COVID-19
អន្តរជាតិ
កាតា រកឃើញ COVID-19 ចំនួន១២ករណីនៅក្នុងពន្ធនាគារ (រូបភាព៖ AFP)
× កាតា នៅថ្ងៃទី១៩ ខែឧសភា បានប្រកាសរកឃើញអ្នកទោសផ្ទុកជំងឺរលាកសួតដែលបង្កដោយកូរ៉ូណាវីរុស(COVID-19) ចំនួន ១២នាក់ នៅក្នុងពន្ធនាគារមួយកន្លែង។ បញ្ហានេះ ធ្វើឲ្យអង្គការឃ្លាំមើលសិទ្ធិមនុស្ស (HRW) ព្រមានថា អ្នកទោសផ្សេងទៀតកំពុងប្រឈមនឹងការឆ្លងCOVID-19 ខណៈពេលកាតាគ្មានវិធានការរក្សាអនាម័យឲ្យបានត្រឹមត្រូវសម្រាប់អ្នកទោសឡើយ។
តាមសេចក្តីរាយការណ៍របស់ការិយាល័យទំនាក់ទំនងរបស់កាតា អ្នកទោសចំនួន ១២នាក់ ត្រូវបានគេរកឃើញថាមានផ្ទុកកូរ៉ូណាវីរុស ហើយត្រូវបានគេបញ្ជូនភ្លាមៗទៅមជ្ឈមណ្ឌលថែទាំសុខភាពពិសេស។ អ្នកទោសទាំង១២នាក់នេះ ត្រូវបានគេព្យាបាលយ៉ាងយកចិត្តទុកដាក់បំផុត។ ក្នុងចំណោមនេះ អ្នកជំងឺចំនួន២នាក់ បានចេញរោគសញ្ញាផ្លូវដង្ហើមស្រួចស្រាល់ និងត្រូវបានគេដាក់នៅបន្ទប់ដាច់ដោយឡែក ក្រោមការព្យាបាលយ៉ាងពិសេស។
ទន្ទឹមនឹងករណីរកឃើញCOVID-19 នៅក្នុងគុកបែបនេះ អង្គការឃ្លាំមើលសិទ្ធិមនុស្ស បានព្រមានកាតាថា អ្នកទោសផ្សេងទៀត អាចប្រឈមនឹងករណីឆ្លងកូរ៉ូណាវីរុស។ ក្នុងសេចក្តីថ្លែងការណ៍របស់ខ្លួន អង្គការឃ្លាំមើលសិទ្ធិមនុស្ស បានលើកឡើងថា គុកធំនៅក្នុងទីក្រុងដូហា គឺមិនមានវិធានរក្សាអនាម័យឲ្យបានត្រឹមត្រូវឡើយ ហើយអាជ្ញាធរថែមទាំងរឹតត្បិត មិនឲ្យអ្នកទោសទទួលបានការថែទាំសុខភាពជាមូលដ្ឋានទៀត។ សេចក្តីថ្លែងការនេះ គឺធ្វើឡើងដោយផ្នែកទៅតាមការអះអាងរបស់អ្នកទោសចំនួន ៦នាក់ ដែលកំពុងជាប់ឃុំនៅគុកធំក្នុងទីក្រុងដូហា។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ជាការឆ្លើយតប រដ្ឋាភិបាលកាតា បានច្រានចោលការលើកឡើងរបស់អង្គការឃ្លាំមើលសិទ្ធិមនុស្ស ដោយអះអាងថា ជារបាយការណ៍ ដែលផ្អែកលើកិច្ចសម្ភាសពីមនុស្សមួយក្រុមតូច ដែលមិនបានបញ្ជាក់ពីប្រភពឲ្យបានត្រឹមត្រូវ។
គិតត្រឹមពេលនេះ កាតាមានករណីCOVID-19 សរុបចំនួន ៣៣៩៦៩ករណី អ្នកស្លាប់ចំនួន ១៥នាក់ និងអ្នកជាសះស្បើយមានចំនួន ៤៨៩៩នាក់។ ដើម្បីទប់ស្កាត់ការរីកសាយភាយនៃកូរ៉ូណាវីរុស នៅក្នុងប្រទេស កាតាបានចេញបទបញ្ជាមួយឲ្យប្រជាពលរដ្ឋខ្លួនពាក់ម៉ាស់។ បើមិនព្រមអនុវត្តតាមការណែនាំរដ្ឋាភិបាលកាតា អ្នកល្មើសបទបញ្ជានេះ អាចនឹងជាប់គុករហូតដល់៣ឆ្នាំ និងពិន័យជាប្រាក់រហូតដល់៥៥០០០ដុល្លារ៕
© រក្សាសិទ្ធិដោយ thmeythmey.com