កីឡាជាតិ
ជាតិ
សូលទីឡូបញ្ចប់កិច្ចសន្យា ប្រាក់ សុវណ្ណាពិសិដ្ឋ, សឿង បញ្ញា ក្រោយមិនគោរពវិន័យ
× ក្លិបបាល់ទាត់សូលទីឡូអង្គរនៅថ្ងៃទី១៧ ខែមេសា ឆ្នាំ២០២០ នេះ បានសម្រេចបញ្ចប់កិច្ចសន្យាជាមួយកីឡាករពីររូបទាំងពាក់កណ្តាលទី ក្រោយពួកគេប្រព្រឹត្តខុសពីវិន័យក្លិបក្នុងនាមជាកីឡាករអាជីព។
ត្រឹមតែ១នាទីប៉ុណ្ណោះ ក្លិបសូលទីឡូអង្គរបានសរសេរសារលើទំព័រហ្វេសប៊ុកផ្លូវការ បញ្ចប់កិច្ចសន្យាជាមួយកីឡាកររហូតដល់ទៅពីររូប រួមមាន ប្រាក់ សុវណ្ណាពិសិដ្ឋ និង សឿង បញ្ញា។ ប៉ុន្តែក្លិបមានមូលដ្ឋាននៅខេត្តសៀមរាបមួយនេះ មិនបានបញ្ជាក់ពីមូលហេតុលម្អិតរហូតឈានដល់បញ្ចប់កិច្ចសន្យានេះឡើយ គ្រាន់តែបញ្ជាក់ថា ពួកគេមិនគោរពវិន័យក្លិប ក្នុងនាមជាកីឡាករអាជីព។
សូលទីឡូអង្គរបានចាត់ទុកការសម្រេចចិត្តនេះថា ជារឿងមួយដ៏លំបាក តែវាជាគំរូមួយដ៏ល្អក្នុងការលុបបំបាត់កុំឲ្យកីឡាករដទៃធ្វើបែបនេះទៀតនៅថ្ងៃក្រោយ។ សូលទីឡូអង្គរ ក៏បានបង្ហាញពីការសោកស្តាយចំពោះការបាត់បង់កីឡាករទាំងពីររូបនេះផងដែរ។
គួររំលឹកផងដែរថា កាលពីពេលកន្លងទៅកីឡាករ ម៉ាត់ យ៉ាមីន និងកីឡាករ សេង កុសែន ត្រូវបានក្លិបបឹងកេត និងភ្នំពេញក្រោនបញ្ចប់កិច្ចសន្យាជាបន្តបន្ទាប់ ក្រោយពួកគេបានប្រព្រឹត្តអំពើប្រាសចាកពីក្រមសីលធម៌កីឡាករអាជីព៕
Tag:
សូលទីឡូអង្គរ
សឿង បញ្ញា
ប្រាក់ សុវណ្ណាពិសិដ្ឋ
© រក្សាសិទ្ធិដោយ thmeythmey.com