COVID-19
អន្តរជាតិ
ថៃ គ្រោងបើករោងកុន កន្លែងម៉ាស្សា និងកីឡដ្ឋានប្រដាល់ឡើងវិញនាខែមិថុនា
× កីឡដ្ឋានប្រដាល់ រោងកុន កន្លែងម៉ាស្សានិងស្ប៉ា និងមជ្ឈមណ្ឌលសម្រាប់ធ្វើជាសាលប្រជុំ ស្ថិតក្នុងចំណោមអាជីវកម្មដែលមានហានិភ័យមធ្យម ដែលរំពឹងអនុញ្ញាតឲ្យបើកដំណើរការឡើងវិញក្នុងការបន្ធូរបន្ថយបញ្ជាបិទប្រទេសដំណាក់កាលទី៣ នាខែមិថុនា។ យ៉ាងណាមិញ តៀមស្រា បារ និងកន្លែងកម្សាន្តពេលរាត្រី នឹងបន្តបិទទ្វារដដែល។
អគ្គនាយករងនៃនាយកដ្ឋានគ្រប់គ្រងជំងឺថៃ លោក Tanarak Plipat នៅថ្ងៃទី២៤ ខែឧសភា បានបញ្ជាក់ថា សកម្មភាពនិងអាជីវកម្មដែលមានហានិភ័យនៃចម្លងCOVID-19មធ្យម ឬស្ថិតក្នុងកម្រិត «លឿង» រំពឹងអនុញ្ញាតឲ្យបើកដំណើរឡើងវិញក្នុងដំណាក់កាលក្រោយទៀតនៃបន្ធូរបន្ថយបញ្ជាបិទប្រទេស។ នេះបើតាមការចុះផ្សាយកាសែតថៃ បាងកកប៉ុស្តិ៍។
«មជ្ឈមណ្ឌលគ្រប់គ្រងស្ថានភាព COVID-19 (CCSA) រំពឹងនឹងប្រកាសបញ្ចីរាយឈ្មោះ (អាជីវកម្មនិងសកម្មភាព) ដែលអាចចេញនាព្រឹកថ្ងៃពុធ ឬថ្ងៃព្រហស្បតិ៍សប្ដាហ៍នេះ»។ លោក Tanarak លើកឡើងបែបនេះ។ យ៉ាងណាមិញ យោងតាមប្រភពដែលបញ្ជាក់ប្រាប់កាសែតបាងកកប៉ុស្តិ៍ អាជីវកម្មនិងសកម្មភាពទាំងនោះ គឺមានដូចជា រោងកុន កន្លែងច្រៀងការ៉ាអូខេ កន្លែងហែលទឹក សួនសត្វ ហាងម៉ាស្សា ស្ប៉ារ សាលប្រជុំ កន្លែងហាត់ប្រាណ និងកីឡដ្ឋានប្រដាល់ ជាដើម។
ម្យ៉ាងទៀត អគ្គលេខាធិការក្រុមប្រឹក្សាសន្តិសុខជាតិថៃ លោក Somsak Roongsita ដែលដឹកនាំគណៈកម្មាធិការទទួលបន្ទុកកិច្ចការបន្ធូរបន្ថយបញ្ជាបិទប្រទេស គូសបញ្ជាក់ថា គណៈកម្មាធិការលោក នឹងយកព័ត៌មានពីក្រសួងសុខភាពសាធារណៈ ម្ចាស់អាជីវកម្ម និងពលរដ្ឋរងគ្រោះផ្នែកសេដ្ឋកិច្ចដោយជំងឺ COVID-19 មកពិចារណាល្អិតល្អន់។ ត្រង់ចំណុចនេះ លោកសង្កត់ធ្ងន់ថា គណៈកម្មាធិការលោក នឹងព្យាយាមធ្វើឲ្យមានតុល្យភាពរវាងសុវត្ថិភាពនិងសុខភាពសម្រាប់សាធារណៈ និងរក្សាអាជីវកម្មដំណើរការ។
លោក Somsak លើកឡើងទៀតថា លទ្ធផលនៃកិច្ចប្រជុំ នឹងត្រូវដាក់បញ្ជូនទៅកិច្ចប្រជុំរបស់មជ្ឈមណ្ឌលគ្រប់គ្រងស្ថានភាព COVID-19 (CCSA) នៅថ្ងៃទី២៩ ខែឧសភាខាងមុខ ដើម្បីពិចារណាលើការបន្ធូរបន្ថយបញ្ជាបិទប្រទេសដំណាក់កាលទី៣ ដែលនឹងចូលជាធរមាននាថ្ងៃទី១ ខែមិថុនា។
សូមបញ្ជាក់ថា អាជ្ញាធរសុខាភិបាលថៃ នៅថ្ងៃទី២៤ ខែឧសភា គ្មានរកឃើញករណីឆ្លង COVID-19 ថ្មី ហើយក៏គ្មានករណីស្លាប់ផងដែរ ដែលរក្សាតួលេខឆ្លងសរុប ៣០៤០ករណី និងអ្នកស្លាប់ ៥៦នាក់ ចាប់តាំងពីការរាលដាលបានកើតឡើងក្នុងខែមករាមក។ អ្នកជំងឺសរុប ២៩២១នាក់ បានជាសះស្បើយ ខណៈមនុស្ស៦៣នាក់កំពុងសម្រាកក្នុងមន្ទីរពេទ្យ៕
© រក្សាសិទ្ធិដោយ thmeythmey.com