អន្តរជាតិ
និស្សិតអន្តរជាតិថា បទបញ្ជាថ្មីរបស់ប្រធានាធិបតីធ្វើឲ្យពួកគេកាន់តែតប់ប្រមល់
និស្សិតចិនរង់ចាំនៅខាងក្រៅស្ថានទូតអាមេរិកដើម្បីចូលសម្ភាសន៍សុំទិដ្ឋាការនៅក្នុងក្រុងប៉េកាំង ប្រទេសចិន។
×![]()
ដោយ: VOA
វ៉ាស៊ីនតោន ៖ ទោះបីជាការសម្រេចចិត្តនេះមិនប៉ះពាល់ផ្ទាល់ទៅលើទិដ្ឋាការរបស់និស្សិតក៏ដោយ វាអាចធ្វើឲ្យមានការពិចារណាទៅលើកម្មវិធីផ្តល់សិទ្ធិហ្វឹកហ្វឺនការងារក្រោយបញ្ចប់ការសិក្សារបស់និស្សិតអន្តរជាតិ «នៅក្នុងរយៈពេល៣០ថ្ងៃពីការប្រកាសបទបញ្ជានេះ» ហើយអាចនឹងមានការណែនាំឲ្យមាន «វិធានការផ្សេងៗដើម្បីស្តារសេដ្ឋកិច្ចអាមេរិកឡើងវិញ» ក្នុងអំឡុងពេលវិបត្តិជំងឺកូវីដ១៩។
ទិដ្ឋាការសម្រាប់និស្សិតស្ថិតក្រោមប្រភេទទិដ្ឋាការមិនអន្តោប្រវេសន៍ដែលផ្តល់ជូនដល់ជនបរទេសដែលចង់ចូលមកក្នុងសហរដ្ឋអាមេរិកជាបណ្តោះអាសន្ន។
កញ្ញា Athiyah Azum និស្សិតផ្នែកសារព័ត៌មាននៅឯសាកលវិទ្យាល័យ Maryland ដែលបញ្ចប់ការសិក្សានៅខែឧសភានេះ ថ្លែងថា គាត់បានដាក់ពាក្យស្នើសុំសិទ្ធិធ្វើការ លក្ខណៈជាការបណ្តុះបណ្តាលកាងារក្រោយបញ្ចប់ការសិក្សា ឬហៅថា OPT ប៉ុន្តែគាត់បារម្ភខ្លាចមិនទទួលបានការអនុញ្ញាត ទាន់មុនពេលទិដ្ឋាការរបស់គាត់ផុតកំណត់។
កញ្ញាប្រាប់ VOA ថា៖ «នៅពេលខ្ញុំដាក់ពាក្យធ្វើការ ខ្ញុំត្រូវបញ្ជាក់ក្នុងលិខិតថា ខ្ញុំមិនត្រូវការឲ្យក្រុមហ៊ុនធានាឧបត្ថម្ភខ្ញុំ ខ្ញុំមានសិទ្ធិធ្វើការចាប់ពីថ្ងៃទី១ ខែមិថុនាទៅ ដោយសារខ្ញុំរំពឹងថានឹងបានវា»។
សិទ្ធធ្វើការហ្វឹកហ្វឺនក្រោយបញ្ចប់ការសិក្សារឬដែលគេហៅថា OPT អនុញ្ញាតឲ្យនិស្សិតមហាវិទ្យាល័យដែលមកអាមេរិកតាមទិដ្ឋាការនិស្សិតអាចបន្តស្នាក់នៅនិងធ្វើការតាមមុខវិជ្ជារបស់ពួកគេរហូតដល់៣ឆ្នាំ។
កញ្ញា Azum អតីតនិស្សិតកម្មសិក្សាឲ្យ VOA បានពន្យល់ថា ទោះបីជាបទបញ្ជាប្រធានាធិបតីមិនប៉ះពាល់ដល់និស្សិតដូចជារូបគាត់ក្តី វាបានបន្ថែមដល់ក្តីបារម្ភដែលមានស្រាប់។
