COVID-19
អន្តរជាតិ
គ្រួសារមួយនៅអូស្ត្រាលីបង្កើតផ្សារទំនើបនៅផ្ទះខ្លួនឯងសម្រាប់ម្តាយជរាដែលវង្វេងស្មារតី
× លោកយាយ Hendrika van Genderen អាយុ៨៧ឆ្នាំដែលរស់នៅរដ្ឋ New South Wales ប្រទេសអូស្ត្រាលី មានជំងឺវង្វេងវង្វាន់។ គាត់តែងតែទាមទារឲ្យកូនចៅជូនទៅផ្សារទំនើបជារៀងរាល់សប្តាហ៍ ដោយមិនបានដឹងពីការហាមប្រាមការធ្វើដំណើរដោយសារ COVID-19 នោះឡើយ។ ដើម្បីឲ្យគាត់សប្បាយចិត្ត កូនចៅរបស់គាត់បាននាំគ្នាយកទីតាំងនៅផ្ទះខ្លួន ច្នៃជាផ្សារទំនើប។
មានឱកាសដើរទិញឥវ៉ាន់នៅផ្សារទំនើប គឺជាសុភមង្គលរបស់លោកយាយ Hendrika van Genderen។ ដោយសារគាត់មានស្មារតីវង្វេងវង្វាន់ គាត់មិនស្គាល់ច្បាស់ទីតាំងផ្សារនោះឡើយ ហើយតែងតែឲ្យលោក Jason van Genderen ជូនទៅជារៀងរាល់សប្តាហ៍។ នេះបើតាមការផ្សាយរបស់សារព័ត៌មាន 7News Australia អមដោយឃ្លីបវីដេអូ ដែលត្រូវបានថតតាំងពីថ្ងៃទី១០ ខែមេសា មក។
លោក Jason បានអះអាងថា៖ «រៀងរាល់សប្តាហ៍ គាត់តែងតែមានកម្មវិធីដើរផ្សារ ប៉ុន្តែយើងមិនអាចនាំគាត់ទៅដូចមុនបាននោះឡើយ។ ទីបំផុតយើងក៏សម្រេចចិត្តយកទីតាំងផ្ទះច្នៃជាផ្សារទំនើប សម្រាប់គាត់»។
តាមរយៈឃ្លីបវីដេអូ លោក Jason សំដែងធ្វើជាជូនម្តាយទៅផ្សារ ដោយភរិយា និងកូនៗរបស់លោកនាំគ្នាធ្វើអ្នកលក់ និងចាំគិតលុយ។ លោកយាយ Hendrika រីករាយយ៉ាងខ្លាំង ជាមួយនឹងការដើរទិញទំនិញ ប៉ុន្តែគាត់មិនបានចាប់អារម្មណ៍ថា ទំនិញទាំងនោះ ជាអ្វីនោះឡើយ។
អូស្ត្រាលីដែលស្ថិតនៅក្នុងទ្វីបអូសេអានី មានករណីឆ្លង COVID-19 ជាង៦៦០០ ដែលក្នុងនោះស្លាប់ជាង៧០នាក់ និងសះស្បើយជិត៤៧០០នាក់៕
© រក្សាសិទ្ធិដោយ thmeythmey.com