អន្តរជាតិ
លោក ត្រាំ ទាត់ចោលព័ត៌មានរបស់ CNN ដែលថាលោក គីម ជុងអ៊ុន ឈឺធ្ងន់ លោកប្រធានាធិបតីអាមេរិក ដូណាល់ ត្រាំ (AFP)
× ប្រធានាធិបតីអាមេរិក ដូណាល់ ត្រាំ បានបដិសេធរបាយការណ៍ថា មេដឹកនាំកូរ៉េខាងជើង គីម ជុងអ៊ុន ធ្លាក់ខ្លួនឈឺធ្ងន់ក្រោយការវះកាត់បេះដូង។ ត្រង់នេះ លោក ត្រាំ បានរិះគន់ទូរទស្សន៍អាមេរិក CNN សម្រាប់ការចុះផ្សាយព័ត៌មានក្លែងក្លាយបែបនេះ។
«ខ្ញុំគិតថា របាយការណ៍នេះ ពុំត្រឹមត្រូវ»។ លោក ដូណាល់ ត្រាំ ប្រាប់អ្នកសារព័ត៌មានបែបនេះ នៅថ្ងៃ២៣ មេសា ដោយបន្ថែមថា៖«ខ្ញុំស្ដាប់ឮថាពួកគេបានប្រើឯកសារចាស់»។ យ៉ាងណាមិញ ប្រធានាធិបតីទី៤៥រូបនេះ បានបដិសេធបញ្ជាក់ថានេះជាព័ត៌មានផ្ទាល់ពីកូរ៉េខាងជើងថាលោកគីមពិតជាមានសុខភាពល្អ។
ផ្ទុយទៅវិញ លោក ដូណាល់ ត្រាំ បានវាយប្រហារលើទូរទស្សន៍អាមេរិក CNN ដែលប្រមុខដឹកនាំអាមេរិករូបនេះពុំសូវស៊ីខ្សែគ្នាយូរហើយនោះ។ ថ្លែងអំឡុងសន្និសីទព័ត៌មានស្តីពីស្ថានភាពជំងឺរាតត្បាតសាកល COVID-19 លោក ត្រាំ អះអាងដូច្នេះថា៖«ខ្ញុំគិតថា វាគឺជារបាយការណ៍ក្លែងក្លាយដែលធ្វើឡើងដោយ CNN»។
កាលពីថ្ងៃចន្ទដើមសប្ដាហ៍នេះ ទូរទស្សន៍ខ្សែកាបអាមេរិក CNN ដែលដកស្រង់សម្តីដែលខ្លួនអះអាងថាជាមន្ត្រីអាមេរិកសុំមិនបញ្ចេញឈ្មោះ បានចុះផ្សាយថា ក្រុងវ៉ាស៊ីនតោនបានតាមដានព័ត៌មានសម្ងាត់មួយថា លោក គីម ជុងអ៊ុន ស្ថិតក្នុងស្ថានភាពសុខភាពធ្ងន់ធ្ងរ ក្រោយឆ្លងកាត់ការវះកាត់។
ដោយឡែក សារព័ត៌មានអនឡាញមួយឈ្មោះថា Daily NK ដែលដំណើរការដោយក្រុមអ្នករត់គេចពីកូរ៉េខាងជើង បានចុះផ្សាយថា លោក គីម បានឆ្លងកាត់ការវះកាត់បេះដូង កាលពីដើមមេសានេះ ហើយកំពុងសម្រាកនៅវីឡាមួយកន្លែងក្នុងខេត្ត North Phyongan ។ សារព័ត៌មានដដែលនេះ អះអាងទៀតថា ប្រមុខដឹកនាំវ័យក្មេងរបស់កូរ៉េខាងជើងដែលស្ថិតក្នុងវ័យ៣៦ឆ្នាំ ទាមទារការព្យាបាលបន្ទាន់ដោយហេតុតែបញ្ហាការជក់បារី ធាត់ជ្រុល និងធ្វើការជ្រុល។
ទោះជាបែបនេះក្តី ក្រោយធ្លាយរបាយការណ៍របស់ទូរទស្សន៍ CNN កូរ៉េខាងត្បូង កាលពីថ្ងៃ២១ ខែមេសាបានលើកឡើងថា ខ្លួនពុំមើលឃើញសញ្ញាអ្វីខុសប្រក្រតីឡើយពាក់ព័ន្ធសុខភាពរបស់លោក គីម ជុងអ៊ុន ដោយសង្កត់ធ្ងន់ថា លោកគីមបន្តមានវត្តមាននៅទីសាធារណៈមកទល់នឹងពេលបច្ចុប្បន្ន។ នេះបើប្រភពរដ្ឋាភិបាលកូរ៉េខាងត្បូង ដែលដកស្រង់ចុះផ្សាយដោយទីភ្នាក់ងារព័ត៌មាន Yonhap ៕
Tag:
សហរដ្ឋអាមេរិក
គីម ជុងអ៊ុន
ដូណាល់ត្រាំ
គីមជុងអ៊ុន
CNN
© រក្សាសិទ្ធិដោយ thmeythmey.com