COVID-19
ជាតិ
UNICEF៖ កុមារ និងក្មេងជំទង់ជាង៣២០លាននាក់រងផលប៉ះពាល់ ដោយសារការបិទសាលារៀន ព្រោះកូវីដ១៩
រូបពីអង្គការ UNICEF
×![]()
ភ្នំពេញ៖ កុមារ និងក្មេងជំទង់ជាង៣២០លាននាក់រងផលប៉ះពាល់ ដោយសារការបិទសាលារៀន នៅក្នុងតំបន់អាស៊ីបូព៌ា និងប៉ាស៊ីហ្វិក ព្រោះតែវិបត្តិនៃជំងឺឆ្លងកូវីដ១៩។ នេះបើតាមរបាយការណ៍របស់អង្គការUNICEF ។
ការរាតត្បាតជាសកលនៃជំងឺកូវីដ១៩ ធ្វើឱ្យកុមារត្រូវស្នាក់នៅផ្ទះ និងមិនបានទៅរៀន។ កុមារ និងយុវជនជាច្រើនកំពុងចំណាយពេលភាគច្រើនរបស់ខ្លួនលើប្រព័ន្ធអនឡាញ និងកំពុងប្រឈមនឹងហានិភ័យនៃការរំលោភបំពាន។
អ្នកស្រី រ៉ាឈែល ហាវី ទីប្រឹក្សាថ្នាក់តំបន់ផ្នែកកិច្ចការពារកុមារនៃការិយាល័យយូនីសេហ្វប្រចាំអាស៊ីបូព៌ា និងប៉ាស៊ីហ្វិក បានមានប្រសាសន៍ថា៖«សម្រាប់កុមារ និងក្មេងជំទង់ជាច្រើននាក់ ការចំណាយពេលអនឡាញ គឺជាការបន្តទំនាក់ទំនងក្នុងសង្គម និងជាមធ្យោបាយសម្រាប់បន្តទទួលបានការអប់រំ។ ខណៈពេលដែលវិធីសាស្ត្រនេះមានសារៈសំខាន់ ការចំណាយពេលកាន់តែច្រើនតាមប្រព័ន្ធអនឡាញ បានធ្វើឱ្យពួកគេកាន់តែងាយទទួលរងការរំលោភបំពាន និងការកេងប្រវ័ញ្ចតាមប្រព័ន្ធអនឡាញផងដែរ»។
បើតាមអង្គការ UNICEF កុមារ និងមនុស្សវ័យក្មេងជាង ៣២០លាននាក់ រងផលប៉ះពាល់ ដោយសារការបិទសាលារៀននៅតំបន់អាស៊ីបូព៌ា និងប៉ាស៊ីហ្វិកនេះ។ របាយការណ៍អង្គការដដែលបានបញ្ជាក់ថា កុមារជាច្រើននាក់ ដែលកំពុងរៀនសូត្រ និងទំនាក់ទំនងជាមួយអ្នកដទៃក្នុងសង្គមកាន់តែច្រើន តាមប្រព័ន្ធអនឡាញនេះ ងាយរងការកេងប្រវ័ញ្ចផ្លូវភេទ និងការល្បួងតាមប្រព័ន្ធអនឡាញ ដ្បិតជនដែលប្រព្រឹត្តិអំពើបែបនេះ ព្យាយាមទាញប្រយោជន៍ពីការរាតត្បាតជាសកលនៃជំងឺកូវីដ១៩។
ចំណែកការខ្វះទំនាក់ទំនងផ្ទាល់ជាមួយនឹងមិត្តភក្តិ និងដៃគូ អាចធ្វើឱ្យកុមារកាន់តែហ៊ានប្រថុយប្រថាន ដូចជាប្រថុយផ្ញើរូបភាពដែលមានលក្ខណៈផ្លូវភេទ ។ម្យ៉ាងទៀត ការចំណាយពេលតាមប្រព័ន្ធអនឡាញកាន់តែច្រើនដោយគ្មានការគ្រប់គ្រងត្រឹមត្រូវ អាចធ្វើឱ្យកុមារអាចមើលឃើញរូបភាព និងវីដេអូដែលមានលក្ខណៈហិង្សា និងអាចបង្កការឈឺចាប់ ក៏ដូចជាកាន់តែប្រឈមនឹងការសម្លុតគំរាមតាមប្រព័ន្ធអនឡាញជាដើម។ នេះជាការបញ្ជាក់របស់អង្គការUNICEF។
