ជាតិ
សង្គមជាតិ
ស្រីដែន ជ្រើសរៀនជំនាញសារព័ត៌មាន ព្រោះចង់ក្លាយជាអ្នកកាសែតពូកែម្នាក់
× ភ្នំពេញ៖ ជំនាញសារព័ត៌មាន គឺជាជំនាញដែល កញ្ញា ថា ស្រីដែន ស្រឡាញ់ និងប៉ងចូលរៀន។ ទោះជាការជ្រើសរើសជំនាញនេះ មិនសូវមានការពេញចិត្តពីគ្រួសារក៏ដោយ តែស្រីដែននៅតែសម្រេចចិត្តដើរតាមក្តីស្រមៃរបស់ខ្លួន ព្រោះនាងចង់ក្លាយជាអ្នកកាសែតពូកែមួយរូប ដែលអាចផ្សព្វផ្សាយព័ត៌មានពិត ទៅកាន់ប្រជាជន។
កញ្ញា ថា ស្រីដែន ជានិស្សិតឆ្នាំទី៣ ផ្នែកសារព័ត៌មាន នៃសាកលវិទ្យាល័យកម្ពុជា។ និស្សិតស្រីវ័យ២១ឆ្នាំរូបនេះ រៀបរាប់បន្តថា នាងសម្រេចចិត្តរៀនជំនាញសារព័ត៌មាន ក៏ព្រោះតែនាងស្រឡាញ់អាជីពនេះ ព្រោះនាងយល់ថា អ្នកសារព័ត៌មាន អាចចូលរួមជួយដល់សង្គមបានច្រើន។ «ខ្ញុំយល់ថា អ្នកសារព័ត៌មានដែលមានវិជ្ជាជីវៈ ជាអ្វីដែលសង្គមចង់បាន និងនាំឲ្យប្រទេសមានការអភិវឌ្ឍ ព្រោះពួកគេនឹងផ្សព្វផ្សាយតែពីព័ត៌មានដែលជាការពិត និងជាផលប្រយោជន៍តែប៉ុណ្ណោះ។ ជាអ្នកសារព័ត៌មានដែលល្អ គឺគ្រាន់តែអាចបកស្រាយបាន នូវអ្វីដែលជាការពិតជាក់ស្ដែង មិនលំអៀង ហើយចែករំលែកជូនទៅកាន់មនុស្សគ្រប់មជ្ឈដ្ឋាន»។ នេះជាការយល់ឃើញរបស់និស្សិតផ្នែកសារព័ត៌មានរូបនេះ។
សព្វថ្ងៃ ស្រីដែន កំពុងពង្រឹងចំណេះដឹងពាក់ព័ន្ធនឹងជំនាញសារព័ត៌មាននេះ។ មិនទាន់ប្រឡូកនឹងការងារជាអ្នកសារព័ត៌មានមែនទែននោះទេ ប៉ុន្តែស្រីដែន តាំងចិត្តថា នាងនឹងធ្វើជាអ្នកសារព័ត៌ល្អម្នាក់ដែលអាចចែករំលែកព័ត៌មានពិត ឥតលំអៀង ទៅដល់ប្រជាជន និងសង្គមជាតិ។ ស្រីដែន បង្ហាញការប្តេជ្ញាចិត្តយ៉ាងដូច្នេះ៖«ខ្ញុំនឹងអាចក្លាយជាអ្នកសារព័ត៌មានដែលមានវិជ្ជាជីវៈ មានទំនួលខុសត្រូវ អាចប្រឈម និងយកឈ្នះនូវបញ្ហាដែលនៅចំពោះមុខ រក្សាតម្លៃរបស់ខ្លួន ដោយការផ្សព្វផ្សាយតែពីព័ត៌មានពិត និងប្រុងប្រយ័ត្ន ក៏ដូចជាយកចិត្តទុកដាក់ខ្ពស់បំផុត»៕
Tag:
អប់រំ
សារព័ត៌មាន
អ្នកកាសែត
ថា ស្រីដែន
© រក្សាសិទ្ធិដោយ thmeythmey.com