COVID-19
អន្តរជាតិ
COVID-19 បំផ្លាញការងារអាមេរិក២០,៥លានកន្លែងក្នុងខែមេសា ប្រភពរូប៖ AP
× ការបិទប្រទេសព្រោះCOVID-19 បំផ្លាញការងារ២០,៥លានកន្លែងក្នុងសហរដ្ឋអាមេរិកក្នុងខែមេសា។ ក្រសួងការងារអាមេរិក រាយការណ៍បែបនេះ នៅថ្ងៃទី៨ ខែឧសភា។
ការដាំក្បាលចុះយ៉ាងគំហុកនេះ បណ្ដាលឲ្យអត្រាអ្នកអត់ការងារធ្វើនៅសហរដ្ឋអាមេរិកឡើងដល់ ១៤,៧ភាគរយ ពោលគឺលើសចំណុចខ្ពស់បំផុតក្នុងចុងឆ្នាំ២០១៩ ដែលស្ថិតក្នុងអំឡុងវិបត្តិហិរញ្ញវត្ថុសកល។ អត្រាអ្នកអត់ការងារធ្វើកាលពីខែមីនា ស្មើនឹង ៤,៤ភាគរយ។ នេះបើតាមទីភ្នាក់ងារព័ត៌មានReuters។
នេះគឺជាធ្លាក់ចុះអាក្រក់បំផុត ចាប់តាំងពីវិបត្តិសេដ្ឋកិច្ចសកលអំឡុងទសវត្សរ៍ឆ្នាំ១៩៣០ និងក្រោយសង្គ្រាមលោកលើកទី២ ដែលស្មើ១០,៨ភាគរយ ក្នុងខែ១៩៨២។ ការបាត់បង់ក្នុងខែមីនា គឺអាក្រក់ខ្លាំងបំផុត ដែលរបាយការណ៍ដំបូងបង្ហាញថា ការងារ៨៧ម៉ឺនកន្លែងត្រូវបាត់បង់ ទោះជាអាជីវកម្មភាបច្រើនផ្ដើមបិទទ្វារក្នុងសប្តាហ៍ទី៣នៃខែនេះ។
ទាក់ទិនបញ្ហានេះ ប្រធានាធិបតីអាមេរិក ដូណាល់ ត្រាំ នៅថ្ងៃទី៨ ខែឧសភា ហាក់ពុំយកចិត្តទុកដាក់នឹងការងារបាត់បង់ការងារនេះ។ ត្រង់ចំណុចនេះលោកប្រាប់ទូរទស្សន៍ Fox News ដូច្នេះថា៖«វាស្ថិតក្នុងការគ្រោងទុកទាំងស្រុង។ វាពុំមែនជារឿងគួរឲ្យភ្ញាក់ផ្អើលឡើយ»។ យ៉ាងណាមិញ លោកសង្កត់ធ្ងន់ថា៖«ខ្ញុំនឹងនាំយកពួកវាត្រលប់មកវិញ»។
គិតត្រឹមថ្ងៃទី៩ ខែឧសភា សហរដ្ឋអាមេរិកមានករណីឆ្លងCOVID-19សរុប ១,៣២លានករណី ខណៈអ្នកស្លាប់មាន ៧៨ ៦១៥នាក់។ បើតាមវេបសាយ worldometers អ្នកជាសះស្បើយមានជាង២២ម៉ឺននាក់ ខណៈអ្នកជំងឺធ្ងន់ធ្ងរមាន១៦ ៩៧៨នាក់៕
© រក្សាសិទ្ធិដោយ thmeythmey.com