កញ្ញា Azum ថ្លែងថា៖ «ពេលខ្ញុំទទួលបានព័ត៌មានថា ប្រធានាធិបតីអាមេរិកលោក ដូណាល់ ត្រាំ នឹងចេញបញ្ជាហាមឃាត់ជនអន្តោរប្រវេសន៍ជាបណ្តោះអាសន្ន វាធ្វើឲ្យខ្ញុំមិនដឹងថា ខ្ញុំត្រូវធ្វើដូចម្តេច មិនដឹងថាអាចបន្តនៅអាមេរិកបានឬអត់ ហើយមិនដឹងថានឹងមានអ្វីកើតឡើងតទៅមុខទៀត»។
យោងតាមទីភ្នាក់ងារអាមេរិកទទួលបន្ទុកខាងការផ្តល់សញ្ជាតិ និងកិច្ចការអន្តោប្រវេសន៍ ឬហៅកាត់ថា USCIS បានឲ្យដឹងថា ការិយាល័យនានានឹងបើកឡើងវិញនៅថ្ងៃទី៤ ខែមិថុនា ប៉ុន្តែបុគ្គលិកទីភ្នាក់ងារ USCIS ត្រូវបន្តធ្វើការតាមកាតព្វកិច្ចដែលមិនពាក់ព័ន្ធនឹងការប្រាស្រ័យទាក់ទងជាមួយនឹងសាធារណៈ។
អស់រយៈពេលជាង១ខែហើយ រដ្ឋាភិបាលអាមេរិកបានបញ្ឈប់ទិដ្ឋាការទាំងអស់ក្រៅពីទិដ្ឋាការអន្តោប្រវេសន៍។ ជើងហោះហើរត្រូវលុបចោល។ ការិយាល័យអន្តោប្រវេសន៍បានបិទទ្វារ។ សាលារៀនបង្រៀនតាមអនឡាញ។
អ្នកនាង Rebecca Hamlin ប្រធានផ្នែកជ្រើសរើសសិស្សចូលរៀនថ្នាក់អនុបណ្ឌិតនៅសាកលវិទ្យាល័យ Massachusetts នៅទីក្រុង Amherst ថ្លែងថា មានការព្រួយបារម្ភពាក់ព័ន្ធនឹងនិស្សិតអន្តរជាតិ ព្រោះគ្មានអ្នកណាអាចដាក់ពាក្យចូលមករៀនក្នុងអាមេរិកបាន បើទោះបីជាសាលាបានទទួលយកនិស្សិតនោះរួចហើយក៏ដោយ។
អ្នកនាងថ្លែងថា៖ «យើងបានទទួលទូរស័ព្ទសួរអំពីរឿងនេះកាលពីខែមុន ថាតើសិស្សអាចចូលរៀនក្នុងឆ្នាំសិក្សា២០២០ នៅរដូវស្លឹកឈើជ្រុះនេះបានឬទេ។ រហូតមកដល់ពេលនេះយើងមិនមានចម្លើយសម្រាប់ពួកគេនោះទេ»។
អ្នកនាង Hamlin ថ្លែងថា បទបញ្ជាប្រធានាធិបតីមិនផ្តល់ទិដ្ឋាការមិនមែនអន្តោប្រវេសន៍នេះពិតជាគ្រោះមហន្តរាយមួយដល់ការអប់រំថ្នាក់ឧត្តមសិក្សានៅក្នុងប្រទេសនេះមែន»។
វិស័យអប់រំថ្នាក់ឧត្តមសិក្សានៅអាមេរិកប្រឈមនឹងការប្រកួតប្រជែងពីប្រទេសដទៃទៀតកាលពីឆ្នាំ២០១៨ ដែលបានបញ្ចុះថ្លៃសិក្សា ផ្តល់មធ្យោបាយធ្វើអន្តោប្រវេសន៍ និងមិនសូវមានភាពចម្រូងចម្រាសសម្រាប់និស្សិតអន្តរជាតិ។
