៤ខែឆ្នាំ២០២០ ក្រសួងបរិស្ថាន បង្ក្រាបបទល្មើសធនធានធម្មជាតិប្រមាណ៤០០ករណី

ជាតិ

សង្គមជាតិ

៤ខែឆ្នាំ២០២០ ក្រសួងបរិស្ថាន បង្ក្រាបបទល្មើសធនធានធម្មជាតិប្រមាណ៤០០ករណី

07, May 2020 , 9:59 pm

រូបភាព

សកម្មភាពមន្ត្រីឧទ្យានុរក្សនៃក្រសួងបរិស្ថានដែលកំពុងបង្រ្កាបបទល្មើសកាប់ព្រៃឈើ រូបភាពពីក្រសួងបរិស្ថាន

ដោយ:

ភ្នំពេញ៖ ពីខែមករា ដល់ ខែមេសា ឆ្នាំ២០២០នេះ ក្រសួងបរិស្ថាន បានសហការជាមួយមន្ត្រីឧទ្យានុរក្ស សហគមន៍តំបន់ការពារធម្មជាតិ និង អាជ្ញាធរពាក់ព័ន្ធ ចុះបង្ក្រាបបទល្មើសធនធានធម្មជាតិ៣៩៩ករណី ក្នុងតំបន់៤ ស្ថិតនៅដែនជម្រកសត្វព្រៃព្រៃឡង់ ដែលមានទំហំដីជាង៤៣ម៉ឺនហិកតា។ នេះបើតាមរបាយការណ៍ស្តីពីការគ្រប់គ្រង និងអភិរក្សតំបន់ដែនជម្រកសត្វព្រៃព្រៃឡង់ ដែលបញ្ចេញដោយលោក នេត្រ ភក្ត្រា អ្នកនាំពាក្យក្រសួងបរិស្ថាន។

លោក នេត្រ ភក្ត្រា បញ្ជាក់ថា បទល្មើសប្រមាណ៤០០ករណីនេះ ភាគច្រើនជាបទល្មើសដែលបានលួចកាប់ព្រៃឈើខុសច្បាប់ ទន្ទ្រានកាន់កាប់ដីព្រៃ និង បរបាញ់សត្វព្រៃខុសច្បាប់។ ក្នុងចំណោមបទល្មើសទាំងអស់នេះ មានបទល្មើសកាប់ឈើ និងទន្ទ្រានដីព្រៃខុសច្បាប់៣២ករណី ដែលត្រូវបានអាជ្ញាធរកសាងសំណុំរឿង និងបញ្ជូនទៅតុលាការ ដើម្បីរង់ចាំដោះស្រាយតាមនីតិវីធីច្បាប់។ បទល្មើស៤២ករណីទៀត ដែលមានអ្នកពាក់ព័ន្ធជិត១០០នាក់ ត្រូវបានអាជ្ញាធរណែនាំ និងអប់រំ។

អំឡុងពេលអាជ្ញាធរ បានបង្ក្រាបបទល្មើសធនធានធម្មជាតិនៅព្រៃឡង់ក្នុងរយៈពេល៤ខែកន្លងទៅនេះ ក្រសួងបរិស្ថាន បានរឹបអូសរណារយន្ត១៩៣គ្រឿង រថយន្ត២គ្រឿង ម៉ូតូ២៥គ្រឿង គោយន្ត៣៤គ្រឿង ឈើ១៧៩ម៉ែត្រគូប ឈើហ៊ុប និង ឈើដុំ១៦៥កំណាត់ រួមទាំងបានរុះរើរោងអនាធិបតេយ្យ៣៤រោង ដកហូតកាំភ្លើងកែច្នៃ២៩ដើម និង ដោះអន្ទ្រាក់ចាប់សត្វបាន៧២៤អន្ទាក់។

លោក នេត្រ ភក្ត្រា លើកឡើងថា ការណ៍ដែលនាំឲ្យមានបទល្មើសធនធានធម្មជាតិទាំងនេះ គឺមកពីកត្តាជីវភាពរបស់សហគមន៍ ដែលធ្លាប់តែពឹងអាស្រ័យលើអនុផលព្រៃឈើ និងចាញ់ការញុះញង់របស់ក្រុមឈ្មួញទុច្ចរិត ខណៈការឈរជើងរបស់មន្ត្រីឧទ្យានុរក្សនៅមានកម្រិតនៅឡើយ។

តែយ៉ាងណា ក្រសួងបរិស្ថាន នឹងបន្តកិច្ចការបង្ក្រាបបទល្មើសធនធានធម្មជាតិ ជាមួយសមត្ថកិច្ចបន្ថែមទៀត។ លោក នេត្រ ភក្ត្រា មានប្រសាសន៍ថា៖«រាជរដ្ឋាភិបាល ក្រសួងបរិស្ថាន និងដៃគូអភិវឌ្ឍបានយកចិត្តទុកដាក់ខ្ពស់លើការរៀបចំ និងពង្រឹងយន្តការគ្រប់គ្រង ការផ្តល់មធ្យោបាយ ឧបករណ៍ សម្ភារ ក៏ដូចជាការជួយលើកស្ទួយជីវភាពរបស់ប្រជាសហគមន៍មូលដ្ឋានបន្ថែមទៀតតាមរយៈការបង្កើតមុខរបរថ្មី បង្កើតសេដ្ឋកិច្ចនៅមូលដ្ឋាន បង្កើនចំណូល ការជំរុញទេសចរណ៍ធម្មជាតិ ដើម្បីធានាប្រសិទ្ធភាពគ្រប់គ្រង ការពារ និងអភិរក្សតំបន់ព្រៃឡង់»។

ដើម្បីឲ្យការរក្សាធនធានធម្មជាតិប្រកបដោយនិរន្តភាព ក្រសួងបរិស្ថាន កំពុងតែអនុវត្តគម្រោងព្រៃឡង់បៃតង ដែលសហការជាមួយក្រសួងពាក់ព័ន្ធ ដើម្បីពង្រឹងការការពារ និងអភិរក្សធនធានធម្មជាតិ និងជីវចម្រុះ ដែលផ្តោតលើការងារកំណត់ និងបែងចែកតំបន់គ្រប់គ្រង ការបោះបង្គោលព្រំប្រទល់ ផែនការគ្រប់គ្រង និងការចុះបញ្ជីដីរដ្ឋ នៅតំបន់ព្រៃឡង់ បណ្តុះបណ្តាល និងពង្រឹងសមត្ថភាព មន្ត្រីឧទ្យានុរក្ស ក៏ដូចជាលើកកម្ពស់ជីវភាពប្រជាសហគមន៍អភិរក្សប្រពៃណីជនជាតិ ដើមភាគតិច។

សូមបញ្ជាក់ថា ព្រៃឡង់ត្រូវបានរដ្ឋាភិបាលបង្កើតឡើងតាំងពីឆ្នាំ២០១៦ ដែលស្ថិតនៅក្រោមការគ្រប់គ្រង និងអភិរក្សដោយក្រសួងបរិស្ថាន។ ព្រៃឡង់ មានផ្ទៃដីសរុបជាង៤២ម៉ឺនហិកតា និងមានភូមិសាស្ត្រខេត្តចំនួន៤ គឺស្ទឹងត្រែង ព្រះវិហារ កំពង់ធំ និង ក្រចេះ៕