ចិន កំណត់ថ្ងៃប្រជុំសភាថ្មី ក្រោយលើកពេលដោយសារ COVID-19

COVID-19

អន្តរជាតិ

ចិន កំណត់ថ្ងៃប្រជុំសភាថ្មី ក្រោយលើកពេលដោយសារ COVID-19

29, Apr 2020 , 10:59 pm

រូបភាព

តំណាងរាស្រ្តចិន ដើរចូលសាល Great Hall of the People នាកិច្ចប្រជុំពេញអង្គលើកទីពីរ នៃសភាប្រជាជនចិន នីតិកាលទី១៣ នាថ្ងៃទី៥ ខែមីនា ឆ្នាំ ២០១៩។ រូបភាព៖ Xinhua

ដោយ: ធៀន ភារិន្ទ

ទីក្រុងប៉េកាំង បានកំណត់ពេលកិច្ចប្រជុំសភាទាំងពីររបស់ខ្លួន ដែលគ្រោងធ្វើនៅខែឧសភាខាងមុខ។ ការកំណត់កាលបរិច្ឆេទថ្មី ធ្វើឡើងបន្ទាប់ពីស្ថានភាព ជំងឺរលាកសួត ដែលបង្កដោយកូរ៉ូណាវីរុស (COVID-19) នៅក្នុងប្រទេសមានភាពធូរស្រាល។ នេះបើតាមការចុះផ្សាយរបស់ទីភ្នាក់ងារព័ត៌មាន Xinhua នាថ្ងៃទី២៩ ខែមេសា។

តាមរយៈសេចក្តីសម្រេចរបស់គណៈកម្មការអចិន្ត្រៃយ៍ជាតិចិន កិច្ចប្រជុំពេញអង្គលើកទីបី នៃកិច្ចប្រជុំសភាប្រជាជនចិន (NPC) នីតិកាលទី១៣ នឹងត្រូវធ្វើឡើង នៅថ្ងៃទី២២ ខែឧសភា។ សេចក្តីសម្រេចនេះ ធ្វើឡើង បន្ទាប់ពីស្ថានភាពនៅក្នុងប្រទេសចិន បានចុះថមថយ ហើយអាជ្ញាធរអាចគ្រប់គ្រងស្ថានការណ៍បាន។

ចំណែកកិច្ចប្រជុំសភាពិគ្រោះយោបល់វិញ នឹងចាប់ផ្ដើមនៅថ្ងៃទី២១ ខែឧសភា។ នេះបើតាមការសម្រេចរបស់គណៈកម្មការធិការរបស់សភានេះ ដែលផ្សាយដោយ Xinhua ។

បើតាម Xinhua ស្ថានភាពធូរស្រាលក្នុងប្រទេស កើតចេញពីកិច្ចខិតខំ និងភាពការដឹកនាំរបស់ប្រធានាធិបតីចិន ស៊ី ជិនភីង, គណៈមជ្ឈិមបក្សកុម្មុយនិស្តចិន និងប្រជាជនចិន ក្នុងការបង្ក្រាបជំងឺរលាកសួតប្រភេទថ្មីនេះ ឲ្យស្ថិតក្រោមការគ្រប់គ្រងបាន។

ជាធម្មតា កិច្ចប្រជុំសភា ដែលមានវត្តមានសមាជិកសភាប្រមាណជិត៣០០០នាក់ តែងតែប្រជុំនៅខែមីនា ក្នុងវិមានប្រជាជន នាទីក្រុងប៉េកាំង ដើម្បីជជែកពីគោលនយោបាយរបស់ប្រទេស បញ្ហាប្រឈមនាពេលកន្លង ការធ្វើកំណែទម្រង់ផ្សេងៗ បញ្ហាសេដ្ឋកិច្ចជាដើម ។ ប៉ុន្តែដោយសារ COVID-19 កិច្ចប្រជុំសភាទាំងពីរ ត្រូវបានប្រកាសលើកពេលវិញ

គិតមកត្រឹមពេលនេះ ចិនមានករណី COVID-19 សរុបចំនួន ៨២៨៥៨ករណី និងអ្នកស្លាប់ចំនួន ៤៦៣៣នាក់។ ចំណែកករណីជាសះស្បើយនៅក្នុងប្រទេសចិនវិញ មានចំនួន ៧៧៥៧៨ករណី៕