បទយកការណ៍ / បទសម្ភាសន៍
ជាតិ
សង្គមជាតិ
ជូ ជាមាស ខំរៀនបីមហាវិទ្យាល័យព្រោះចង់ធ្វើសវនករ បច្ចុប្បន្ន មានយុវជនមួយចំនួន បើទោះបីជាពួកគេបានរៀនដល់ឆ្នាំទីពីរ ឬទីបីទៅហើយក្តី ក៏ពួកគេហាក់ដូចជាមិនទាន់ប្រាកដថា ពួកគេចង់ក្លាយជាអ្វីដែរនៅពេលរៀនចប់។ ប៉ុន្តែយុវជន ជូ ជាមាស មិនមែនជាមនុស្សដែលមានការរួញរាឡើយ។ និស្សិតជ័យលាភីអាហារូបករណ៍បីមហាវិទ្យាល័យព្រមគ្នារូបនេះ បានកំណត់វាសនារបស់ខ្លួនរួចហើយថា នឹងក្លាយជាសវនករ។
ជំនាញជាសវនករ ដែលយុវជន ជាមាស បានឲ្យនិយមន័យថា ជាអ្នកត្រូតពិនិត្យរបាយការណ៍ហិរញ្ញវត្ថុផ្សេងៗរបស់ក្រុមហ៊ុន ឬស្ថាប័នណាមួយនោះ គឺជាអាជីពក្នុងក្តីសុបិនរបស់និស្សិតវ័យ២១ឆ្នាំរូបនេះ នាពេលអនាគត។
ជាកូនកំព្រាឪពុកតាំងពីតូច ជាមាស បានបញ្ចប់ថ្នាក់មធ្យមសិក្សាទុតិយភូមិកាលពីឆ្នាំ២០១០ ដោយទទួលបាននិទ្ធេស B នៅឯវិទ្យាល័យអង្គរ ខេត្តសៀមរាប។ ក្រោយពីបានជាប់បាក់ឌុបភ្លាម ជាមាសបានចូលរួមប្រកួតប្រជែងយកអាហារូបករណ៍ជាបន្តបន្ទាប់របស់រហូតដល់ឈ្នះអាហារូបករណ៍បីផ្ទួនគ្នា។
អាហារូបករណ៍ទីមួយដែល ជាមាស បានទទួលគឺផ្នែកធនាគារ និងហិរញ្ញវត្ថុពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) ទីពីរ គឺអាហារូបករណ៍ផ្នែកអក្សរសាស្ត្រអង់គ្លេសពីសាកលវិទ្យាល័យកម្ពុជា (UC) និងទី៣គឺអាហារូបករណ៍ថ្នាក់គណនេយ្យពីសាលាពាណិជ្ជកម្មខេមអេត (CamEd)។
មិនមែនដូចជាការលើកឡើងថា «ចាប់នេះចាប់នោះ មិនឆ្ពោះត្រង់ណានោះឡើយ»។ យុវជនដែលនសប្បុរស បានបញ្ជាក់ប្រាប់ពីការស្រវាចាប់រៀនទាំងបីមហាវិទ្យាល័យរបស់ខ្លួនថា៖ «ខ្ញុំចង់ចាប់យកមុខវិជ្ជាដែលទាក់ទងនឹងការគិតលេខនិងពាណិជ្ជកម្ម ដូច្នេះហើយបានជាធ្វើឲ្យខ្ញុំខំប្រឹងប្រែងរៀនរហូតបានអាហារូករណ៍ទាំងបីខាងលើហើយដែលអាហារូបករណ៍ពីរក្នុងបីនោះគឺទាក់ទងនឹងជំនាញពាណិជ្ជកម្មរួចទៅហើយ»។
ធ្លាប់មានប្រវត្តិជាក្មេងវត្តឧណ្ណាឡោម យុវជនថ្ពាល់ខួចរូបនេះបានបន្ថែមទៀតថា សម្រាប់ប្រទេសកម្ពុជាបច្ចុប្បន្នការរៀនជំនាញតែមួយមុខគឺមិនទាន់គ្រប់គ្រាន់នោះទេ ដូច្នេះគេត្រូវតែខិតខំប្រឹងប្រែងរកជំនាញផ្សេងដែលអាចជួយបំពេញសមត្ថភាពរបស់ខ្លួន។ បន្ថែមពីលើនេះ គេត្រូវតែរៀនថ្នាក់បរិញ្ញាបត្រផ្នែកភាសាអង់គ្លេសមួយទៀតដើម្បីជាជំនួយដល់ការសម្រេចនូវក្តីសុបិន។
កញ្ញា ខាន់ សុគុំមនោ ដែលជាមិត្តរួមថ្នាក់របស់ជាមាសនៅឯសាកលវិទ្យាល័យកម្ពុជាបានបង្ហើបឲ្យដឹងនូវចរិតលក្ខណរបស់ជាមាសថា “បើមើលពីខាងក្រៅគេហាក់ដូចជាមិនទំនងឧស្សាហ៍ប៉ុន្មានទេ ព្រោះគេតែងចំណាយពេលជជែកលេងជាមួយមិត្តភក្តិ និងស្តាប់ចំរៀង ក៍ប៉ុន្តែខ្ញុំគិតថាចំនុចខ្លាំងរបស់គាត់នោះគឺគាត់ពូកែរៀបចំនិងគ្រប់គ្រងពេលវេលាសិក្សាបានល្អ ពោលគឺចំណាយពេលសិក្សាតិចនិងទទួលយកចំណេះដឹងបានច្រើន។
គួរបញ្ជាក់ផងដែរថាយុវជន ជូ ជាមាស គឺជាអតីតសិស្សពូកែដែលបានទទួលពិន្ទុខ្ពស់ចំណាត់ថ្នាក់លេខប្រាំទូទាំងប្រទេសកាលពីសម័យប្រឡងសញ្ញាបត្រមធ្យមសិក្សាទុតិយភូមិឆ្នាំ២០១០ ។
លទ្ធផលនេះហើយដែលធ្វើឲ្យ ជាមាស បានទទួលប្រាក់ឧបត្ថម្ភចំនួន១០០ដុល្លាជារៀងរាល់ខែរហូតមកដល់បច្ចុប្បន្ន៕
អត្ថបទដោយ រិន សុក្រិត្យ
© រក្សាសិទ្ធិដោយ thmeythmey.com