COVID-19
កីឡាអន្តរជាតិ
អន្តរជាតិ
កីឡាករ និងបុគ្គលិកក្រុម Fiorentina ៦នាក់ឆ្លង COVID-19
× កីឡាករបាល់ទាត់របស់ក្រុម Fiorentina ចំនួនបីនាក់ និងសមាជិកបុគ្គលិកក្លិបចំនួនបីនាក់ទៀតបានធ្វើតេស្តចេញលទ្ធផលវិជ្ជមានជំងឺឆ្លង COVID-19។ នេះជាករណីឆ្លងថ្មីទៀតលើកីឡាករបាល់ទាត់នៅអ៊ីតាលី ក្រោយសមាជិកក្រុម Torino ម្នាក់បានឆ្លងជំងឺរាតត្បាតសកលនេះកាលពីថ្ងៃទី៦ ខែឧសភា។
កីឡាករ និងបុគ្គលិកទាំង៦នាក់ខាងលើត្រូវបានក្លិបនៃក្របខណ្ឌកំពូលអ៊ីតាលី Fiorentina ដាក់ឲ្យនៅដាច់ដោយឡែកដើម្បីព្យាបាល ខណៈអ្នកពាក់ព័ន្ធផ្សេងទៀតនឹងត្រូវទៅធ្វើតេស្តជាបន្តបន្ទាប់ទៀត។
ក្រុមនៅ Serie A ភាគច្រើនបានវិលត្រឡប់ទៅកាន់ការហ្វឹកហាត់វិញរៀងៗខ្លួន បន្ទាប់ពីរដ្ឋាភិបាលអ៊ីតាលីផ្តល់ការអនុញ្ញាត ប៉ុន្តែអាចហ្វឹកហាត់បានតែម្នាក់ៗឯងប៉ុណ្ណោះ។ មួយវិញទៀត រដ្ឋមន្ត្រីកីឡាអ៊ីតាលីលោក Vincenzo Spadafora ក៏បានបញ្ជាក់ជាថ្មីដែរថា ការហ្វឹកហាត់ជាក្រុមនឹងមិនអាចធ្វើឡើងនៅមុនថ្ងៃទី១៨ ខែឧសភាឡើយ។
កាលពីថ្ងៃទី៦ ខែឧសភា កីឡាកររបស់Torino ម្នាក់ក៏បានធ្វើតេស្តរកឃើញថាឆ្លង COVID-19 នេះដែរ ហើយត្រូវបានដាក់ឲ្យនៅដាច់ដោយឡែក។ សម្រាប់អត្តសញ្ញានអ្នកឆ្លង ទាំង Fiorentina និង Torino សុទ្ធតែមិនបានបង្ហាញឈ្មោះកីឡាកររបស់ពួកគេនោះទេ។
ស្របពេល Serie A កំពុងស្ថិតក្នុងការពិចារណាដើម្បីវិលទៅកាន់ការប្រកួតលីគឡើងវិញ ខណៈ COVID-19 នៅតែបន្តឆ្លងក្នុងប្រទេសអ៊ីតាលីនោះ Fiorentina បានប្រកាសពីការប្តេជ្ញាថាក្លិបនឹងចាត់ចែងក្នុងការគ្រប់គ្រងលើអ្នកដែលពាក់ព័ន្ធដោយផ្ទាល់ជាមួយអ្នកឆ្លង និងធានាមិនឲ្យរាលដាលថ្មីទៀតឡើយ។ កីឡាករ និងបុគ្គលិកទាំងអស់នឹងត្រូវទទួលការពិនិត្យសុខភាពជាប្រចាំ។
គិតត្រឹមថ្ងៃទី៨ ខែឧសភានេះអ៊ីតាលីបានធ្លាក់តួលេខអ្នកឆ្លងច្រើន ដោយក្នុងនោះករណីឆ្លងសរុបនៅតែមានចំនួនជាង២សែនករណី និងអ្នកស្លាប់ជិត៣ម៉ឺននាក់ដដែល៕
Tag:
COVID-19
Fiorentina
Serie A
© រក្សាសិទ្ធិដោយ thmeythmey.com