ករណីនៅសិង្ហបុរី ឥណ្ឌូណេស៊ី ហ្វីលីពីន ម៉ាឡេស៊ី បង្ហាញថា អាស៊ីអាគ្នេយ៍ប្រឈមនឹង COVID-19 កាន់តែខ្ពស់

COVID-19

អន្តរជាតិ

ករណីនៅសិង្ហបុរី ឥណ្ឌូណេស៊ី ហ្វីលីពីន ម៉ាឡេស៊ី បង្ហាញថា អាស៊ីអាគ្នេយ៍ប្រឈមនឹង COVID-19 កាន់តែខ្ពស់

21, Apr 2020 , 5:59 pm

រូបភាព

ពលរដ្ឋនៅសិង្ហបុរី ឈរតម្រង់ជួរដកប្រាក់ពី ATM ដោយរក្សាគម្លាតសុវត្ថិភាព។ រូបថត AFP

ដោយ: ធៀន ភារិន្ទ

គិតមកត្រឹមថ្ងៃទី២១ ខែមេសា តួលេខអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស (COVID-19) នៅក្នុងតំបន់អាស៊ីអាគ្នេយ៍ បានកើនឡើងជាលំដាប់។ ប្រទេសនាំមុខគេគឺ សិង្ហបុរី ឥណ្ឌូណេស៊ី ហ្វីលីពីន និងម៉ាឡេស៊ី។ ការកើនឡើងយ៉ាងលឿននៃតួលេខក្នុងរយៈពេលចុងក្រោយនេះ ត្រូវបានអ្នកជំនាញមួយចំនួន ប៉ាន់ប្រមាណថាអាស៊ីអាគ្នេយ៍អាចជាទីតាំងផ្ទុះ COVID-19 ថ្មី។

មកទល់ពេលនេះ តំបន់អាស៊ីអាគ្នេយ៍មានករណី COVID-19សរុបជាង ៣ម៉ឺនករណី អ្នកស្លាប់១១៧២ករណី និងអ្នកជាសះស្បើយ ប្រមាណ៧៩០០ករណី។ តាមគិតតួលេខសរុបរួមបញ្ជូលគ្នារវាងប្រទេស ឥណ្ឌូណេស៊ី ហ្វីលីពីន ម៉ាឡេស៊ី និងសិង្ហបុរី គឺមានចំនួនអ្នកផ្ទុក COVID-19 រហូតដល់ ៨៧,៩ភាគរយ។ នេះបើតាមទិន្នន័យរបស់សកលវិទ្យាល័យ Johns Hopkins។

សិង្ហបុរីដែលជារដ្ឋដែលតូចមួយក្នុងតំបន់ មានករណីឆ្លងជាង៩ពាន់ ខណៈឥណ្ឌូណេស៊ីជាង៦៧០០ ហ្វីលីពីនជិត៦៥០០ ម៉ាឡេស៊ីជិត៥៥០០ ថៃជាង២៨០០។ វៀតណាមមាន២៦៨ករណី ព្រុយណេមាន១៣៨ករណី កម្ពុជាមាន១២២ករណី មីយ៉ាន់ម៉ាមាន១១៩ករណី ទីម័រខាងកើតមាន២២ករណី និងឡាវ មាន១៩ករណី។

បើទោះបីជាតួលេខតំបន់អាស៊ីអាគ្នេយ៍នៅតែតិចជាងអាមេរិក ឬតំបន់អឺរ៉ុបឆ្ងាយមែន ប៉ុន្តែតំបន់អាស៊ីអាគ្នេយ៍អាចជាទីតាំងផ្ទុះថ្មី ដោយសារករណីជាច្រើន មិនទាន់ត្រូវបានគេរកឃើញ ហើយCOVID-19 នឹងឆ្លងពីមនុស្សម្នាក់ ទៅមនុស្សម្នាក់ផ្សេងទៀតយ៉ាងលឿន ដែលអាចបង្កឲ្យមនុស្សជាច្រើនអ្នកផ្ទុកជំងឺថ្មីនេះ។ ប្រទេស ដែលគេបារម្ភខ្លាំងជាងគេបំផុត គឺឥណ្ឌូណេស៊ី និងហ្វីលីពីន ដែលអាចរងគ្រោះដោយសារជំងឺប្រភេទថ្មីមួយនេះ។

បើតាមលោក Simon Tay ប្រធានគោលនយោបាយសិង្ហបុរី នៃវិទ្យាស្ថានកិច្ចការអន្តរជាតិ បានប្រាប់សារព័ត៌មាន CNBC ថា តំបន់អាស៊ីអាគ្នេយ៍ បានរកឃើញអ្នកផ្ទុក COVID-19 កើនឡើងខ្លាំង។ ការណ៍នេះទាមទារឲ្យរដ្ឋាភិបាលប្រទេសមួយចំនួនចាត់វិធានការដោះស្រាយបន្ទាន់ ជាពិសេសហ្វីលីពីន និងឥណ្ឌូណេស៊ី បានធ្វើតេស្តរក COVID-19 បានតិចណាស់។

តាមរយៈការធ្វើតេស្តនៅហ្វីលីពីន និងឥណ្ឌូណេស៊ី គឺមានចំនួនតិចណាស់ បើធៀបទៅនឹងចំនួនប្រជាជនរបស់ខ្លួន។ សម្រាប់ហ្វីលីពីន ដែលមានចំនួនCOVID-19 សរុប មានចំនួនជាង ៦ពាន់ករណី បានធ្វើតេស្តប្រជាជនសរុប ៥៩៩២៨ករណី ឬស្មើនឹង ៥៤៧នាក់ ក្នុងចំណោមប្រជាជន ១លាននាក់។ បើតាមការចុះផ្សាយរបស់វែបសាយ Worldometerស ឥណ្ឌូណេស៊ីវិញ បានធ្វើតេស្តចំនួន ៤១៨១២ករណី ឬស្មើនឹង ១៦០នាក់ ក្នុងចំណោមប្រជាជនមួយលាននាក់។

សូមបញ្ជាក់ថា ក្នុងចំណោមបណ្តាប្រទេសអាស៊ីទាំងអស់ ដោយមិនគិតពីទីម័រខាងកើត មីយ៉ាន់ម៉ា គឺជាប្រទេសធ្វើតេស្តរក COVID-19 តិចជាងគេបង្អស់ ពោលគឺមានត្រឹមតែ ៨៦នាក់ ក្នុងចំណោមប្រជាជន ១លាននាក់ប៉ុណ្ណោះ។ ចំណែកសិង្ហបុរី គឺជាប្រទេសធ្វើតេស្ត បានច្រើនជាងគេបង្អស់ ដោយមានចំនួន ១៦២០៣ ក្នុងចំណោមប្រជាជន ១លាននាក់៕