ជាតិ
វីដេអូ
សុខភាព
×![]()
ដោយ: ថ្មីៗ
ភ្នំពេញ៖ ការរួមភេទ អាចឱ្យស្ត្រីនិងបុរសកើតជំងឺលើប្រដាប់រួមភេទ ឬជំងឺកាមរោគដែលមានដូចជា ជំងឺស្វាយ ប្រមេះ ពងបែកលើប្រដាប់ភេទ និងជំងឺសេមាន់ជាដើម។ បើតាមលោកស្រីវេជ្ជបណ្ឌិត ឯក ម៉េងលី ឯកទេសសម្ពព និងរោគស្ត្រី បច្ចុប្បន្ន ជំងឺស្វាយ និងប្រមេះមិនសូវកើតមានច្រើនឡើយ ប៉ុន្តែ គេឃើញ ជំងឺសេមាន់កើតមានច្រើន ដោយសារជំងឺនេះងាយឆ្លងជាងជំងឺកាមរោគផ្សេងៗ។ លោកស្រីវេជ្ជបណ្ឌិត បានឱ្យដឹងទៀតថា ការមានដៃគូរួមភេទច្រើន និងមិនប្រើប្រាស់ស្រោមអនាម័យពេលរួមភេទ ជាមូលហេតុដែលនាំឱ្យកើតជំងឺកាមរោគ។
ដើម្បីជ្រាបច្បាស់សូមអញ្ជើញលោក-អ្នកនាងទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មានថ្មីៗ និង អ្នកស្រីវេជ្ជបណ្ឌិត ឯក ម៉េងលី ឯកទេសសម្ភព និងរោគស្ត្រីនៃមន្ទីរពេទ្យអឃីតកោះពេជ្រ ដូចតទៅ៖
«ទីមួយ ឃើញនៅលើស្ត្រី គឺធ្លាក់សខុសប្រក្រតី។ ទីពីរ ប្រសិនបើ ជាជំងឺស្វាយ គាត់អាចមានចេញដំបៅលើទ្វារមាស ឬក៏ជំងឺប្រមេះ អាចចេញពងបែក ឬក្រហាយលើទ្វារមាស និងជំងឺសេមាន់ មានដុំសាច់ខុសប្រក្រតីនៅលើទ្វាមាសនិងរមាស់»។ នេះជាការពន្យល់របស់លោកស្រីវេជ្ជបណ្ឌិត ឯក ម៉េងលី អំពីរោគសញ្ញានៃប្រភេទជំងឺកាមរោគនីមួយៗ ដែលបុរសមិនសូវចេញរោគសញ្ញាដូចស្ត្រីនោះទេ ដោយសាររាងកាយខ្លាំង និងប្រដាប់ភេទបុរសមិនសូវស្មុគស្មាញដូចស្ត្រីឡើយ។
លោកស្ត្រីវេជ្ជបណ្ឌិតឯកទេសសម្ភព និងរោគស្ត្រីនៃមន្ទីរពេទ្យអឃីតកោះពេជ្រ រូបនេះ បន្ថែមថា ទោះបីបុរសកម្រនឹងចេញរោគសញ្ញាដូចស្ត្រីក៏ពិតមែន តែក្នុងករណីខ្លះបុរសក៏អាចចេញរោគសញ្ញាដូចជា ទឹកមេជីវិតបុរសឡើងខាប់ស ឬមានក្លិនខុសប្រក្រតីហូរតាមប្រដាប់បន្តពូជ ឬមានដំបៅជុំវិញប្រដាប់បន្តពូជ និងដុះសាច់សេមាន់លើប្រដាប់ភេទជាដើម។
ដើម្បីការពារជំងឺកាមរោគដែលឆ្លងតាមការរួមភេទនេះ លោកស្រីវេជ្ជបណ្ឌិត បានណែនាំឲ្យប្រើស្រោមអនាម័យរាល់ពេលរួមភេទ, មិនគួររួមភេទនៅពេលមានរបួស ឬរលាត់ស្បែកជុំវិញប្រដាប់ភេទ និងមិនគួររួមភេទនៅពេលរាងកាយស្ត្រីចុះខ្សោយ ដូចជាអំឡុងពេលមករដូវជាដើម៕
Tag:
ការរួមភេទ
សុខភាព
© រក្សាសិទ្ធិដោយ thmeythmey.com
