COVID-19
អន្តរជាតិ
×![]()
ម៉ាឡេស៊ីនៅថ្ងៃទី៤ ខែឧសភា បានរិះគន់អង្គការសុខភាពពិភពលោក (WHO) ដែលចេញដំបូន្មានឲ្យមនុស្សពេញវ័យជៀសវាងការប្រើប្រាស់ប្រេងដូងក្នុងអំឡុងពេល COVID-19 និងប្រើប្រេងអូលីវជំនួសវិញ។ នេះបើតាមទីភ្នាក់ងារសារព័ត៌មាន Reuters។ 
ការិយាល័យ WHO ប្រចាំតំបន់មេឌីទែរ៉ាណេខាងកើត បានចេញដំបូន្មានឲ្យមនុស្សគួរបរិភោគប្រភេទខ្លាញ់មិនឆ្អែត ដែលមានក្នុងត្រី គ្រាប់ធញ្ញជាតិ ប្រេងសណ្តែក និងអូលីវ ជាជាងទទួលទានប្រភេទខ្លាញ់ឆ្អែត ដែលយកចេញពីសត្វ ប្រេងដូង ប័រ និងឈីសជាដើម។
ម៉ាឡេស៊ី ដែលជាប្រទេសនាំចេញប្រេងដូងលំដាប់ទី២ លើពិភពលោក និយាយថា ដំបូន្មានរបស់WHO នេះមានលក្ខណៈមិនគ្រប់ជ្រុងជ្រោយ។ លោក Kalyana Sundram នាយកប្រតិបត្តិ ក្រុមប្រឹក្សាប្រេងដូងម៉ាឡេស៊ី (MPOC) ដែលជាភ្នាក់ងាររដ្ឋទទួលបន្ទុកក្នុងការផ្សព្វផ្សាយទំនិញខាងលើនិយាយថា៖ «WHO តាមរយៈដំបូន្មានថ្មីនេះ បានដើរតាមបន្ទាត់ដដែលដោយលើកតម្កើងទំនិញមួយចំនួន និងមិនអើពើពីផលិតផលប្រេងដូង»។
នាយក MPOC បានបញ្ជាក់ក្នុងសំណេរមួយទៀតថា ប្រេងដូងមានលំនឹងនូវសារធាតុខ្លាញ់ឆ្អែត និងមិនឆ្អែតដែលធានាឲ្យមានការស្រូបយកនូវសារធាតុចិញ្ចឹមតូចៗ និងមិនចាំបាច់បន្ថែមសារធាតុអ៊ីដ្រូសែនដើម្បីរក្សាគុណភាពឡើយ។ មិនតែប៉ុណ្ណោះប្រេងដូងក៏អាចប្រើក្នុងបរិមាណច្រើនផងដែរ។
បើតាម MPOC បណ្តាប្រទេសដែលការប្រើប្រាស់ខ្លាញ់មានកម្រិតតិចជាងការណែនាំរបស់WHO ដូចជាប្រទេសមួយផ្នែកធំនៅអាស៊ី និងអាហ្វ្រិក មានការយកចិត្តទុកដាក់លើបញ្ហាសុខភាពមានលក្ខណៈខុសគ្នា។ នាយកក្រុមហ៊ុនប្រេងដូងនេះបន្តថា តម្រូវការក្នុងការផ្តល់ប្រភពកាឡូរីដែលអាចទុកចិត្តបាន ប្រកបដោយនិរន្តរភាព និងមានតម្លៃសមរម្យ មានសារៈសំខាន់ និងចាំបាច់ក្នុងការទប់ទល់កង្វះអាហារូបត្ថម្ភ។
លោក Kalyana បន្តការរិះគន់របស់ខ្លួន ហើយណែនាំឲ្យ WHO គួរយកចិត្តទុកដាក់ក្នុងការស្វែងរកវិធីសាស្ត្រខុសៗគ្នាក្នុងការគ្រប់គ្រងសុខភាព ជាជាងធ្វើការផ្សព្វផ្សាយដែលមិនគ្រប់ជ្រុងជ្រោយ។
ប្រេងដូង គឺជាវត្ថុធាតុដើមសំខាន់មួយដែលត្រូវបានប្រើប្រាស់ប្រចាំថ្ងៃ ប៉ុន្តែតម្រូវការមានការធ្លាក់ចុះដោយសារតែការបិទភោជនីយដ្ឋាន នៅក្នុងប្រទេសជាច្រើនអំឡុងពេលផ្ទុះជំងឺ COVID-19 ។ ម៉ាឡេស៊ី និងឥណ្ឌូណេស៊ី ផលិត៨៥% នៃប្រេងដូងនៅទូទាំងពិភពលោក។ ប៉ុន្តែឧស្សាហកម្មប្រេងដូងនេះ រងការរិះគន់ពីអ្នកការពារបរិស្ថានចំពោះការកាប់ឆ្ការព្រៃ ដើម្បីយកដីដាំដើមដូងប្រេង៕
© រក្សាសិទ្ធិដោយ thmeythmey.com