អង្គការUNICEF បានសង្កត់ធ្ងន់ថា ឪពុកម្ដាយ និងអាណាព្យាបាល អាចមានការលំបាកក្នុងការជួយ និងតាមដានកូនៗរបស់ខ្លួន ជាពិសេសការតាមដានសកម្មភាពតាមអនឡាញរបស់កូនជាដើម។ លោកប៉ាទ្រីក ប៊ើតុន អ្នកជំនាញមកពីមជ្ឈមណ្ឌល CJCP បានមានប្រសាសន៍ថា៖«ក្រៅពីបញ្ហាដែលនាំឱ្យមានភាពតានតឹង និងភាពមិនប្រាកដប្រជាខាងផ្នែកសេដ្ឋកិច្ច និងសង្គម បច្ចុប្បន្នឪពុកម្ដាយ និងអាណាព្យាបាល ត្រូវជួបប្រទះនឹងបញ្ហាប្រឈមបន្ថែមមួយទៀត ក្នុងការរក្សាសុវត្ថិភាពកូនៗតាមប្រព័ន្ធអនឡាញ ដោយសារតែពួកគេមានចំណេះដឹង និងជំនាញបច្ចេកទេសតិចតួចក្នុងផ្នែកនេះ។ ស្របពេលដែលនេះជាបញ្ហាមួយដ៏លំបាក វាក៏អាចជាឱកាសមួយដ៏សំខាន់ ដើម្បីចាប់ផ្ដើមការសន្ទនាជាមួយកូនអំពីវិធីសាស្ត្រដែលល្អបំផុត ដើម្បីរក្សាសុវត្ថិភាពរបស់ពួកគេតាមប្រព័ន្ធអនឡាញផងដែរ»។
ដើម្បីធានាឱ្យកុមារនៅតែមានសុវត្ថិភាពតាមប្រព័ន្ធអនឡាញ និងទទួលបានបទពិសោធន៍វិជ្ជមាននៅក្នុងអំឡុងពេលនៃការរាតត្បាតនៃជំងឺកូវីដ១៩នេះ ឪពុកម្ដាយ និងអាណាព្យាបាល ត្រូវនិយាយទៅកាន់កូនៗអំពីសុវត្ថិភាពតាមប្រព័ន្ធអនឡាញ, ស្វែងយល់ពីឧបករណ៍រក្សាសុវត្ថិភាពតាមប្រព័ន្ធអនឡាញ ,ស្វែងយល់ពីហានិភ័យ ដែលកុមារអាចជួបប្រទះនៅពេលប្រើប្រាស់ប្រព័ន្ធអនឡាញ ។ ជាពិសេសសម្គាល់ពីសញ្ញាពិបាកចិត្ត ដែលកើតចេញពីការប្រើប្រាស់ប្រព័ន្ធអនឡាញ និងដឹងពីកន្លែងស្វែងរកជំនួយ។
កាលពីសប្ដាហ៍មុន អង្គការUNICEF ក៏បានចេញសេចក្តីណែនាំម្ដងហើយ ដើម្បីផ្សព្វផ្សាយឱ្យរដ្ឋាភិបាល ក្រុមហ៊ុនបច្ចេកវិទ្យា អ្នកអប់រំ និងឪពុកម្ដាយ ចេះសម្គាល់និងចាត់វិធានការបន្ទាន់ ដើម្បីកាត់បន្ថយហានិភ័យ ដែលកុមារអាចជួបប្រទះនៅពេលដែលពួកគេប្រើប្រាស់ប្រព័ន្ធអនឡាញ ក្នុងអំឡុងពេលនៃការរាតត្បាតជាសកលនៃជំងឺកូវីដ១៩៕
Tag:
COVID-19
អប់រំ
© រក្សាសិទ្ធិដោយ thmeythmey.com
