ភ្នំពេញ៖ អនុក្រឹត្យថ្មីស្ដីច្បាប់ចរាចរណ៍ផ្លូវគោក ត្រូវបានអគ្គស្នងការដ្ឋាននគរបាលជាតិ ចាប់ផ្ដើមរឹតបន្តឹងចាប់ពីថ្ងៃទី១ ឧសភាមក។ ការពិន័យ នឹងផ្តោតលើយានយន្តដែលប្រព្រឹត្តល្មើល គឺផ្តោតតែលើបទល្មើសចរាចរណ៍ដែលបង្កគ្រោះថ្នាក់ខ្ពស់ ក្នុងនោះមានបទល្មើសម៉ូតូនិងរថយន្តទាំង១៦ចំណុច។
លោក ហ៊ឹម យ៉ាន អគ្គស្នងការរងនៃអគ្គស្នងការដ្ឋាននគរបាលជាតិ បានបញ្ជាក់នៅក្នុងសន្និសីទសារព័ត៌មាន នៅទីស្ដីការគណៈរដ្ឋមន្រី្តកាលពីថ្ងៃទី៣០ មេសាថា នគរបាលបានកំណត់យកបទល្មើសចំនួន៧ចំណុច ក្នុងចំណោម៣៣ ដែលត្រូវត្រួតពិនិត្យមុនគេសម្រាប់ទោចក្រយានុន្ត ត្រីចក្រយានយន្ត ត្រីចក្រយានយន្តសណ្តោងរ៉ឺម៉ក និងម៉ូតូកង់បួន។ ចំណុចល្មើសទាំងនោះរួមមាន មិនពាក់មួកសុវត្ថិភាព,មិនគោរពភ្លើង និងផ្លាកសញ្ញាចរាចរណ៍, ល្មើសក្នុងការបត់ ការវ៉ាជែង, ការដឹកលើសចំណុះ,ស្រវឹង,គ្មានផ្លាកលេង និងប្រើទូរសព្ទពេលបើកបរដោយគ្មានឧបករណ៍ភ្ជាប់សំឡេង។
ចំណែកបទល្មើសរថយន្តមាន៩ ក្នុងចំណោម៤១ ដែលត្រូវត្រួតពិនិត្យ និងចាប់ផាកពិន័យមុនគេ គឺរួមមានល្មើសល្បឿន, ស្រវឹង, គ្មានបណ្ណបើកបរ, មិនគោរពភ្លើងសញ្ញា និងផ្លាកសញ្ញាចរាចរណ៍, ល្មើសក្នុងការបទ និងវ៉ាជែង, មិនពាក់ខ្សែក្រវាត់សុវត្ថិភាព, ដឹកលើសចំណុះ, គ្មានស្លាកលេខ និងបណ្ណសម្គាល់យានយន្ត និងនិយាយទូរស័ព្ទពេលបើកបរដោយគ្មានឧករណ៍ភ្ជាប់សំឡេង។
បើតាម អគ្គស្នងការរងនៃអគ្គស្នងការដ្ឋាននគរបាលជាតិបទស្មើសផ្សេងទៀត នឹងធ្វើឡើងនៅពេលខាងមុខ។
លោក ហ៊ឹម យ៉ាន ក៏អះអាងដែរថា សមត្ថកិច្ចក៏នឹងមិនឃាត់រថយន្តដែលបើកបរគោរពច្បាប់ នោះដែរ គឺឃាត់តែរថយន្តដែលមិនគោរពច្បាប់ប៉ុណ្ណោះ។ ការរឹតបន្តឹង ល៏មិនទាន់បញ្ចូលបទល្មើសរថយន្តផុតសុពលភាពឆៀកដែរ។
ម្ចាស់យានយន្ត ត្រូវដាក់តាមខ្លួននូវច្បាប់ដើមបណ្ណបើកបរ ហើយអ្នកធ្វើអាជីវកម្ម ត្រូវមានលិខិតអនុញ្ញាតធ្វើអាជីវកម្ម។ ចំណែកឯកសារផ្សេងទៀត អាចប្រើប្រាស់ឯកសារចម្លងបាន។
ចំពោះការពិន័យ គឺអាជ្ញាធរទុករយៈពេល១៥ថ្ងៃ ដើម្បីឲ្យអ្នកបើកបរល្មើសទៅបង់ប្រាក់ នៅតាមអធិការខណ្ឌនីមួយៗ។ ករណីលើសថ្ងៃកំណត់ នឹងត្រូវន័យទ្វេដង ហើយបើសិនជាមិនទៅបង់ប្រាក់ពិន័យទេ អាចប្រឈមនឹងការឡើងតុលាការ។នេះបើតាមការបញ្ជាក់បន្ថែមរបស់លោក ហ៊ឹម យ៉ាន។
សូមបញ្ជាក់ថា ករណីបទល្មើសម៉ូតូ៧ចំណុច ដែលត្រូវផាកពិន័យមាន មិនពាក់មួកសុវត្ថិភាពត្រូវផាក៦ម៉ឺនរៀល និងពិន័យ៨ម៉ឺនរៀល ចំពោះអ្នកបើកបរដែលប្រើទូរស័ព្ទគ្មានឧបករណ៍ភ្ជាប់សំឡេង។ ចំណែកអ្នកបើកបរមិនគោរពភ្លើងនិងស្លាកសញ្ញា បើកល្មើសការបត់ និងវ៉ាជែង ឬដឹកលើចំណុះ ត្រូវពិន័យ១០ម៉ឺនរៀល។ រីឯការបើកបរក្នុងស្ថានភាពស្រវឹង នឹងត្រូវពិន័យពី២៥ម៉ឺន ទៅ១លានរៀល តាមកម្រិតជាតិអាល់កុល។ បើយានយន្តគ្មានស្លាកលេខ នឹងត្រូវពិន័យ១២ម៉ឺនរៀល។
ចំណែក បទល្មើសរថយន្តទាំង៩ ដែលត្រូវផាកពិន័យមាន ល្បឿនត្រូវផាក១២ម៉ឺនទៅ៦២ម៉ឺន៥ពាន់រៀល, ស្រវឹងត្រូវផាក៤០ម៉ឺន ទៅ៤លានរៀល, គ្មានបណ្ណបើកបរ ត្រូវផាក១២ម៉ឺន ទៅ២៤សែនរៀល, មិនគោរពភ្លើងសញ្ញា និងស្លាកសញ្ញា ត្រូវផាក១៥ម៉ឺន ទៅ៣០ម៉ឺនរៀល, ល្មើសក្នុងការបទ និងវ៉ាជែង ត្រូវផាក១៥ម៉ឺន ទៅ៣០ម៉ឺនរៀល, មិនពាក់ខ្សែក្រវាត់៧ម៉ឺន៥ពាន់ ទៅ១៥ម៉ឺនរៀល, ដឹកលើសចំណុះត្រូវផាក១៥ម៉ឺន ទៅ៣០ម៉ឺនរៀល, គ្មានស្លាកលេខត្រូវផាក១២សែន ទៅ២៤សែនរៀល និងនិយាយទូរស័ព្ទដោយគ្មានឧករណ៍ភ្ជាប់សំឡេង ត្រូវផាក១២ម៉ឺន ទៅ២២ម៉ឺន៥ពាន់រៀល៕