COVID-19
ជាតិ
×![]()
ដោយ: ថ្មីៗ
ប្រមុខរដ្ឋាភិបាលកម្ពុជាក៏ចូលរួមអបអរសាទរទិវាសេរីភាពសារព័ត៌មានពិភពលោក ៣ឧសភាឆ្នាំ២០២០នេះដែរ។ វាជាឱកាសសម្រាប់សម្តេចនាយករដ្ឋមន្ត្រីផ្ញើសារឡើងវិញអំពីជំហររបស់រដ្ឋាភិបាលក្នុងការគាំទ្រសារព័ត៌មានសេរី ដែលមានការទទួលខុសត្រូវ និងបានអំពាវនាវឱ្យសារព័ត៌មានចូលរួមផ្សព្វផ្សាយព័ត៌មានពិតស្តីពីជំងឺកូវីដ-១៩។
នាយករដ្ឋមន្ត្រីកម្ពុជាសម្តេច ហ៊ុន សែន បានប្រកាសយ៉ាងច្បាស់សារជាថ្មីម្តងទៀតថា រដ្ឋាភិបាលរបស់សម្តេច គាំទ្រសិទ្ធិបញ្ចេញមតិ សេរីភាពខាងសារព័ត៌មាន និងឯករាជ្យភាពនៃការផ្សាយព័ត៌មាន។ សេចក្តីថ្លែងការណ៍របស់ប្រមុខរដ្ឋាភិបាល ត្រូវបានធ្វើឡើងសម្រាប់ឱកាសនៃទិវាសេរីភាពសារព័ត៌មានពិភពលោក ថ្ងៃទី៣ឧសភា។ នៅក្នុងសេចក្តីថ្លែងការណ៍នោះ សម្តេច ហ៊ុន សែន ក៏ត្រូវការភាពខ្លាំងពីសារព័ត៌មានវិញដែរ ដោយសម្តេចបានសរសេរយ៉ាងដូច្នេះថា៖«រាជរដ្ឋាភិបាលកម្ពុជា ពិតជាត្រូវការស្ថាប័នសារព័ត៌មាន ដែលមានថាមពលប្រកបដោយការទទួលខុសត្រូវ និងមានភាពស្មោះត្រង់ ចំពោះវិជ្ជាជីវៈ ក្នុងការផ្សព្វផ្សាយព័ត៌មាន»។
ឆ្នាំនេះ គឺឆ្នាំទី២៧ ដែលអ្នកសារព័ត៌មានក្នុងពិភពលោក អបអរសាទរ ឬទាមទារសេរីភាព ក្នុងការប្រកបវិជ្ជាជីវៈរបស់ខ្លួន ក្រោមប្រធានបទ«សារព័ត៌មានដោយគ្មានភាពភ័យខ្លាច និងភាពទោរទន់» (Journalism without fear and favor)។
មិនខុសពីសារនានាឡើយ ពីប្រមុខរដ្ឋាភិបាលកម្ពុជា ការសាទរទិវាសេរីភាពសារព័ត៌មានឆ្នាំ២០២០ ត្រូវបានធ្វើឡើងដោយមិនភ្លេចបញ្ជាក់ អំពីសោកនាដកម្មនៃការឆ្លងរាតត្បាតនៃជំងឺរលាកផ្លូវដង្ហើមធ្ងន់ធ្ងរ ឬកូវីដ-១៩ នៅពាសពេញពិភពលោក ហើយដែលវាតម្រូវឱ្យមានការចូលរួមពីអ្នកសារព័ត៌មាន ឱ្យបានកាន់តែច្រើនលើសធម្មតា ដើម្បីផ្ញើសារអប់រំពលរដ្ឋរបស់ខ្លួនផង និងទប់ស្កាត់ព័ត៌មានក្លែងក្លាយផង។
នៅក្នុងសារលិខិតរបស់នាយករដ្ឋមន្ត្រី ផ្ញើទៅកាន់អ្នកកាសែត សម្តេច ហ៊ុន សែន បានគូសបញ្ជាក់ថា បើទោះជាការឆ្លងរាលដាលនៃជំងឺកូវីដ-១៩ មានលក្ខណៈកាចសាហាវ និងគ្រោះថ្នាក់ តែវាក៏មិនទាន់ធ្ងន់ធ្ងរ ដូចការផ្សព្វផ្សាយព័ត៌មានក្លែងបន្លំ នៅតាមប្រព័ន្ធផ្សព្វផ្សាយ និងនៅតាមបណ្តាញសង្គមនោះដែរ។
«ខ្ញុំសូមអំពាវនាវដល់បងប្អូនអ្នកសារព័ត៌មានទាំងអស់ ចូលរួមឱ្យបានសកម្មថែមទៀតក្នុងការប្រយុទ្ធប្រឆាំងនឹងព័ត៌មានក្លែងបន្លំ និងខិតខំបន្តផ្តល់ព័ត៌មាន អប់រំប្រជាពលរដ្ឋ ឱ្យពួកគេប្រុងប្រយ័ត្នជានិច្ច និងចៀសវាងការប្រមូលផ្តុំគ្នា។»។ នេះជាការបញ្ជាក់របស់សម្តេច ហ៊ុន សែន ដោយបានរំឮកដល់អ្នកកាសែត ឱ្យបន្ថែមការប្រុងប្រយ័ត្ន និងផ្ទៀងផ្ទាត់ព័ត៌មាន ឱ្យបានច្បាស់លាស់ មុននឹងផ្សព្វផ្សាយព័ត៌មាន ទាក់ទងនឹងជំងឺកូវីដ-១៩នេះ៕
Tag:
សារព័ត៌មាន
© រក្សាសិទ្ធិដោយ thmeythmey.com
