ជប៉ុន រកឃើញ៥៧ករណីថ្មីទៀត នៅក្នុងនាវា Costa Atlantica

COVID-19

អន្តរជាតិ

ជប៉ុន រកឃើញ៥៧ករណីថ្មីទៀត នៅក្នុងនាវា Costa Atlantica

25, Apr 2020 , 3:54 pm

រូបភាព

នាវាទេសចរណ៍ Costa Atlantica។ រូបភាព៖ AP

ដោយ: ធៀន ភារិន្ទ

អាជ្ញាធរសុខាភិបាលក្រុងណាកាសាគី បានរកឃើញអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស (COVID-19) ជិត ៦០ករណីបន្ថែមទៀត នៅក្នុងនាវាទេសចរណ៍ Costa Atlantica។ នេះបើតាមការចុះផ្សាយរបស់ទូរទស្សន៍ជប៉ុន NHK ។

នាវាទេសចរណ៍Costa Atlantica ដែលមានផ្ទុកបុគ្គលិកបម្រើការចំនួន ៦២៣នាក់ ត្រូវបានអាជ្ញាធរសុខាភិបាលជប៉ុន ធ្វើតេស្តរកឃើញករណីវិជ្ជមាននៃកូរ៉ូណាវីរុសចំនួន ៥៧ករណីបន្ថែមទៀត នៅថ្ងៃទី២៥ ខែមេសា។ តួលេខរកឃើញCOVID-19 សរុប នៅក្នុងនាវាជួសជុលមួយនេះ បានកើនដល់ចំនួន ១៤៨ករណី។ ក្នុងចំនួននេះ មានបុគ្គលិកនាវាម្នាក់ កំពុងមានស្ថានភាពសុខភាពធ្ងន់ធ្ងរ។

មុនដំបូង នាវាទេសចរណ៍នេះ ត្រូវគេគ្រោងយកទៅជួសជុលនៅក្នុងប្រទេសចិន ប៉ុន្តែដោយសារការរីកសាយភាយនៃ COVID-19 ទើបគេយកមកជួសជុលនៅណាកាសាគី (Nagasaki) ប្រទេសជប៉ុនវិញ។

គិតមកត្រឹមពេលនេះ ករណីCOVID-19 សរុបមានចំនួន ១២៨២៩ករណី អ្នកស្លាប់ចំនួន ៣៤៥ករណី និងអ្នកជាសះស្បើយចំនួន ១៥៣០ករណី៕