COVID-19
អន្តរជាតិ
អាមេរិក មានអ្នកស្លាប់ដោយសារ COVID-19 ច្រើនជាងទាហានអាមេរិកស្លាប់ក្នុងសង្គ្រាមវៀតណាម
× ចំនួនអ្នកស្លាប់ដោយសារជំងឺ COVID-19 នៅអាមេរិក គិតត្រឹមថ្ងៃទី២៨ ខែមេសា មានចំនួន ៥៩,២៦៦នាក់។ តួលេខនេះ គឺច្រើនជាងចំនួនទាហានអាមេរិក ដែលស្លាប់ក្នុងសង្គ្រាមវៀតណាម ដែលមាន៥៨,២២០នាក់។ អ្នកឆ្លង COVID-19 សរុបមានដល់ទៅ ១,០៣៥,៧៦៥នាក់។
ចំនួនអ្នកឆ្លងជំងឺ COVID-19 នៅអាមេរិក កើនឡើងមួយជាពីរ ក្នុងរយៈពេល១៨ថ្ងៃ។ ចំនួនអ្នកឆ្លងទាំងជាងមួយលាននាក់នេះ តំណាងឲ្យ១ភាគ៣ នៃចំនួនអ្នកឆ្លងនៅជុំវិញពិភពលោក។ ប៉ុន្តែមន្ត្រីសុខាភិបាលសាធារណៈរបស់អាមេរិក ព្រមានថា ចំនួនអ្នកឆ្លងពិតប្រាកដ អាចមានច្រើនជាងនេះ ព្រោះការធ្វើតេស្តនៅមានកម្រិត ដោយសារខ្វះអ្នកជំនាញ និងឧបករណ៍។
រដ្ឋញូវយ៉ក ដែលជាកន្លែងផ្ទុះជំងឺ COVID-19 ខ្លាំងក្លាមួយនៅអាមេរិក មានករណីឆ្លង ៣០ភាគរយ នៃករណី COVID-19 ទាំងអស់នៅអាមេរិក។ រដ្ឋមួយចំនួនទៀត ក៏មានចំនួនច្រើនដែរ ដូចជារដ្ឋញូវជឺស៊ី រដ្ឋម៉ាសាឈូសេត រដ្ឋកាលីហ្វ័រនីញ៉ា និងរដ្ឋផេនស៊ីលវ៉ានីជាដើម។
យោងតាមគម្រោងព្យាករណ៍របស់សាកលវិទ្យាល័យវ៉ាស៊ីនតោន ដែលតែងត្រូវបានមន្ត្រីសេតវិមានដកស្រង់ ចំនួនអ្នកស្លាប់ដោយសារជំងឺ COVID-19 នៅអាមេរិក អាចនឹងច្រើនជាង៧៤,០០០នាក់ នៅខែសីហាខាងមុខ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
យ៉ាងណាមិញ មជ្ឈមណ្ឌលគ្រប់គ្រង និងបង្កាជំងឺឆ្លង (CDC) បញ្ជាក់ថា ចំនួនអ្នកស្លាប់ដោយសារ COVID-19 នៅអាមេរិក អាចនឹងតិចជាង១សែនករណី ដែលចំនួននេះ គឺតិចជាងចំនួនអ្នកស្លាប់ ដោយសារជំងឺគ្រុនផ្តាសាយនៅឆ្នាំ១៩៦៧ និងជំងឺគ្រុនផ្តាសាយអេស្ប៉ាញនៅឆ្នាំ១៩១៨ ដែលបានឆក់យកជីវិតមនុស្សនៅអាមេរិក ចំនួន៦៧៥,០០០នាក់។ បន្ថែមពីនេះ រដ្ឋមួយចំនួនធំ អាចរួចផុតការឆ្លងទ្រង់ទ្រាយធំ ខណៈរដ្ឋចំនួន៧ទៀត រំពឹងថានឹង មានការឆ្លងទ្រង់ទ្រាយធំនៅប៉ុន្មានសប្តាហ៍ខាងមុខ។
ដើម្បីកាត់បន្ថយចំនួនអ្នកឆ្លង អាមេរិកបានតម្រូវឲ្យប្រជាពលរដ្ឋស្នាក់នៅផ្ទះ ប៉ុន្តែវិធានការនេះ នាំឲ្យប៉ះពាល់ដល់សកម្មភាពសេដ្ឋកិច្ចយ៉ាងខ្លាំង ដោយបណ្តាលឲ្យមនុស្សបាត់បង់ការងារធ្វើ។ ក្នុងរយៈពេល៥សប្តាហ៍ចុងក្រោយ មានមនុស្ស២៦,៥លាននាក់ ស្វែងរកថវិកា សម្រាប់អ្នកគ្មានការងារធ្វើពីរដ្ឋាភិបាល៕
© រក្សាសិទ្ធិដោយ thmeythmey.com