ជាតិ
ប្រទះឃើញទន្សោងមួយហ្វូង នៅដែនជម្រកសត្វព្រៃភ្នំព្រេច
× ភ្នំពេញ៖ កាលពីចុងខែមេសា ឆ្នាំ២០២០ សត្វទន្សោងមួយហ្វូងប្រមាណ៧ក្បាល ត្រូវបានប្រទះឃើញ នៅដែនជម្រកសត្វព្រៃភ្នំព្រេច ដែលជាតំបន់ការពារ សិ្ថតនៅក្រោមការគ្រប់គ្រងរបស់មន្ទីរបរិស្ថាន ខេត្តមណ្ឌលគិរី និងបានចូលរួមគាំទ្រដោយអង្គការអភិរក្សសត្វព្រៃ (WWF)។
ពេលកំពុងតាមដាន និងប្រមូលព័ត៌មានទាក់ទងនឹងសត្វព្រៃ នៅក្នុងដែនជម្រកសត្វព្រៃភ្នំព្រេច ក្រុមការងារស្រាវជ្រាវសត្វព្រៃនៃអង្គការ WWF បានប្រទះឃើញសត្វទន្សោងប្រមាណ៧ក្បាល ដែលក្នុងនោះមានទន្សោងបាធំមួយក្បាល និងកូនទន្សោងធំល្មមមួយផងដែរ។
អង្គការ WWF ចាត់ទុកការប្រទះឃើញសត្វទន្សោងទាំងនោះ ថាជាព័ត៌មាន ដែលពោរពេញដោយក្តីរំភើបក្រៃលែង សម្រាប់ប្រជាជនកម្ពុជា។ បើតាមការលើកឡើងរបស់អ្នកស្រាវជ្រាវនៃអង្គការ WWF ហ្វូងសត្វទន្សោងទាំងនោះ ត្រូវបានឃើញរត់យ៉ាងលឿន ហើយសកម្មភាពរត់បែបនេះ គឺអាចមកពីពួកវា ផ្អើលនឹងវត្តមានរបស់ក្រុមអ្នកស្រាវជ្រាវ។
សត្វទន្សោង ជាប្រភេទសត្វអម្បូរគោសាទិស ដែលមានមាឌធំ និងកម្លាំងខ្លាំង។ សត្វទន្សោង ជាសត្វដែលជាចំណីដ៏សំខាន់របស់សត្វខ្លាធំៗ ហើយវា ក៏កំពុងទទួលរងការគំរាមកំហែង ពីការបរបាញ់ ឬដាក់អន្ទាក់ ហើយប្រឈមការបាត់ជម្រក ដែលបណ្ដាលពីការកាប់ព្រៃខុសច្បាប់ និងទន្ទ្រានដីព្រៃ។
សត្វទន្សោង ដែលត្រូវបានប្រទះឃើញទាំងនោះ ជាពូជសត្វដែលផ្ដល់ដើមកំណើត ដល់ពពួកគោសាទិសស្រុកក្នុងតំបន់អាស៊ីអាគ្នេយ៍ផងដែរ៕
វីដេអូ៖
© រក្សាសិទ្ធិដោយ thmeythmey.com