លោក សេង សុមុនី ៖ ព្រះសង្ឃអាចមានហានិភ័យខ្ពស់ ក្នុងដំណាក់កាលកូវីដ១៩

COVID-19

ជាតិ

លោក សេង សុមុនី ៖ ព្រះសង្ឃអាចមានហានិភ័យខ្ពស់ ក្នុងដំណាក់កាលកូវីដ១៩

01, May 2020 , 10:39 am

រូបភាព

លោក សេង សុមុនី អ្នកនាំពាក្យក្រសួងធម្មការនិងសាសនា ថ្លែងក្នុងសន្និសីទកាសែតស្តីពីបច្ចុប្បន្នភាព នៃការប្រយុទ្ធប្រឆាំងជំងឺកូវីដ១៩ របស់សហគមន៍ពុទ្ធសាសនា កាលពីថ្ងៃទី៣០ មេសា

ដោយ: ប៉ូ សាគុន

ភ្នំពេញ៖ ការឆាន់ចង្ហាន់រួម ស្នាក់នៅរួម ប្រើប្រាស់សម្ភាររួម គឺជាដើមចមនាំឱ្យព្រះសង្ឃស្ថិតក្នុងស្ថានភាពហានិភ័យខ្ពស់ នៃវិបត្តិកូវីដ១៩។ ទោះជាយ៉ាងណា លោក សេង សុមុនី អ្នកនាំពាក្យក្រសួងធម្មការនិងសាសនា បានបញ្ជាក់ថា ព្រះសង្ឃនៅគ្រប់វត្តអារាមក្នុងប្រទេសកម្ពុជា បានប្រតិបត្តិការប្រុងប្រយ័ត្នខ្ពស់ ក៏ដូចជាការធ្វើអនាម័យយ៉ាងខ្ជាប់ខ្ជួន ដើម្បីការពារកូវីដ១៩។

លោក សេង សុមុនី បានពន្យល់ពីហេតុដែលនាំឱ្យព្រះសង្ឃ ស្ថិតក្នុងគោលដៅប្រឈមខ្ពស់ ពីកូវីដ១៩ យ៉ាងដូច្នេះ៖«ក្នុងមួយវត្តៗព្រះសង្ឃមានចំនួន៣០០អង្គឬ៥០០អង្គគង់នៅរួមគ្នា ហើយមានសិស្សនិស្សិតស្នាក់នៅក្នុងវត្ត ដោយវត្តខ្លះមានដល់ទៅ៥០០នាក់ ខ្លះជិត១,០០០នាក់ផង នេះជាបញ្ហាមួយ។ ម្យ៉ាងទៀតព្រះសង្ឃឆាន់ចង្ហាន់រួមគ្នានៅក្នុងសាលាឆាន់។ បញ្ហាមួយទៀតគឺការប្រើប្រាស់ សម្ភាររួមគ្នាដូចជាទឹក និងសម្ភារផ្សេងៗទៀត។ ដូច្នេះព្រះសង្ឃមានការប្រឈមខ្ពស់»។

ក្នុងសន្និសីទសារព័ត៌មានលោក សេង សុមុនី អ្នកនាំពាក្យក្រសួងធម្មការនិងសាសនា បានបញ្ជាក់ថា បើទោះបីជាព្រះសង្ឃស្ថិតក្នុងមុខសញ្ញាមានហានិភ័យខ្ពស់ ពីកូវិដ១៩ក៏ដោយ ប៉ុន្តែរហូតមកដល់ពេលបច្ចុប្បន្ន ពុំមានព្រះអង្គណាមួយមានផ្ទុកកូវីដ១៩ឡើយ។ ចំណែកគណៈសង្ឃគ្រប់ឋានានុក្រម បានរៀបចំរចនាសម្ព័ន ទាំងថ្នាក់ជាតិ និងក្រោមជាតិ ដើម្បីផ្សព្វផ្សាយពីព័ត៌មាន និងការការពារកូវីដ១៩ ទៅដល់ព្រះសង្ឃគ្រប់វត្តអារាម។

ទោះជាយ៉ាងណា ការធ្វើបុណ្យនៅតាមភូមិ ឬសហគមន៍សាសនា ព្រះសង្ឃនៅតែអាចនិមន្តទៅចូលរួមបានដដែល គ្រាន់តែការធ្វើពិធីបុណ្យនោះត្រូវធ្វើក្នុងទ្រង់ទ្រាយតូច។ ចំណែកការនិមន្តបិណ្ឌបាត នៅតាមភូមិ ព្រះសង្ឃក៏នៅតែអាចប្រព្រឹត្តបានធម្មតា ក៏ប៉ុន្តែត្រូវនិមន្តបិណ្ឌដោយរក្សានូវគម្លាត ក៏ដូចជាការប្រុងប្រយ័ត្នខ្ពស់ដែរ។ ចំពោះពុទ្ធបរិស័ទដែលដាក់បាទព្រះសង្ឃ ក៏ត្រូវអនុវត្តន៍ ការប្រុងប្រយ័ត្នខ្ពស់ដូចគ្នា។ នេះជាអ្វីដែលលោក សេង សុមុនី អ្នកនាំពាក្យក្រសួងធម្មការ និងសាសនា បានបញ្ជាក់បន្ថែម៕