ភ្នំពេញ៖ វិបត្តិCOVID-19 នឹងធ្វើឱ្យកម្មករស្គាល់តម្លៃការងារពិតប្រាកដ។ នេះជាការលើកឡើងរបស់លោក ហេង សួរ ដែលប្រាប់ឱ្យកម្មកររក្សាការងារឱ្យបានល្អ និងអនុវត្តតាមសេចក្តីណែនាំរបស់រដ្ឋាភិបាល ដែលកំពុងប្រយុទ្ធប្រឆាំង នឹងជំងឺកូវីដ១៩នេះ ដើម្បីបញ្ចៀសផលប៉ះពាល់ដល់ខ្លួន។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈរូបនេះ បានសង្កត់ធ្ងន់ថា ពេលនេះ មិនមែនជាពេលវេលាដែលកម្មករត្រូវការយកឈ្នះរដ្ឋាភិបាលទេ ។ប៉ុន្តែវាពេលមួយ ដែលកម្មករត្រូវបំពេញកាតព្វកិច្ច និងរួមគ្នា សហការទប់ស្កាត់ជំងឺកូវីដជាមួយរដ្ឋាភិបាល ជាពិសេសរក្សាការងារកុំឱ្យបាត់បង់ ដែលនាំឱ្យប៉ះពាល់ដល់ជីវភាពខ្លួន។
និយាយត្រង់ចំណុចនេះ លោក ហេង សួរ បានលើកយកករណីកម្មករ ដែលនាំគ្នាស្រុកកំណើត ប្រឆាំងបម្រាមរដ្ឋាភិបាលថា កម្មករដែលបាត់បង់ការងារ ដោយសារការអនុវត្តផ្ទុយពីបម្រាមរដ្ឋ គឺមិនមែនជាកំហុសរដ្ឋាភិបាលទេ ព្រោះរដ្ឋក៏បានណែនាំពួកគេឱ្យយោគយល់ពីស្ថានការណ៍ជាក់ស្ដែងដែរ។ លោក ហេង សួរ ក៏ចាត់ទុកកម្មករដែលអនុវត្តផ្ទុយបម្រាមនេះ ថា ជាអ្នកក្លាហានខុសកាលៈទេសៈ។
ថ្លែងនៅក្នុងសន្និសីទកាសែត ស្តីពីបច្ចុប្បន្នភាពនៃការចត្តាឡីស័កកម្មករ នារសៀលថ្ងៃទី២៧ មេសា នៅទីស្តីការគណៈរដ្ឋមន្ត្រី លោក ហេង សួរ បានបញ្ជាក់ថា៖ «ចំពោះមុខនេះ ខ្ញុំគិតថាប្រហែលជាលើកទី១ហើយ ដែលបងប្អូនកម្មករនិយោជិតជាច្រើន ស្គាល់តម្លៃថា អ្វីទៅការងារ។ ឥឡូវនេះគ្រប់គ្នាយល់ហើយថា មានការងារសំខាន់ប៉ុណ្ណា។ កន្លងទៅនៅពេលដែលយើងនិយាយថា សូមឱ្យបងប្អូនរួមគ្នារក្សាឆ្នាំងបាយ រក្សាការងារ ពេលខ្លះយើងអត់យល់ថាស្អីទៅតម្លៃការងារនោះទេ។ តែឥឡូវនេះ នៅពេលពិភពលោកជួបវិបត្តិធ្ងន់ធ្ងរមួយ ការងារក៏ត្រូវបាត់គ្រប់ប្រទេស ក្នុងនោះក៏មានកម្ពុជាយើងផងដែរ។ ពេលនេះយើងប្រហែលជាស្គាល់តម្លៃទាំងអស់គ្នាថា ការរក្សាការងារ ការមានការងារធ្វើ វាសំខាន់ប៉ុណ្ណា»។
កម្មករជាង៥០០០នាក់ ត្រូវបានពិនិត្យសុខភាព ក្រោយត្រឡប់ពីស្រុកកំណើតវិញ បន្ទាប់ពីចប់ពិធីបុណ្យចូលឆ្នាំ។ ក្នុងចំណោមកម្មករទាំងនោះ មានកម្មករ១២៥នាក់ ដាក់ចត្តាឡីស័កកម្រិតពីរ (បន្ទប់ស្នាក់នៅតែម្នាក់) និងកម្មករ៩៧នាក់ទៀត ដាក់ដោយឡែកនៅបន្ទប់កម្រិតមួយ (បន្ទប់ មានគ្នាលើសពី២នាក់ទៅ) នៃវិទ្យាល័យជម្ពូវ័ន្ត ។ នេះជាការបញ្ជាក់របស់លោក ហេង សេង។
បើតាមអ្នកនាំពាក្យរូបនេះ បច្ចុប្បន្នរោងចក្រជាង១៣០ បានព្យួរការងារ ដែលនាំឱ្យប៉ះពាល់ដល់កម្មករ និយោជិតនៅកម្ពុជា ជិត១០ម៉ឺននាក់ ដោយសារការរាតត្បាតនៃជំងឺកូវីដ១៩(COVID-19)។ លោក ហេង សួរ បានបញ្ជាក់ថា ខាងភាគីរោងចក្រចង់បិទទ្វាររោងចក្រតែម្ដង ប៉ុន្តែដោយសារមានការពិភាក្សារកដំណោះស្រាយជាមួយរដ្ឋាភិបាល ទើបថៅកែរោងចក្រសម្រេចចិត្ត ត្រឹមព្យួរការងារកម្មករសិន ដែលវាអាចផ្ដល់អត្ថប្រយោជន៍ខ្លះដល់ពួកគេ។
ក្រៅពីរកដំណោះស្រាយឱ្យភាគីរោងចក្រ រដ្ឋាភិបាលក៏ចូលរួមសម្របសម្រួលជាមួយភាគីអ្នកបញ្ជាទិញ ដើម្បីឱ្យពួកគេ អនុវត្ត និងរក្សានូវកិច្ចសន្យាបញ្ជាទិញ។ បើតាមលោក ហេង សួរ អ្នកបញ្ជាទិញយល់ព្រមបង់នូវអ្វីដែលពួកគេ បានចុះកុងត្រាក្នុងកិច្ចសន្យា ប៉ុន្តែគ្រាន់តែពួកគេ មិនទាន់ឱ្យកម្ពុជា នាំចូលទីផ្សាររបស់ពួកគេប៉ុណ្ណោះ ដោយសារបារម្ភពីបញ្ហាកូវីដ១៩។
មិនមែនតែកម្ពុជាទេ ដែលរងផលប៉ះពាល់ដោយសារជំងឺកូវីដ១៩ ពោលគឺបណ្ដាប្រទេសលើពិភពលោកទាំងអស់។ ដូច្នេះប្រជាពលរដ្ឋ និងកម្មករ ត្រូវរក្សាការងារឱ្យបានល្អ ដើម្បីបញ្ចៀសការបាត់បង់ ក្នុងកាលៈទេសៈដ៏លំបាកនេះ។ នេះជាការបញ្ជាក់របស់លោក ហេង សួរ។