របាយការណ៍របស់គេហទំព័រព័ត៌មានឧត្តមសិក្សា Inside Higher Ed រាយការណ៍ថា ចំនួនអ្នកចុះឈ្មោះចូលរៀនឆ្នាំសិក្សា២០២០ប្រមាណ១៥ភាគរយបានថយចុះ រួចបញ្ចូលទាំងការថយចុះ២៥ភាគរយនៃចំនួននិស្សិតអន្តរជាតិដែលចុះឈ្មោះចូលរៀន។ ការរកឃើញនេះអាចមានន័យថាខាតបង់ប្រាក់ចំណូល២៣ពាន់លានដុល្លារ។
កាសែត Chronicle of Higher Education រាយការណ៍ថា ទោះបីជាមហាវិទ្យាល័យនានាធ្វើកិច្ចការជាច្រើនដើម្បីប៉ះប៉ូវការខាតបង់ក៏ដោយ ស្ថាប័នទាំងនេះបានផ្អាកការងារបុគ្គលិករាប់រយនាក់របស់ខ្លួនជាបណ្តោះអាសន្ន ហើយបានប្រកាសថាបានខាតប្រាក់ចំណូលជាង១០០លានដុល្លារ។ មហាវិទ្យាល័យតូចៗប្រហែលរងផលប៉ះពាល់ខ្លាំងជាងគេ ហើយប្រហែលមិនអាចរើបឡើងវិញបានពីបញ្ហាហិរញ្ញវត្ថុដែលបង្កឡើងដោយវិបត្តិជំងឺកូវីដ១៩។
យោងតាមរបាយការណ៍ Open Doors ប្រចាំឆ្នាំរបស់វិទ្យាស្ថានអប់រំអន្តរជាតិ IIE បានឲ្យដឹងថា មាននិស្សិតអន្តរជាតិ ១.០៩៥.២៩៩ នាក់ ឬ៥,៥ភាគរយនៃនិស្សិតទាំងអស់ដែលមានចំនួន ១៩.៨២៨.០០០នាក់នៅគ្រឹះស្ថានអប់រំថ្នាក់ឧត្តមសិក្សានៅសហរដ្ឋអាមេរិកសម្រាប់ឆ្នាំសិក្សា ២០១៨ ដល់២០១៩។
ក្នុងចំណោមនិស្សិតអន្តរជាតិទាំងអស់ មាននិស្សិតមកពីប្រទេសចិនច្រើនជាងគេគឺ ៣៦៩.៥៤៨ នាក់ ឬ ៣៣,៧ភាគរយ។ និស្សិតមកពីប្រទេសឥណ្ឌាមានច្រើនទី២ គឺ ២០២.០១៤នាក់ឬ១៨,៤ភាគរយនៃចំនួននិស្សិតអន្តរជាតិទាំងអស់។
អ្នកនាង Hamlin ថ្លែងថា៖ «បញ្ហាដែលអកុសលបំផុតគឺថាយើងមិនទាំងអាចឲ្យជម្រើសសិស្សរៀនតាមអនឡាញ ចំពោះនិស្សិតដែលទិដ្ឋាការរបស់ពួកគេមិនអាចចេញឲ្យទាន់ពេលវេលា។ ពីព្រោះសូម្បីតែពួកគេសុខចិត្តរៀនអនឡាញពីក្រៅសហរដ្ឋអាមេរិកក៏ដោយ ក៏យើងមិនអាចឲ្យពួកគាត់ចុះឈ្មោះផ្លូវការបានទេបើពួកគាត់មិនទទួលបានទិដ្ឋាការសិស្ស។
ក្រោយបញ្ចប់វគ្គហ្វឹកហ្វឺន OPT
