អន្តរជាតិ
អាមេរិក ពិចារណាធ្វើតេស្តអាវុធនុយក្លេអ៊ែរលើកដំបូង ចាប់តាំងពីឆ្នាំ១៩៩២ លោកប្រធានាធិបតី ដូណាល់ ត្រាំ (AFP)
× រដ្ឋបាលលោកប្រធានាធិបតី ដូណាល់ ត្រាំ បានពិភាក្សាផែនការរៀបចំការធ្វើតេស្តសាកល្បងអាវុធនុយក្លេអ៊ែរលើកដំបូង ចាប់តាំងពីឆ្នាំ១៩៩២ ដែលអាចជាការព្រមានដល់រុស្ស៊ីនិងចិន។ កាសែតអាមេរិក Washington Post បានចុះផ្សាយបែបនេះនៅថ្ងៃទី២២ ខែឧសភា។
ការធ្វើតេស្តអាវុធនុយក្លេអ៊ែរបែបនេះ នឹងក្លាយជាការអនុវត្តផ្ទុយពីគោលនយោបាយការពារជាតិអាមេរិក និងបង្កហានិភ័យសម្រាប់ប្រជាជាតិដែលមានអាវុធមហាប្រល័យលោកនេះដទៃទៀត។ ត្រង់ចំណុចនេះ អ្នកវិភាគម្នាក់បានប្រាប់កាសែតអាមេរិកខាងលើនេះថា ប្រសិនបើផែនការនេះត្រូវផ្ដល់ភ្លើងបៃតងមែននោហ វានឹងត្រូវមើលឃើញជាការចាប់ផ្ដើមការប្រណាំងប្រជែងអាយុនុយក្លេអ៊ែរ ដែលពុំធ្លាប់កើតមានពីមុនមក។
របាយការណ៍ដែលកាសែត Washington Post ដែលបានដកស្រង់សម្តីមន្ត្រីរដ្ឋបាលអាមេរិកជាន់ខ្ពស់ម្នាក់ និងអតីតមន្ត្រី២នាក់ ហើយពួកគេសុទ្ធតែនិយាយដោយអនាមិក បញ្ជាក់ថា ការពិភាក្សានេះ បានធ្វើឡើងនៅកិច្ចប្រជុំមួយកាលពីថ្ងៃទី១៥ ខែឧសភា។
របាយការណ៍ស្តីពីផែនការរបស់រដ្ឋបាលលោកត្រាំនេះ កើតឡើងក្រោយមន្ត្រីអាមេរិកខ្លះ ត្រូវបានរាយការណ៍ ពួកគេអះអាងថា រុស្ស៊ីនិងចិនបានធ្វើតេស្តសាកល្បងអាវុធនុយក្លេអ៊ែរធុនតូច (low-yield)។ ក្រោយមក រដ្ឋាភិបាលក្រុងមូស្គូ និងប៉េកាំង បានច្រានចោលការអះអាង ដោយនិយាយថា សហរដ្ឋអាមេរិកគ្មានភ័ស្តុតាងណាមួយបញ្ជាក់ឡើយ។
សូមបញ្ជាក់ថា របាយការណ៍របស់កាសែត Washington Post នេះដែរ បានចុះផ្សាយមួយថ្ងៃប៉ុណ្ណោះក្រោយលោក ដូណាល់ ត្រាម បានប្រកាសថា លោកមានផែនការដកហូតចេញពីសន្ធិសញ្ញាចំហមេឃជាមួយរុស្ស៊ី ដែលបង្កើតឡើងក្នុងគោលដៅពង្រឹងតម្លាភាពយោធា និងទំនុកចិត្តរវាងមហាអំណាចទាំងពីរ។ លោកត្រាំ ចោទរុស្ស៊ីថា មិនគោរពសន្ធិសញ្ញានេះ។
កាលពីដើមខែឧសភានេះ លោកប្រធានាធិបតី ត្រាំ បានទទូចឲ្យមានការចូលរួមរបស់ចិនក្នុងកិច្ចពិភាក្សាគ្រប់គ្រងអាវុធថ្មីជាមួយរុស្ស៊ី ដោយប្រាប់សមភាគីរុស្ស៊ី លោក វ្ល៉ាឌីមៀ ពូទីន ថាពួកគេត្រូវបញ្ចៀសការប្រណាំងប្រជែងអាវុធ ដែលខាតបង់លុយច្រើន។ នេះពុំមែនជាលើកទី១ដែលគោលនយោបាយការពារជាតិរបស់លោក បានបង្កើនកង្វល់ពាក់ព័ន្ធថា រដ្ឋបាលលោកកំពុងដំឡើងហានិភ័យនៃសង្គ្រាមអាវុធនុយក្លេអ៊ែរ៕
Tag:
សហរដ្ឋអាមេរិក
នុយក្លេអ៊ែរ
© រក្សាសិទ្ធិដោយ thmeythmey.com