COVID-19
អន្តរជាតិ
COVID-19៖ ក្រោយស្ងាត់ជិត២០ថ្ងៃ យេម៉ែនមាន៥ករណីទៀតក្នុងនោះស្លាប់២នាក់ រូបថត AFP
× យេម៉ែនបានរកឃើញករណីឆ្លង COVID-19 ដំបូងកាលពីថ្ងៃទី១០ ខែមេសា ដែលជាជនបរទេសម្នាក់ធ្វើដំណើរពីអេមីរ៉ាតអារ៉ាប់រួម ក្រោយមកអ្នកជំងឺបានជាសះស្បើយ។ ប៉ុន្តែកាលពីថ្ងៃពុធ ពោលគឺជិត២០ថ្ងៃ ក្រោយស្ថានភាពស្ងប់ស្ងាត់ ក្រសួងសុខាភិបាលនៃប្រទេសដែលកំពុងញាំញីដោយសង្គ្រាមស៊ីវិលមួយនេះ បានប្រកាសពីការរកឃើញ៥ករណីបន្ថែមទៀត ដែលក្នុងនោះមាន២នាក់ស្លាប់។
ករណីឆ្លង COVID-19 ថ្មី ទាំង៥ករណី ត្រូវបានតេស្តឃើញនៅទីក្រុងកំពង់ផែ Aden។ ក្នុងចំណោមករណីថ្មីទាំងនោះ មាន២នាក់ស្លាប់ និង៣នាក់ទៀត ស្ថិតក្រោមការព្យាបាលដាច់ដោយឡែកនៅមន្ទីរពេទ្យ។
លោក Jamal Khadabakhish នាយកផ្នែកសុខភាពសាធារណៈ បានអះអាងប្រាប់សារព័ត៌មានប្រចាំតំបន់មជ្ឈឹមបូព៌ា The National ថា មនុស្សជាច្រើនទៀត មានអាការសុខភាពមិនប្រក្រតី ត្រូវបានយកសំណាកទៅធ្វើតេស្ត រីឯអ្នកពាក់ព័ន្ធផ្សេងទៀតជាមួយអ្នកជំងឺ ត្រូវបានដាក់នៅក្រោមវិធានចត្តាឡីស័ក។
ករណីដំបូងដែលត្រូវបានតេស្តឃើញនៅខេត្ត Hadramawt បានជាសះស្បើយ។ រីឯករណីទាំង៥ថ្មី ត្រូវបានអះអាងថា សុទ្ធតែរកឃើញនៅក្នុងស្រុក Al Mansourah ភាគខាងជើងក្រុង Aden។ «ករណីស្លាប់ពីរនាក់ដំបូង ជាបុរសបងប្អូនបង្កើតនឹងគ្នា។ ពួកគាត់មានការចុកចាប់ផ្លូវដង្ហើមធ្ងន់ធ្ងរ និងកំដៅខ្ពស់»។ នេះបើតាមការអះអាងរបស់មន្ត្រីសុខាភិបាលប្រចាំតំបន់។
ថ្នាក់ដឹកនាំមន្ទីរពេទ្យឯកជននៅតំបន់ Al Mansourah ដែលទទួលព្យាបាលអ្នកជំងឺ COVID-19 នោះ បានអះអាងថា មិនទាន់បានត្រៀមខ្លួនពេញលេញនោះឡើយ ដោយមន្ទីរពេទ្យខ្វះសម្ភារការពារ និងវិធានការផ្សេងៗនៅក្នុងបន្ទប់សង្គ្រោះបន្ទាន់។
យេម៉ែន ជាប្រទេសចុងក្រោយគេក្នុងចំណោមប្រទេស និងដែនដីជាង២១០ដែលមានករណីឆ្លង COVID-19។ គិតត្រឹមរសៀលថ្ងៃទី៣០ ខែមេសា នេះ មនុស្សជាង៣.២លាននាក់នៅលើពិភពលោក ឆ្លង COVID-19 ក្នុងនោះស្លាប់ជិត២៣ម៉ឺននាក់ និងសះស្បើយជាង១លាននាក់៕
© រក្សាសិទ្ធិដោយ thmeythmey.com