COVID-19
ជាតិ
សង្គមជាតិ
អ្នកនាំពាក្យ៖ ក្រសួង ត្រូវការកិច្ចពិភាក្សាឲ្យល្អិតល្អន់ មុនសុំរដ្ឋាភិបាលបើកសាលាវិញ
× ដោយមើលឃើញថា ស្ថានភាពជំងឺកូវីដ-១៩ នៅកម្ពុជា លែងសូវអាក្រក់ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល សុំឲ្យលោក ហង់ ជួន ណារ៉ុន រដ្ឋមន្ត្រីក្រសួងអប់រំ ពិនិត្យពីការសុំគោលការណ៍ទៅរដ្ឋាភិបាល ដើម្បីបើកសាលារៀនឡើងវិញ។
ក្នុងសន្និសីទស្តីពីបច្ចុប្បន្នភាពនៃជំងឺកូវីដ-១៩នៅកម្ពុជា កាលពីថ្ងៃទី២៧ ខែមេសា ឆ្នាំ២០២០ លោក ម៉ម ប៊ុនហេង បានប្រាប់អ្នកកាសែតថា លោក បានជួបពិភាក្សាជាមួយរដ្ឋមន្ត្រីអប់រំ ហើយក៏បានសុំឲ្យពិចារណាពីការបើកសាលារៀនឡើងវិញ។
យ៉ាងណា ក្រសួងអប់រំ នៅតែមិនទាន់អាចកំណត់ពេលបើកសាលារៀនវិញឡើយ។ នេះបើតាមលោក ឌី ខាំបូលី អ្នកនាំពាក្យក្រសួងអប់រំ ដែលប្រាប់សារព័ត៌មានថ្មីៗ តាមបណ្តាញទំនាក់ទំនងតេឡេក្រាម នៅថ្ងៃទី២៨ ខែមេសា ឆ្នាំ២០២០។
លោក សង្កត់ធ្ងន់ដូច្នេះថា៖«រឿងនេះ ត្រូវការការពិភាក្សាឲ្យបានល្អិតល្អន់ និងគ្រប់ជ្រុងជ្រោយបន្ថែមទៀតរវាងក្រសួងអប់រំ យុវជន និង កីឡា និងក្រសួងសុខាភិបាល មុនពេលធ្វើសំណើណាមួយទៅកាន់រាជរដ្ឋាភិបាល។ ក្រសួងទាំងពីរ ទាក់ទងគ្នា និងដោះដូរយោបល់គ្នាជាប្រចាំលើបញ្ហានេះ»។
វា មានរយៈពេលជិត២ខែហើយ ដែលកម្ពុជា បិទសាលារៀននៅទូទាំងប្រទេស។ មិនមែនតែសាលារៀនទេ ព្រះបរមរាវាំង និង សារមន្ទីរ ក៏ត្រូវបិទ មិនឲ្យភ្ញៀវចូលទស្សនាដែរ ហើយការប្រគំតន្ត្រីនិងការជួបជុំក្នុងសាសនា ត្រូវបានផ្អាក។ លើសពីនេះ រដ្ឋាភិបាល ថែមទាំងបានបិទអាជីវកម្មនានាជាបណ្តោះអាសន្ន ដូចជា កាស៊ីណូ ខារ៉ាអូខេ ក្លិបកម្សាន្ត ប៊ីហ្កាឌិន រោងកុន កន្លែងម៉ាស្សា-ស្ប៉ា និង កន្លែងហាត់ប្រាណ ជាដើម។
ការបិទទាំងអស់នេះ ស្ថិតក្រោមហេតុផលតែមួយ គឺទប់ស្កាត់ការរាលត្បាតជំងឺកូវីដ-១៩ ហើយនឹងបើកឲ្យដំណើរការឡើងវិញ នៅពេលណា រដ្ឋាភិបាល ពិចារណាឃើញថា ស្ថានភាពជំងឺកូវីដ-១៩ លែងបង្កហានិភ័យដល់កម្ពុជា។
គិតត្រឹមថ្ងៃទី២៨ ខែមេសា កម្ពុជា ព្យាបាលអ្នកជំងឺកូវីដ-១៩ ឲ្យជាសះស្បើយ១១៩នាក់ហើយ ដោយនៅសល់តែ៣នាក់ទៀតប៉ុណ្ណោះ ដែលកំពុងសម្រាកព្យាបាល៕
Tag:
COVID-19
បើកសាលារៀន
© រក្សាសិទ្ធិដោយ thmeythmey.com