កញ្ញា Azum សង្ឃឹមថា កិច្ចការដែលបុគ្គលិកស្ថាប័ន USCIS កំពុងតែធ្វើក្នុងអំឡុងពេលមានវិបត្តិកូវីដ១៩នេះ អាចអនុញ្ញាតឲ្យគាត់មានសិទ្ធិធ្វើការហ្វឹកហ្វឺនដោយប្រើ OPT ទាន់ត្រឹមខែមិថុនា។
កញ្ញា Azum ថ្លែងថា៖ «បន្ទាប់ពីចប់កម្មវិធីហ្វឹកហ្វឺនប្រើកម្មវិធី OPT ខ្ញុំសង្ឃឹមថាខ្ញុំអាចអាចបន្តធ្វើការកាន់តែច្រើនប្រើប្រាស់កម្មវិធី OPT នេះ។ បន្ទាប់មក ក្រោយពេលខ្ញុំបង្កើនបទពិសោធន៍ការងាររបស់ខ្ញុំ ខ្ញុំអាចដាក់ពាក្យសុំសិទ្ធិធ្វើការតាមរយៈទិដ្ឋាការបែប H1B នៅឆ្នាំក្រោយទៀត»។
ទិដ្ឋាការ H1B អនុញ្ញាតឲ្យអ្នកដែលមិនមែនជាជនអន្តោប្រវេសន៍អាចធ្វើការបណ្តោះអាសន្ននៅអាមេរិក។ មេធាវីផ្នែកអន្តោប្រវេសន៍ថ្លែងថា ដើម្បីការទទួលបានទិដ្ឋាការ H1B ដើម្បីធ្វើការគឺជាគោលបំណងទូទៅមួយសម្រាប់និស្សិតអន្តរជាតិ។
អ្នកស្រី Rosanna Berardi មេធាវីអន្តោប្រវេសន៍មកពីទីក្រុង Buffalo រដ្ឋ New York បានថ្លែងថា អតិថិជនរបស់អ្នកស្រីភាគច្រើនដែលដាក់ពាក្យសុំទិដ្ឋាការ H1B គឺជានិស្សិតអន្តរជាតិ។
អ្នកស្រីថ្លែងថា៖ «ពួកគេនឹងមិនអាចបន្តធ្វើការក្រោយរៀនចប់ ព្រោះប្រសិនបើពួកគេមិនអាចទទួលបានទិដ្ឋាការ H1B ក្រោយទិដ្ឋាការនិស្សិតរបស់ពួកគេអស់សុពលភាព ពួកគេនឹងត្រូវវិលត្រឡប់ទៅកាន់ប្រទេសកំណើតពួកគេវិញ»។
យោងតាមច្បាប់អន្តោប្រវេសន៍និងសញ្ជាតិ Immigration and Nationality Act សិស្សនិស្សិតដែលទិដ្ឋាការនិស្សិតរបស់ពួកគេផុតសុពលភាព ពួកគេមានពេល ៦០ថ្ងៃដើម្បីវិលត្រឡប់ទៅប្រទេសកំណើតរបស់ពួកគេវិញ។
អ្នកស្រី Berardi ថ្លែងថា៖ «អ្នកខ្លះមកអាមេរិក៦ឆ្នាំហើយ។ ពួកគេបញ្ចប់ថ្នាក់បរិញ្ញាបត្រ និងថ្នាក់អនុបណ្ឌិត។ ពួកគេចង់ធ្វើអន្តោប្រវេសន៍ ព្រោះពួកគេចង់បំពេញក្តីសុបិន្តរស់នៅក្នុងសហរដ្ឋអាមេរិក ឬ American dream។ ពួកគេធ្វើវាដោយស្របច្បាប់ និងតាមដំណាក់កាល។ ពួកគេបង់ប្រាក់ជូនរដ្ឋាភិបាល ហើយពួកគេបង់ពន្ធ»៕
© រក្សាសិទ្ធិដោយ thmeythmey.com
