ជាតិ
បទសម្ភាសន៍
លោក ឈត ប៊ុនថង៖ ការប្រឹងចេញពីគន្លងជីវភាពលំបាករបស់ឪពុកម្តាយ មិនមែនជាការរើសអើងឡើយ
× ភ្នំពេញ៖ មួយរយៈពេលចុងក្រោយនេះ អ្នកប្រើប្រាស់បណ្តាញសង្គមជជែកគ្នាយ៉ាងផុសផុលជុំវិញប្រធានរឿងអ្នកស្រែ និងអ្នកក្រុង។ លោកបណ្ឌិត ឈត ប៊ុនថង មើលឃើញថា ប្រសិនបើមានការរើសអើងគ្នា រវាងអ្នកស្រែ និងអ្នកក្រុង នោះនឹងធ្វើឲ្យសង្គមងាយបែកបាក់។ ទោះបីជាយ៉ាងណាក៏ដោយ សាស្ត្រាចារ្យជំនាញទស្សនវិជ្ជារូបនេះ បានឡើងឡើងថា វាមិនមែនជាការរើសអើងនោះឡើយ នៅពេលដែលឪពុកម្តាយដាស់តឿនកូនឲ្យខំរៀនដើម្បីរួចផុតពីជីវភាពបែបអ្នកស្រុកស្រែចម្ការ។
បច្ចុប្បន្ន កម្ពុជាមិនមានទម្រង់នៃការរើសអើងគ្នារវាងអ្នកទីក្រុង និងស្រុកស្រែចម្ការធំដុំនោះទេ។ នេះជាការអះអាងរបស់លោក ឈត ប៊ុនថង សាស្ត្រាចារ្យជំនាញទស្សនវិជ្ជា។ លោក ពន្យល់ប្រាប់សារព័ត៌មានថ្មីៗដូច្នេះ៖ «បច្ចុប្បន្ន ខ្ញុំមើលឃើញថា ប្រជាពលរដ្ឋកម្ពុជាយើងដូចជាមិនមានការរើសរវាងអ្នកទីក្រុង និងអ្នកជនបទទេ។ អ្វីដែលយើងបានឃើញនៅក្នុងបណ្តាញសង្គមហ្វេសប៊ុក វាគ្រាន់ជាករណីដោយឡែកមួយពីរ និងមានលើកឡើងជាយោបល់ខុសៗគ្នាប៉ុណ្ណឹងទេ»។
ដើម្បីជ្រាបច្បាស់ សូមអញ្ជើញស្តាប់កិច្ចសម្ភាស រវាងលោក រ៉ឹម ភារី នៃសារព័ត៌មានថ្មីៗ និងលោកឈត ប៊ុនថង សាស្ត្រាចារ្យជំនាញទស្សនវិជ្ជាដូចតទៅ៖
សាស្ត្រាចារ្យ ឈត ប៊ុនថង បន្តថា កន្លងមក ឪពុកម្តាយខ្មែរជាទូទៅ ច្រើនតែដាស់តឿនឲ្យកូនខំរៀន ដើម្បីរួចផុតពីជីវភាពបែបអ្នកស្រុកស្រែចម្ការ ដ្បិតជីវភាពអ្នកស្រែ ដែលកាលមុនធ្វើស្រែតាមបែបបុរាណនោះ មានការលំបាក នឿយហត់ និងស្ថិតនៅហាលខ្យល់ហាលភ្លៀង។ ហេតុនេះ ទើបយុវជនសម័យបច្ចុប្បន្ន នៅពេលពួកគេជោគជ័យលើការសិក្សា ឬការងារ ហើយត្រូវសារព័ត៌មានសម្ភាសនោះ ពួកគេតែងតែលើកឡើងនូវបណ្តាំឪពុកម្តាយរបស់ខ្លួន ដែលឲ្យខ្លួនខំរៀន ដើម្បីចៀសផុសពីជីវិតដូចគាត់។ យ៉ាងណា ការលើកឡើងនេះ មិនមែនជាការរើសអើងនោះទេ។
ដ្បិតតែបច្ចុប្បន្នពុំមានការរើសអើងធំដុំរវាងអ្នកក្រុង និងអ្នកស្រែមែន តែសាស្ត្រាចារ្យ ឈត ប៊ុនថង ស្នើឲ្យមហាជន ឬអ្នកលេងបណ្តាញសង្គម មុនសរសេរ និយាយ ឬសម្តែងមតិអ្វីមួយ សូមប្រយ័ត្នប្រយែង ដើម្បីកុំឲ្យប៉ះពាល់ដល់សិទ្ធិអ្នកដទៃ ឬបង្កការរើសគ្នាក្នុងសង្គម ព្រោះបើសិនមានការរើសអើងរវាងអ្នកក្រុង និងអ្នកស្រែ នោះសង្គមនឹងបាត់បង់សាមគ្គីភាព និងងាយបែកបាក់គ្នា។
លោកពន្យល់យ៉ាងដូច្នេះថា៖ «វាមានប្រវត្តិក្នុងអតីតកាល។ ក្នុងសង្គមខ្មែរ យើងឃើញក្នុងអក្សរសិល្ប៍ខ្មែរក៏មានសរសេរ ក្នុងជីវភាពសង្គមសម័យអតីតកាលក៏លើកឡើងដែរ ជាពិសេសស្នាដៃក្រមង៉ុយបានលើកឡើងថា កុំឲ្យដៀលអ្នកស្រែ។ កាលណាគាត់លើកឡើងបែបហ្នឹង មានន័យថា សម័យនោះមានអ្នកក្រុងខ្លះអាចដៀលអ្នកស្រែមែន។ នៅក្នុងសម័យសាធារណរដ្ឋខ្មែរ តិចឬច្រើន គឺមានការប្រៀបធៀបគ្នារវាអ្នកក្រុង និងអ្នកស្រែ។ ការឃ្លាតឆ្ងាយរវាងអ្នកក្រុង និងអ្នកស្រែ បានធ្វើឲ្យមានការមិនយល់គ្នា មិនសូវឲ្យតម្លៃគ្នា មិនសូវស្និទ្ធស្នាលគ្នា រហូតដល់មានលើកឡើងថា អ្នកស្រែ ត្រូវបានកៀបសង្កត់ពីអ្នកទីក្រុង ហើយវាជាមូលហេតុមួយក្នុងចំណោមមូលហេតុជាច្រើន ដែលរបបខ្មែរក្រហម គាត់អូសទាញឲ្យអ្នកជនបទធ្វើការតស៊ូ ហើយពេលទទួលបានជ័យជំនះ របបប៉ុលពត ក៏ធ្វើការសងសឹងអ្នកក្រុង អ្នកធ្វើការ ឬអ្នកចេះដឹងជាដើម»៕
Tag:
ឈត ប៊ុនថង
អ្នកស្រែ
អ្នកក្រុង
© រក្សាសិទ្ធិដោយ thmeythmey.com