COVID-19
អន្តរជាតិ
រដ្ឋមន្ត្រីសុខាភិបាលអង់គ្លេស៖ សុខភាពលោក ចនសុន ល្អវិញហើយក្រោយឆ្លង COVID-19
លោកនាយករដ្ឋមន្រ្តីអង់គ្លេស បូរីស ចនសុខ។ រូបភាព៖ Reuters
×![]()
ដោយ: ធៀន ភារិន្ទ
រដ្ឋមន្ត្រីសុខាភិបាលអង់គ្លេស លោក Matt Hancock នាថ្ងៃទី២៤ ខែមេសា បានអះអាងថា សុខភាពរបស់លោកនាយករដ្ឋមន្ត្រីអង់គ្លេស បូរីស ចនសុន មានស្ថានភាពល្អ និងជាសះស្បើយពីជំងឺរលាកសួត ដែលបង្កដោយកូរ៉ូណាវីរុស (COVID-19) ។ 
បន្ទាប់ពីផ្ទុក COVID-19 ជិតរយៈពេល១ខែមក ពេលនេះស្ថានភាពរបស់លោកនាយករដ្ឋមន្ត្រី បូរីស ចនសុន បានល្អប្រសើរ និងជាសះស្បើយហើយ។ ប្រាប់សារព័ត៌មាន Sky News រដ្ឋមន្ត្រីសុខាភិបាល លោក Matt Hancock បានបញ្ជាក់ថាយ៉ាងដូច្នេះថា៖ « ខ្ញុំប្រាកដណាស់ថា លោកនាយករដ្ឋមន្ត្រី នឹងត្រលប់មកធ្វើការក្នុងពេលឆាប់ៗនេះ តាមការណែនាំរបស់វេជ្ជបណ្ឌិត»។
ដោយបាននិយាយជាមួយលោក ចនសុខ នាថ្ងៃទី២៣ ខែមេសា លោករដ្ឋមន្ត្រីសុខាភិបាលបានបន្តថា អវត្តមានរបស់លោកនាយករដ្ឋមន្ត្រី នៅពេលនេះ គឺធ្វើតាមការផ្តល់យោបល់ពីវេជ្ជបណ្ឌិត។
ពេលនេះ លោក ចនសុន បានចំណាយពេលសម្រាកកាយនៅនិវេសនដ្ឋាន Chequers ដែលជាផ្ទះឯកជនរបស់នាយករដ្ឋមន្ត្រីនៅភាគខាងជើងអង់គ្លេស។
លោកនាយករដ្ឋមន្ត្រី ប្រកាសពីការឆ្លងកូរ៉ូណាវីរុសនៅថ្ងៃទី២៧ ខែមីនា តាមការរយៈបណ្តាញសង្គម Twitter របស់លោកផ្ទាល់។ ប៉ុន្មានថ្ងៃក្រោយមក លោក ចនសុន ត្រូវបានគេបញ្ជូនទៅមន្ទីរពេទ្យ ប៉ុន្តែបីថ្ងៃបន្ទាប់លោកចាកចេញវិញ បន្ទាប់ពីមានស្ថានភាពធូរស្រាល។
ក្នុងថ្ងៃលោកនាយករដ្ឋមន្ត្រីប្រកាសមានផ្ទុក COVID-19 នេះ លោករដ្ឋមន្ត្រីសុខាភិបាលខាងលើ ក៏ត្រូវបានគេរកឃើញថាមានផ្ទុកកូរ៉ូណាវីរុសផងដែរ។ តែលោករដ្ឋមន្ត្រី Hancock ជាសះស្បើយវិញ ក្រោយពីផ្ទុក COVID-19 បានមួយរយៈខ្លី។
គិតមកត្រឹមពេលនេះ អង់គ្លេសមានករណី COVID-19 សរុបចំនួនជិត ១៤ម៉ឺនករណី អ្នកស្លាប់ប្រមាណ និង១៨០០០ករណី៕
Tag:
អង់គ្លេស
COVID-19
© រក្សាសិទ្ធិដោយ thmeythmey.com
