រៀនកម្រិតថ្នាក់មធ្យម តែលោក រស់ សុផារិទ្ធ អាចបង្រៀនជនបរទេសលើជំនាញកុលាលភាជន៍ខ្មែរ

ជាតិ

សង្គមជាតិ

សិល្បះ

រៀនកម្រិតថ្នាក់មធ្យម តែលោក រស់ សុផារិទ្ធ អាចបង្រៀនជនបរទេសលើជំនាញកុលាលភាជន៍ខ្មែរ

26, Apr 2020 , 3:59 pm

រូបភាព

ដោយ: ប៉ូ សាគុន

ភ្នំពេញ៖ ទើបតែរៀនឆ្នាំទី៦ផ្នែកកុលាលភាជន៍ នៅសាលាមធ្យមវិចិត្រសិល្បៈ យុវសិស្ស រស់ សុផារិទ្ធ អាយុ២១ឆ្នាំ អាចមានសមត្ថភាពទៅបង្រៀនជនបរទេសគិតម៉ោង ដែលអាចទទួលបានចំណូលខ្លះ។ មានគម្រោងច្បាស់លាស់ សុផារិទ្ធ ទៅថ្ងៃអនាគតចង់បើកសិប្បកម្មធ្វើកុលាលភាជន៍ដោយខ្លួនឯង និងចង់ក្លាយជាគ្រូបង្រៀនលើជំនាញនេះតែម្ដង។

ចូលចិត្តគូរគំនូរតាំងតែពីតូច រស់ សុផារិទ្ធ ត្រូវបានម្ដាយនាំមកឱ្យចូលរៀននៅសាលាមធ្យមវិចិត្រសិល្បៈ កាលពីប្រមាណ៥ឆ្នាំមុន។ ពេលបានមកដល់សាលានេះដំបូង ជំនាញដែល សុផារិទ្ធ ចាប់អារម្មណ៍ ហើយយល់ថាខ្លួនមានឧបនិស្ស័យខ្ពស់នោះគឺ ជំនាញកុលាលភាជន៍។ ហើយចាប់តាំងពីពេលនេះ ក្មេងប្រុសដែលបច្ចុប្បន្ននេះមានអាយុ២១ឆ្នាំទៅហើយនោះ ចាប់ផ្ដើមតាំងចិត្តសម្រួចជំនាញដែលខ្លួនស្រឡាញ់។

មិនអាចនិយាយឱ្យបានច្បាស់លាស់ ពីអារម្មណ៍នៅពេលដែលបានកាន់ដីដើម្បីធ្វើរូបអ្វីមួយ សុផារិទ្ធ ដែលមានសម្បុរស រាងខ្ពស់ស្រឡះ ដឹងត្រឹមថាខ្លួនសប្បាយចិត្តប៉ុណ្ណោះ។ ជាប់ឈ្មោះជាសិស្សដែលមានសេចក្ដីព្យាយាមមាំ និងមានការយកចិត្តទុកដាក់ផ្ចិតផ្ចង់លើការងារខ្ពស់ ពីគ្រូឯកទេសជំនាញ សុផារិទ្ធ ដែលមានស្រុកកំណើតនៅស្រុកខ្សាច់កណ្ដាល ខេត្តកណ្ដាល មានសមត្ថភាពអាចបង្រៀនពីការធ្វើកុលាលភាជន៍ខ្មែរ ទៅកាន់ភ្ញៀវទេសចរណ៍បរទេសតាំងពីខ្លួនរៀននៅឆ្នាំទី៣មកម្លេះ។

ទោះជាយ៉ាងណា ការបង្រៀនជនបរទេស បុរសដែលកំព្រាឪពុករូបនេះ ធ្វើតែនៅពេលទំនេរពីការសិក្សាប៉ុណ្ណោះ។ សុផារិទ្ធ បញ្ជាក់បន្ថែមដូច្នេះ៖« ជនបរទេសខ្លះគាត់ចង់រំឭកពីអនុស្សាវរីយកាលគាត់នៅក្មេង គាត់ក៏មករៀនធ្វើកុលាលភាជន៍នេះ។ នៅពេលដែលមានភ្ញៀវចាប់ពី៧ទៅ១០នាក់ឡើងទៅ គេណាត់ពេលវេលា ហើយខ្ញុំនិងបងប្រុសរបស់ខ្ញុំទៅបង្រៀនគេ។ យើងបង្រៀនគិតជាម៉ោង ក្នុងភ្ញៀវម្នាក់មួយម៉ោង៥ទៅ៦ដុល្លារអាមេរិក»។

ទោះបីអាចរកប្រាក់បានក៏ពិតមែន ប៉ុន្តែបុរសដែលមានម្ដាយជាអ្នកលក់ទំនិញរូបនេះ មិនដែលអវត្តមានការសិក្សា ដើម្បីចង់បានប្រាក់បន្តិចបន្ទួចនេះឡើយ។ សុផារិទ្ធ ដែលបង្ហាញពីភាពហ្មត់ចត់រាល់ការធ្វើកុលាលភាជន៍ បានដឹងច្បាស់ណាស់ថា ជំនាញនេះមិនសូវមានទីផ្សារ។ ប៉ុន្តែទំនងជាបុរសដែលមានបងប្អូន៣នាក់រូបនេះ មានជំនឿមុតមាំថា ទីផ្សារគឺដើរពីក្រោយចំណេះជំនាញច្បាស់លាស់ហើយមើលទៅ បានជាលោកខំតស៊ូលើជំនាញមួយនេះ។

រៀនថ្នាក់ទី១២ផ្នែកចំណេះដឹងទូទៅនៅវេនពេលថ្ងៃ បច្ចុប្បន្ន សុផារិទ្ធ ត្រូវរៀនឯកទេសកុលាលភាជន៍ច្រើនម៉ោងជាងគេនៅវេនពេលព្រឹក ព្រោះជាមុខវិជ្ជាស្នូល។ ក្រៅពីនោះ សុផារិទ្ធ ក៏រៀន ចិតពុម្ព រៀនគូរគំនូរពណ៌ គំនូរមើលឃើញ និងគំនូរស្អាត ផងដែរ ដើម្បីពង្រឹងដល់ឯកទេសស្នូល។

ទៅថ្ងៃអនាគត យុវជន រស់ សុផារិទ្ធ បានមើលឃើញគោលដៅរួចទៅហើយ គឺលោកចង់បើកសិប្បកម្មធ្វើកុលាលភាជន៍ដោយខ្លួនឯង និងចង់ក្លាយជាគ្រូបង្រៀនផ្នែកនេះតែម្ដង៕