COVID-19
អន្តរជាតិ
WHO ថា ពុំទាន់ទទួលភ័ស្តុតាងពីអាមេរិករឿងមន្ទីរពិសោធន៍វូហានជាប្រភពជំងឺ COVID-19
លោក Michael Ryan នាយកប្រតិបត្តិWHOទទួលបន្ទុកកម្មវិធីអាសន្ន (AFP)
×![]()
អង្គការសុខភាពពិភពលោក (WHO) នៅថ្ងៃទី៤ ខែឧសភា បញ្ជាក់ថា រដ្ឋធានី វ៉ាស៊ីនតោន ពុំទាន់បានផ្ដល់ភ័ស្តុតាងណាមួយមកគាំទ្រការអះអាងពីសំណាក់ប្រធានាធិបតីអាមេរិក ដូណាល់ ត្រាំ ដោយថា កូរ៉ូណាវីរុសប្រភេទថ្មីដែលបង្កទៅជាជំងឺ COVID-19 មានដើមកំណើតក្នុងមន្ទីរពិសោធន៍ចិនមួយឡើយ។
«យើងពុំទាន់ទទួលបានភ័ស្តុតាងជាក់លាក់ ឬទិន្នន័យណាមួយពីរដ្ឋាភិបាលសហរដ្ឋអាមេរិក ពាក់ព័ន្ធនឹងការសំអាងនៃដើមកំណើតវីរុស។ ដូច្នេះតាមការយល់ឃើញរបស់យើង បញ្ហានេះនៅតែជារឿងមិនប្រាកដប្រជាដដែល»។ លោក Michael Ryan នាយកប្រតិបត្តិ WHO ទទួលបន្ទុកកម្មវិធីអាសន្ន បញ្ជាក់ប្រាប់សន្និសីទព័ត៌មានតាមរយៈប្រព័ន្ធវីដេអូពីចម្ងាយបែបនេះ ។
លោក Ryan អះអាងថា WHO មានឆន្ទៈក្នុងការទទួលយកព័ត៌មានទាំងឡាយណា ដែលបញ្ជាក់ពីប្រភពដើមនៃវីរុសនេះ។ លោកដោយសង្កត់ធ្ងន់ថា ព័ត៌មានទាំងនេះមានសារសំខាន់បំផុតសម្រាប់គ្រប់គ្រងជំងឺរាតត្បាតនាថ្ងៃអនាគត។
«ប្រសិនបើទិន្នន័យ និងភ័ស្តុតាងទាំងនេះ មានមែននោះ សហរដ្ឋអាមេរិក គួរតែសម្រេចចិត្តថា ពេលណាដែលខ្លួនអាចចែករំលែកព័ត៌មានទាំងនោះ»។ លោក Ryan លើកឡើងបែបនេះ ដោយបន្ថែមថា អង្គការសុខភាពពិភពលោក នឹងជួបប្រទះការលំបាកក្នុងការប្រតិបត្តិការ ប្រសិនបើគ្មានព័ត៌មានក្នុងបញ្ហាប្រភពដើមនៃវីរុសនេះទេនោះ។
ក្រុមអ្នកវិទ្យាសាស្ត្រ ជឿថា វីរុសដ៏កាចសាហាវនេះ ឆ្លងពីសត្វទៅមនុស្ស ដែលផ្ទុះឡើងដំបូងក្នុងប្រទេសចិន កាលពីចុងឆ្នាំ២០១៩ ។ គេសង្ស័យថា វីរុសនេះអាចចេញពីផ្សារមួយកន្លែងក្នុងទីក្រុងវូហាន ដែលលក់សត្វព្រៃ។
ក៏ប៉ុន្តែ ប្រធានាធិបតី ដូណាល់ ត្រាំ បន្តទម្លាក់កំហុសដាក់រដ្ឋាភិបាលចិនពាក់ព័ន្ធនឹងការយឺតយ៉ាវក្នុងចាត់ចំណាត់ការទប់ស្កាត់ COVID-19 មុនពេលវារីករាលដាលកាន់តែខ្លាំង។ ម្យ៉ាងទៀត លោកក៏អះអាងថា មានភ័ស្តុតាងបញ្ជាក់ថា វីរុសនេះមានប្រភពដើមពីមន្ទីរពិសោធន៍ក្រុងវូហាន។ បន្ថែមពីលោក ត្រាំ រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ នៅថ្ងៃទី៣ ខែឧសភាកន្លងទៅ លើកឡើងថា សហរដ្ឋអាមេរិកមានភ័ស្តុតាងយ៉ាងច្រើនគាំទ្រការអះអាងដែលប៉េកាំងបដិសេធនេះ។
ទាក់ទិននឹងការអះអាងរបស់ប្រមុខការទូតអាមេរិកនេះ ទូរទស្សន៍រដ្ឋចិន CCTV នៅថ្ងៃទី៤ ខែឧសភា បានចាត់ទុកសម្តីលោក ប៉ុមប៉េអូ ថា ជារឿងឆ្កួតឡប់ និងគ្រោះថ្នាក់ ហើយកំពុងចាក់សាំងបន្ថែមលើភាពតានតឹងរវាងសហរដ្ឋអាមេរិកនិងចិន។ យ៉ាងណាមិញ រដ្ឋាភិបាលចិន ពុំទាន់បញ្ចេញប្រតិកម្មអ្វីឡើយជុំវិញការអះអាងរបស់លោក ដូណាល់ ត្រាំ និងរដ្ឋមន្ត្រីការបរទេសអាមេរិក ដោយថា មានភ័ស្តុតាងបញ្ជាក់ពីប្រភពដើមនៃCOVID-19នេះ។
ផ្ទុយពីការលើកឡើងរបស់លោក ត្រាំ សហគមន៍ចារកម្មសហរដ្ឋអាមេរិក កាលពីថ្ងៃទី៣០ ខែមេសា បានចេញសេចក្តីសន្និដ្ឋានថា ណូវែលកូរ៉ូណាវីរុសដែលបង្កទៅជាជំងឺCOVID-19 មានដើមកំណើត ក្នុងប្រទេសចិនពិតមែន តែពុំមែនជាការបង្កើតឡើងដោយមនុស្សទេ៕
Tag:
WHO
Michael Ryan
វូហាន
COVID-19
© រក្សាសិទ្ធិដោយ thmeythmey.com
