ជាតិ
លោក ស៊ុន ចាន់ថុល ព្រមានក្រុមហ៊ុនស្ថាបនាផ្លូវជាតិលេខ២និង២២ ដែលធ្វើផ្លូវយឺតយ៉ាវ សកម្មភាពលោក ស៊ុន ចាន់ថុល ចុះពិនិត្យការសាងសង់ផ្លូវនៅថ្ងៃទី៤ ឧសភា ឆ្នាំ២០២០ (រូបពីក្រសួងសាធារណការ និងដឹកជញ្ជូន)
× ភ្នំពេញ៖ លោក ស៊ុន ចាន់ថុល រដ្ឋមន្រី្តក្រសួងសាធារណការ និងដឹកជញ្ជូន ប្រាប់ឱ្យក្រុមហ៊ុន ដែលសាងសង់ផ្លូវជាតិលេខ២និងលេខ២២ មានភាពយឺតយ៉ាវ រកដំណោះស្រាយឱ្យទាន់ពេលវេលា។ បើមិនដូច្នោះទេ ក្រុមហ៊ុននេះ នឹងរងការផាកពិន័យ។
លោក ស៊ុន ចាន់ថុល បានចុះពិនិត្យការដ្ឋានសាងសង់ផ្លូវ នៅរង្វង់មូលស្វាយអន្ទរ រង្វង់មូលអ្នកលឿង ផ្លូវក្រវាត់ក្រុងព្រៃវែង និងចំណុចផ្លូវជាតិលេខ២និង២២ ឃើញថាផ្លូវជាតិលេខ២និង២២ មានការសាងសង់យឺតយ៉ាវ ដោយសារតែមានការដ្ឋានសាងសង់តែពីរកន្លែងប៉ុណ្ណោះ។ បើតាមលោក ស៊ុន ចាន់ថុល មូលហេតុនាំឱ្យការសាងសង់យឺតយ៉ាវនេះ ដោយសារគ្រឿងចក្រជាប់គាំងនៅប្រទេសវៀតណាម មិនទាន់មកកម្ពុជា។ លោក ស៊ុន ចាន់ថុល បញ្ជាឲ្យក្រុមហ៊ុនដែលទទួលសាងសង់ រកដំណោះស្រាយផ្សេងទៀត ដើម្បីពន្លឿនការស្ថាបនាផ្លូវនេះ។
ថ្លែងនៅក្នុងដំណើរត្រួតពិនិត្យផ្លូវ នៅថ្ងៃទី៤ ឧសភា រដ្ឋមន្ត្រីក្រសួងសាធារណការរូបនេះ បានបញ្ជាក់ដូច្នេះថា៖ «ផ្លូវពីភ្នំពេញ-តាកែវ ឃើញគ្រឿងចក្រ២គ្រឿង ។ គ្រឿងចក្រតែ២ គ្មានអ្នកណាធ្វើការទាំងអស់លើផ្លូវលេខ២និង២២នេះ។ បើ(ខ្ញុំ)មិនចុះមើល ធ្វើម៉េចដឹង !ទាល់ពេល(ខ្ញុំ)សួរដេញដោល ថាគ្រឿងចក្រជាប់នៅវៀតណាមមកមិនរួចទេ។ ហើយបើគ្មាន (ក្រុមហ៊ុន)ម៉េចមិនជួលគ្រឿងចក្រនៅស្រុកខ្មែរធ្វើឲ្យទាន់ពេលវេលាទៅ»។
តែយ៉ាងណាលោក ស៊ុន ចាន់ថុល បានបញ្ជាក់ថា នៅសល់ពេលច្រើនទៀត ដែលក្រុមហ៊ុនអាចសាងសង់ផ្លូវជាតិលេខ២និង២២ ទាន់ពេលវេលា ។ប៉ុន្តែបើដល់ពេលកំណត់ហើយ ក្រុមហ៊ុនសាងសង់មិនទាន់រួចរាល់នោះ ក្រុមហ៊ុននឹងរងការពិន័យជាមិនខាន។ បន្ទាប់ពីពិនិត្យឃើញមានភាពយឺតយ៉ាវ លោក ស៊ុន ចាន់ថុល អះអាងថា លោកនឹងចេញលិខិតព្រមាន ដល់ក្រុមហ៊ុន Hanshin ឲ្យរកដំណោះស្រាយ ឬត្រូវប្ដូរអ្នកសាងសង់ នៅថ្ងៃទី៥ ឧសភា។
គោលបំណងដែលលោក ស៊ុន ចាន់ថុល ចុះពិនិត្យមើលើផ្លូវជាតិលេខ២ និងលេខ២២នេះ គឺដើម្បីមើលចំណុចខ្វះខាត ដូចជាបញ្ហាបច្ចេកទេសមួយចំនួន ទាក់ទងនឹងការសាងសង់ ដើម្បីជំរុញឱ្យក្រុមហ៊ុនម៉ៅការសាងសង់ធ្វើការកែសម្រួល បំពេញបន្ថែមលក្ខណៈបច្ចេកទេសឲ្យបានត្រឹមត្រូវ។
សូមបញ្ជាក់ថា ផ្លូវទាំងពីរខ្សែនេះ នឹងសាងសង់ជាប្រភេទផ្លូវបេតុងកៅស៊ូ AC ដោយគ្រោងចំណាយថវិកាប្រមាណ ៥៦.១លានដុល្លារអាមេរិកជាហិរញ្ញប្បទានពីរដ្ឋាភិបាល សាធារណរដ្ឋកូរ៉េ រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីននិងយុទ្ធភ័ណ្ឌមិនទាន់ផ្ទុះ និងពន្ធអាករ។ ផ្លូវនេះទទួលបានសិទ្ធិសាងសង់ពីរដ្ឋាភិបាលកូរ៉េខាងត្បូង ដោយក្រុមហ៊ុន Hanshin Engineering & Construction Co., Ltd និងត្រួតពិនិត្យបច្ចេកទេស សាងសង់ដោយសម្ព័ន្ធក្រុមហ៊ុនទីប្រឹក្សាបច្ចេកទេស Dasan Consultants Co., Ltd, Dong Il Engineering Consultants Co., Ltd, និង Seoyoung Engineering Co., Ltd Joint Venture៕
Tag:
ផ្លូវជាតិលេខ២
ផ្លូវជាតិលេខ២២
© រក្សាសិទ្ធិដោយ thmeythmey.com