COVID-19
អន្តរជាតិ
ឥណ្ឌូណេស៊ី ទទូចឲ្យប្រទេសម្ចាស់បំណុលបន្ធូរបន្ថយបំណុលចំពោះប្រទេសក្រីក្រីដែលរងគ្រោះព្រោះ Covid-19 ប្រធានាធិបតីឥណ្ឌូណេស៊ី ចូកូវីដូដូ (រូបភាព៖ AFP
× ប្រធានាធិបតីឥណ្ឌូណេស៊ី លោក ចូកូ វីដូដូ បានអំពាវនាវដល់ប្រទេសសេដ្ឋកិច្ចលូតលាត់ និងជាម្ចាស់បំណុលឲ្យមានការយោគយល់ដល់ប្រទេសក្រីក្រ ឬជាកូនបំណុលក្នុងដំណាក់កាលលំបាកនៃវីរុស Covid-19។ ប្រមុខដឹកនាំកំពូលឥណ្ឌូណេស៊ីរូបនេះ ចង់ឃើញបណ្តាប្រទេសមានសេដ្ឋកិច្ចល្អប្រសើរបន្ធូរបន្ថយបំណុលសម្រាប់ប្រទេសក្រីក្រដើម្បីទុកលទ្ធភាពឲ្យប្រទេសទាំងនេះស្រោចស្រង់ស្ថានភាព។
តាមរយៈកិច្ចប្រជុំកំពូលរបស់ចលនាមិនចូលបក្សសម្ព័ន្ធ ( Non-Aligned Movement ឬហៅកាត់ថា NAM) នៅថ្ងៃ៥ ឧសភាកន្លងទៅ លោកប្រធានាធិបតី ចូកូ វីដូដូ បានថ្លែងត្រង់ៗពីទុក្ខលំបាករបស់ប្រទេសក្រីក្រ និងប្រទេសមានការអភិវឌ្ឍតិចតួចបំផុតក្នុងដំណាក់កាលនៃការរីករាលដាលវីរុស Covid-19 ដែលបានអូសបន្លាយជាច្រើនខែមកហើយនោះ។
តាមការចុះផ្សាយរបស់សារព័ត៌មាន Jakarta Globe លោកប្រធានាធិបតី បានគូសបញ្ជាក់ថា វា ជារឿងចាំបាច់បំផុតមួយ ដែលលោកត្រូវលើកឡើងពីទុក្ខលំបាក និងទាមទារជំនួយអភិវឌ្ឍ និងមនុស្សធម៌, ក៏ដូចជាការអនុគ្រោះនិងបន្ធូរបន្ថយបំណុល និងកាតព្វកិច្ចក្នុងការសងបំណុលពីម្ចាស់បំណុលផ្លូវការ ដែលអាចធ្វើឡើងតាមរយៈការបង្វែរមកជួយរដ្ឋាភិបាលដើម្បីគ្រប់គ្រងស្ថានភាពពីវីរុស Covid-19។
តាមប្រភពព័ត៌មានដដែល លោកប្រធានាធិបតី បានសង្កត់ធ្ងន់ផងដែរថា ប្រទេសសមាជិកក្រុម G20 ដែលជាប្រទេសមានសេដ្ឋកិច្ចជឿនលឿន គួរតែចាប់ផ្តើមអនុវត្តតាមការប្តេជ្ញាចិត្តរបស់ខ្លួនស្តីពីការព្យួរ ឬពន្យាពេលកំណត់សម្រាប់ការសងបំណុល សម្រាប់ប្រទេសដែលមានចំណូលតិចតួច។ លោក អះអាងថាសត្រូវរួមរបស់ពិភលោកបច្ចុប្បន្ន គឺ Covid-19 ដូច្នេះ ពិភពលោកគួរតែពង្រឹងសាមគ្គីភាពនយោបាយដើម្បីបញ្ចប់បញ្ហា៕
Tag:
ឥណ្ឌូណេស៊ី
Covid-19
© រក្សាសិទ្ធិដោយ thmeythmey.com