លោក ខៀវ កាញារីទ្ធ ណែនាំប្រព័ន្ធផ្សព្វផ្សាយរដ្ឋ ឲ្យបង្កើតកម្មវិធីតុមូលស្ដីពីច្បាប់ចរាចរណ៍

ជាតិ

លោក ខៀវ កាញារីទ្ធ ណែនាំប្រព័ន្ធផ្សព្វផ្សាយរដ្ឋ ឲ្យបង្កើតកម្មវិធីតុមូលស្ដីពីច្បាប់ចរាចរណ៍

05, May 2020 , 5:05 pm

រូបភាព

លោក ខៀវ កាញារិទ្ធ (រូបពីទំព័រហ្វេសប៊ុកក្រសួងព័ត៌មាន)

ដោយ: ឡាយ សុភាវតី

ភ្នំពេញ៖ លោក ខៀវ កាញារីទ្ធ រដ្ឋមន្រី្តក្រសួងព័ត៌មាន ណែនាំឲ្យប្រព័ន្ធផ្សព្វផ្សាយរបស់រដ្ឋ បង្កើតកម្មវិធីតុមូលផ្សាយផ្ទាល់ ដោយបើកឲ្យមានការហៅទូរស័ព្ទចូលពីសាធារណជនទូទៅ ដើម្បីសារសួរពីការអនុវត្តច្បាប់ចរាចរណ៍ផ្លូវគោក។ នេះបើតាមការចេញផ្សាយរបស់ក្រសួងព័ត៌មាន នៅថ្ងៃទី៤ ខែឧសភា ឆ្នាំ២០២០។

ក្នុងកិច្ចប្រជុំប្រចាំសប្ដាហ៍របស់ក្រសួងព័ត៌មាន លោក ខៀវ កាញារីទ្ធ បានជំរុញឲ្យប្រព័ន្ធផ្សព្វផ្សាយរដ្ឋដូចជា វិទ្យុជាតិនិងទូរទស្សន៍ជាតិកម្ពុជា ត្រូវបង្កើតកម្មវិធីតុមូលផ្សាយផ្ទាល់ពីច្បាប់ចរាចរណ៍ផ្លូវគោក ដើម្បីដោះស្រាយបញ្ហាសង្គម ដែលជាប្រធានបទថ្មីក្នុងពេលបច្ចុប្បន្ននេះ។ លោករដ្ឋមន្រី្ត ថ្លែងថា៖«ក្នុងនាមជាប្រព័ន្ធផ្សព្វផ្សាយរបស់ជាតិដែលជាស្ពានចម្លងមតិយោបល់របស់ពលរដ្ឋទៅរដ្ឋាភិបាល និងពីរដ្ឋាភិបាលទៅពលរដ្ឋ ត្រូវផ្សាយឲ្យទូលំទូលាយ ពីការអនុវត្តច្បាប់ចរាចរណ៍ថ្មី ឲ្យពលរដ្ឋយល់ច្បាស់និងចូលរួម អនុវត្តទាំងអស់គ្នា»។

ជាមូយគ្នានេះដែរ រដ្ឋមន្ត្រីព័ត៌មាន បានសង្កត់ធ្ងន់ថា កម្មវិធីតុមូលនេះ ត្រូវមានការចូលរួមពីមន្រី្តនគរបាល ដែលជំនាញច្បាប់ចរាចរណ៍ បកស្រាយឲ្យបានស៊ីជម្រៅទៅលើរាល់មតិរិះគន់អំពីបញ្ហាដែលកើតមាន និងសំណូមពររបស់ពលរដ្ឋ៕