរើសរវាងធម៌ក្ដៅ និងធម៌ត្រជាក់នេះ ដោយប្រាប់ពួកគេ «អ្នកជ្រើសខ្លូនឯងចុះ»។
ការលើកឡើងរបស់លោក ឌូទើតេ ធ្វើឡើង បន្ទាប់ពីអាជ្ញាធរហ្វីលីពីនបានរាយការណ៍ពីការកើនឡើងចំនួនរថយន្តនៅតាមដងផ្លូវក្នុងរដ្ឋធានីម៉ានីលដែលធ្លាប់មានសភាពស្ងាត់ជ្រងំក្រោយពេលរដ្ឋាភិបាលប្រកាសបិទទីក្រុងនេះកាលពីខែមុន។
ជាការកត់សម្គាល់ថា លោកប្រធានាធិបតីហ្វីលីពីន ជារឿយៗតែងតែគំរាមចង់គ្រប់គ្រងប្រទេសតាមលក្ខណៈយោធា។ ការគ្រប់គ្រងលក្ខណៈយោធា នេះ ក៏នាំឲ្យមានការរំលឹកដល់របបដឹកនាំផ្តាច់ការរបស់លោក ហ្វឺឌីណាង់ ម៉ាកូស (Ferdinand Marcos)។ កន្លងទៅ
លោក ឌូទើតេ ធ្លាប់ដាក់កោះមិនដាណាវ ក្រោមការគ្រប់គ្រងតាមច្បាប់អាជ្ញាសឹក នៅពេលដែលក្រុមរដ្ឋឥស្លាម ធ្វើការវាយប្រហារទៅលើទីក្រុងម៉ារ៉ាវី ភាគខាងត្បូងប្រទេស។
នៅខែមីនា ពេលដែលចំនួនអ្នកឆ្លងកាន់តែកើនឡើង លោក ឌូទើតេ ក៏ បានបញ្ជាឲ្យបិទកោះLunzo ដែលនៅខាងជើងប្រទេស ដែលក៏រួមបញ្ចូលរដ្ឋធានីម៉ានីល ដែលមានប្រជាជន១២លាននាក់ផងដែរ។
បើទោះបីជាមានបញ្ជាហាមមិនឲ្យចេញក្រៅផ្ទះដោយ ក៏គេឃើញមានមនុស្សមួយចំនួននៅតែល្មើសនឹងបញ្ជា។ ជាក់ស្តែង គេឃើញប្រជាពលរដ្ឋក្រីក្រត្រូវបង្ខំចិត្តដើរស្វែររកការងារ ចំណែកឯប៉ូលិសវិញបានចាប់បំបែកការជួបជុំ ដូចជាការប្រកួតវាយប្រដាល់ជាដើម។
បន្ថែមពីនេះ ប៉ូលិស បានគំរាម ចាប់ខ្លួនមនុស្សរាប់ម៉ឺននាក់ដែលចេញក្រៅផ្ទះដោយគ្មានហេតុផលត្រឹមត្រូវ ខណៈអ្នកដែលអនុញ្ញាតឲ្យចេញពីផ្ទះគឺមានតែកម្មករក្នុងវិស័យចាំបាច់ អ្នកទៅទិញម្ហូបអាហារ និងថ្នាំតែប៉ុណ្ណោះ។
នៅហ្វីលីពីន អ្នកមានផ្ទុក COVID-19 មានចំនួន ៥,៦៦០ករណី និងអ្នកស្លាប់ចំនួន៣៦២ករណី គិតត្រឹមថ្ងៃទី១៦ ខែមេសា។ ប៉ុន្តែចំនួនអាចនឹងមានច្រើនជាងនេះនៅពេលគេពន្លឿនការធ្វើតេស្តនៅទូទាំងប្រទេស៕