ប្រធានប្រយុទ្ធជំងឺឆ្លងក្រុងហាណូយ ត្រូវចាប់ខ្លួនពាក់ព័ន្ធអំពើពុករលួយរឿងទិញសម្ភារតេស្ត COVID-19

COVID-19

អន្តរជាតិ

ប្រធានប្រយុទ្ធជំងឺឆ្លងក្រុងហាណូយ ត្រូវចាប់ខ្លួនពាក់ព័ន្ធអំពើពុករលួយរឿងទិញសម្ភារតេស្ត COVID-19

23, Apr 2020 , 5:28 pm

រូបភាព

ប្រធានCDCប្រចាំក្រុងហាណូយ Nguyen Nhat Cam (Vietnam-express)

ដោយ:

ប្រធានមជ្ឈមណ្ឌលគ្រប់គ្រងជំងឺឆ្លងប្រចាំក្រុងហាណូយ (CDC) និងបក្ខពួក៦នាក់ផ្សេងទៀត ត្រូវបានសមត្ថកិច្ចឃាត់ខ្លួនពីបទពុករលួយពាក់ព័ន្ធការបញ្ជាទិញសម្ភារធ្វើតេស្ត COVID-19 ។

អត្ថបទទាក់ទង

១សប្តាហ៍ក្រោយគ្មាន COVID-19 ថ្មី វៀតណាមផ្ដើមបន្ធូរការបិទប្រទេសដើម្បីជួយសេដ្ឋកិច្ច

ក្នុងសេចក្តីថ្លែងការណ៍នៅថ្ងៃ២២ ខែមេសា ក្រសួងសន្តិសុខសាធារណៈវៀតណាម បានបញ្ជាក់ថា ប្រធានCDCប្រចាំក្រុងហាណូយ Nguyen Nhat Cam ត្រូវបានចាប់ខ្លួន និងកាត់ទោសពីបទល្មើសច្បាប់លើការដេញថ្លៃដែលបង្កជាផលវិបាកយ៉ាងធ្ងន់ធ្ងរ។

តាមការចុះផ្សាយរបស់សារព័ត៌មានអនឡាញវៀតណាម Vietnam Express ក្រសួង អះអាងថា ប្រធានCDCរូបនេះ បានគប់គិតបោកប្រាស់ និងដំឡើងថ្លៃកញ្ចប់ធ្វើតេស្តCOVID-19ដែលដាក់ដេញថ្លៃ។

លោក Cam បានចូលកាន់តំណែងជាប្រធានCDCប្រចាំក្រុងហាណូយ ក្នុងឆ្នាំ២០១៨។ CDC ទទួលបន្ទុកចាត់វិធានការបង្ការការរីករាលដាលជំងឺឆ្លង ក្នុងទីក្រុងដែលមានប្រជាជនរស់នៅប្រមាណ៨លាន់នាក់ក្នុងប្រទេសវៀតណាមនេះ។

ទន្ទឹមនឹងសហការជាមួយអាជ្ញាធរតំបន់ទប់ស្កាត់COVID-19 និងស៊ើបអង្កេតករណីឆ្លងថ្មី CDC ក៏ទទួលបន្ទុកធ្វើតេស្តCOVID-19 ក្នុងទីក្រុង ហើយធ្វើតេស្តមនុស្សចន្លោះពី២៥០០-៣០០០នាក់ក្នុងមួយថ្ងៃ។

គិតត្រឹមថ្ងៃ២៣ ខែមេសា វៀតណាម មានករណីឆ្លងCOVID-19សរុប ២៦៨ករណី ក្នុងនោះជាង៨០ភាគរយជាសះស្បើយ។ ម្យ៉ាងទៀត ប្រទេសនេះគ្មានករណីឆ្លងថ្មី១សប្តាហ៍ពេញហើយ ដែលធ្វើឲ្យរដ្ឋាភិបាលផ្ដើមគិតគូរដកហូតការរឹតត្បិតការដើរហើរជួយសេដ្ឋកិច្ច៕