ពលរដ្ឋកូវ៉ែត និងកាតាដែលអត់ពាក់ម៉ាស់ ប្រឈមមុខជាប់គុកនិងបង់លុយរាប់ម៉ឺនដុល្លារ

COVID-19

អន្តរជាតិ

ពលរដ្ឋកូវ៉ែត និងកាតាដែលអត់ពាក់ម៉ាស់ ប្រឈមមុខជាប់គុកនិងបង់លុយរាប់ម៉ឺនដុល្លារ

18, May 2020 , 10:39 pm

រូបភាព

ដោយ:

ប្រទេសកូវ៉ែត និងកាតា បានប្រកាសនៅថ្ងៃទី១៧ ខែឧសភាថា អាជ្ញាធរនឹងចាប់ផ្ដើមដាក់ទោសពលរដ្ឋទាំងឡាយណាដែលមិនព្រមអនុវត្តតាមការណែនាំរដ្ឋាភិបាលឲ្យពាក់ម៉ាស់ការពារ ដែលជាផ្នែកមួយនៃកិច្ចប្រឹងប្រែងទប់ស្កាត់COVID-19។ ទោសទណ្ឌ គឺមានទាំងជាប់គុកពីរាប់ខែដល់ឆ្នាំ និងបង់ប្រាក់ពិន័យរាប់ម៉ឺនដុល្លារ។

ក្រសួងសុខាភិបាលកូវ៉ែត លើកឡើងថា ពលរដ្ឋណាដែលរកឃើញល្មើសបទបញ្ជាពាក់ម៉ាស់នេះ អាចប្រឈមជាប់គុករហូតដល់ ៣ខែ ខណៈទូរទស្សន៍រដ្ឋកាតា បានរាយការណ៍ថា ទោសកំហុសធ្ងន់បំផុតក្នុងប្រទេសខ្លួន ជនល្មើសអាចជាប់គុករហូតដល់៣ឆ្នាំ។

តាមការចុះផ្សាយរបស់ទីភ្នាក់ងារព័ត៌មាន Reuters ក្នុងប្រទេសកូវ៉ែត ប្រាក់ពិន័យធ្ងន់ធ្ងរបំផុត ស្មើនឹង ១៦ ២០០ដុល្លារ ហើយក្នុងប្រទេសកាតាវិញ ប្រាក់ពិនិយធ្ងន់ធ្ងរបំផុត ស្មើនឹង ៥៥ ០០០ដុល្លារ។

រដ្ឋទាំង៦ក្នុងតំបន់ឈូងសមុទ្រពែរ្ស បានរាយការណ៍ករណីឆ្លងCOVID-19សរុបជាង ១៣៧ ៤០០ករណី ហើយអ្នកស្លាប់មានរហូតដល់ ៦៩៣នាក់។ ករណីឆ្លងក្នុងតំបន់នេះ ដំបូងឡើង ជាប់ពាក់ព័ន្ធនឹងការធ្វើដំណើរ ក៏ប៉ុន្តែក្រោយមក គឺបណ្ដាលឡើងដោយករណីឆ្លងក្នុងចំណោមពលករអន្តោប្រវេសន៍ដែលមានប្រាក់ចំណូលទាប។

អារ៉ាប៊ីសាអូឌីត ដែលមានប្រជាជនសរុបប្រមាណ៣០លាននាក់ មានករណីឆ្លងច្រើនបំផុតក្នុងតំបន់ឈូងសមុទ្រពែរ្សនេះ ដែលស្មើនឹង ៥៤ ៧០០ករណី និងស្លាប់ ៣១២នាក់។ ចំណែក កាតាដែលប្រជាជន២,៨លាននាក់ មានករណីឆ្លងខ្ពស់លំដាប់ទី២ ដែលលើស ៣២៦០០ករណី និងស្លាប់១៥នាក់។

ដោយឡែកអេមីរ៉ាតអារ៉ាប់រួម មានករណីស្លាប់ខ្ពស់លំដាប់ទី២ ក្នុងចំណោមរដ្ឋទាំង៦ ដែលស្មើនឹង ២២០នាក់ ហើយករណីឆ្លងមាន២៣ ៣៥០នាក់។ នេះបើយោងលើការតាមដានរបស់ Reuters ៕