១៤ថ្ងៃ សមត្ថកិច្ចផាកពិន័យយានយន្តជាង២ម៉ឺនគ្រឿង ខណៈអត្រាគ្រោះថ្នាក់ចរាចរណ៍ថយចុះ៦៨លើក

ជាតិ

១៤ថ្ងៃ សមត្ថកិច្ចផាកពិន័យយានយន្តជាង២ម៉ឺនគ្រឿង ខណៈអត្រាគ្រោះថ្នាក់ចរាចរណ៍ថយចុះ៦៨លើក

15, May 2020 , 10:19 pm

រូបភាព

សម្ដេច ស ខេង ផ្ដល់បទសម្ភាសន៍ដល់ក្រុមសារព័ត៌មាន នៅថ្ងៃទី១៥ ឧសភា ឆ្នាំ២០២០ (រូបពីទំព័រហ្វេសប៊ុករបស់សម្ដេច ស ខេង)

ដោយ: ឡាយ សុភាវតី

ភ្នំពេញ៖ ការរឹតបន្តឹងចរាចរណ៍ផ្លូវគោករយៈពេល១៤ថ្ងៃមកនេះ សមត្ថកិច្ច បានផាកពិន័យយានយន្តល្មើសច្បាប់ ២២,៣៨១គ្រឿង ក្នុងនោះម៉ូតូ ១៦,៥៧៩គ្រឿង និងរថយន្ត ៥,៨០២គ្រឿង។ការរឹតបន្តឹងចរាចរណ៍នេះ បានធ្វើឲ្យគ្រោះថ្នាក់ចរាចរណ៍ថយចុះ៦៨លើក ខណៈអ្នករងរបួសដោយសារគ្រោះថ្នាក់ចរាចរណ៍ថយចុះ៩១នាក់ និងអ្នកស្លាប់ថយចុះ២០នាក់ បើធៀបនឹងឆ្នាំ២០១៩។

សម្ដេច ស ខេង មើលឃើញថា គ្រោះថ្នាក់ចរាចរណ៍ថយចុះគួរឲ្យកត់សម្គាល់ បន្ទាប់ពីមានការរឹតបន្តឹងចរាចរណ៍រយៈពេល២សប្ដាហ៍មកនេះ ។ សម្ដេច ស ខេង បានវាយតម្លៃថា ប្រជាពលរដ្ឋពិតជាមានការយល់ដឹង និងបានចូលរួមគោរពច្បាប់ចរាចរណ៍កាន់តែច្រើន។ រដ្ឋមន្រី្តក្រសួងមហាផ្ទៃ បានសរសេរលើហ្វេសប៊ុក នៅថ្ងៃទី១៥ ឧសភា ដូច្នេះ៖«អរគុណដល់ចំពោះអ្នកគោរពអនុវត្តច្បាប់ចរាចរណ៍ផ្លូវគោកយ៉ាងខ្ជាប់ខ្ជួន និងអរគុណដល់សមត្ថកិច្ចដែលបានអនុវត្តភារកិច្ចរបស់ខ្លួនបានយ៉ាងល្អប្រសើរ»។

សម្ដេច ស ខេង បានអះអាងថា ការអនុវត្តវិធានការរឹតបន្តឹងច្បាប់ចរាចរណ៍ពេលនេះ មិនមែនជាការដាក់បន្ទុកលើពលរដ្ឋ ដែលកំពុងរងគ្រោះដោយសារជំងឺកូវីដ១៩ទេ ប៉ុន្តែវាជាការការពារសុវត្ថិភាព និងសណ្ដាប់ធ្នាប់ពលរដ្ឋប៉ុណ្ណោះ។

អត្ថបទទាក់ទង

រយៈពេល១១ថ្ងៃ សមត្ថកិច្ចពិន័យយានយន្តល្មើសជាង១៩,០០០ករណី