កូរ៉េខាងត្បូង គ្មានករណីឆ្លងក្នុងស្រុកជាលើកដំបូងគិតតាំងពីខែកុម្ភៈ

COVID-19

អន្តរជាតិ

កូរ៉េខាងត្បូង គ្មានករណីឆ្លងក្នុងស្រុកជាលើកដំបូងគិតតាំងពីខែកុម្ភៈ

30, Apr 2020 , 9:38 am

រូបភាព

ក្រុមគូ្រពេទ្យកូរ៉េខាងត្បូងនៅឯមន្ទីរពេទ្យមួយក្នុងទីក្រុង Daegu ។ រូបភាព AFP

ដោយ: តន ចាន់រិទ្ធារ៉ា

កូរ៉េខាងត្បូង នៅថ្ងៃទី៣០ ខែមេសា បានប្រកាសពីករណីឆ្លង COVID-19 ថ្មីចំនួន៤ ដែលសុទ្ធសឹងជាករណីនាំចូលទាំងអស់។ នេះជាលើកដំបូងដែលកូរ៉េខាងត្បូងគ្មានការឆ្លងក្នុងស្រុកគិតតាំងពីខែកុម្ភៈមក។ តួលេខសរុបនៃការឆ្លង COVID-19 នៅកូរ៉េខាងត្បូងមានប្រមាណមួយម៉ឺនករណីដដែល ជាមួយនឹងការថយចុះករណីឆ្លងប្រចាំថ្ងៃ។

៤ករណីដែលជាករណីឆ្លងពីក្រៅប្រទេស នាំឲ្យចំនួនអ្នកឆ្លង COVID-19 នៅកូរ៉េខាងត្បូងឡើងដល់១០៧៦៥នាក់។ តួលេខនេះ ជាចំនួនតិចតួចមួយបើប្រៀបធៀបនឹងប្រទេសផ្សេងនៅអឺរ៉ុបជាដើម ព្រោះកូរ៉េខាងត្បូង ជាប្រទេសមានករណីឆ្លងច្រើនទីពីរបន្ទាប់ពីចិន ក្រោយ COVID-19 ទៅដល់ប្រទេសនេះនៅចុងខែកុម្ភៈ។ ប៉ុន្តែប្រទេសមានករណីឆ្លងក្រោយៗ មានចំនួនឆ្លងសរុបលើមួយសែននាក់ទៅហើយដូចជាអ៊ីតាលី បារាំង និងអាមេរិកជាដើម។

បួនករណីថ្មីនេះ ក៏ជាករណីឆ្លងប្រចាំថ្ងៃទាបបំផុតដែរនៅកូរ៉េខាងត្បូង ខណៈតួលេខរាយការណ៍ប្រចាំថ្ងៃខ្ពស់បំផុត គឺ៩០៩នាក់។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។ ក្នុងចំណោមករណីឆ្លងទាំងអស់ អ្នកស្លាប់មានចំនួន២៤៧នាក់ ដែលជាចំនួនមួយតិចបំផុតប្រៀបធៀបនឹងប្រទេសផ្សេង ខណៈអ្នកសះស្បើយមានចំនួន៩០៥៩ ដែលក៏ជាតួលេខខ្ពស់បំផុតមួយដែរ បើប្រៀបធៀបនឹងអត្រាឆ្លងសរុប។

ទោះករណីឆ្លងថ្មីធ្លាក់ចុះក្ដី អាជ្ញាធរកូរ៉េខាងត្បូង នៅតែប្រុងប្រយ័ត្នដដែល ពិសេសការបន្តអនុវត្តគម្លាតសុវត្ថិភាព ស្របពេលដែលប្រជាជនកូរ៉េខាងត្បូងចាប់ផ្ដើមសកម្មភាពរបស់ខ្លួនឡើងវិញបន្ទាប់ពីអាជ្ញាធរបន្ធូរបន្ថយការរឹតត្បិត។ ក្ដីបារម្ភនៅតែមានចំពោះការធ្វើដំណើរកម្សាន្តក្នុងស្រុករបស់ប្រជាជនកូរ៉េខាងត្បូងអំឡុងពេលសប្ដាហ៍ឈប់សម្រាកខាងមុខ។ ទោះជាយ៉ាងណា បើករណីឆ្លងនៅតែទាបបែបនេះ រដ្ឋាភិបាលកូរ៉េខាងត្បូង ក៏គិតគូរលែងអនុវត្តគម្លាតសុវត្ថិភាពនេះដែរ។

ការឆ្លងពីក្រៅប្រទេស នៅតែជាបញ្ហាឈឺក្បាលសម្រាប់កូរ៉េខាងត្បូង។ ក្នុងចំណោមអ្នកឆ្លងទាំងអស់ ករណីនាំចូល COVID-19 មានចំនួន១០៦៥ផងដែរ៕