លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានចេញសេចក្តីណែនាំមួយ នៅថ្ងៃទី២៦ ខែឧសភា ឆ្នាំ២០២០ ជូនទៅគ្រប់ក្រុមហ៊ុនអាកាសចរណ៍ ស្តីពីការអនុវត្តវិធានការទប់ស្កាត់ជំងឺកូវីដ១៩ ក្នុងការដឹកអ្នកដំណើរតាមផ្លូវអាកាស។
លោក ម៉ៅ ហាវណ្ណាល់ ប្រាប់ទៅក្រុមអាកាសចរណ៍ថា ចំណុចទីមួយ រាល់អ្នកដំណើរតាមផ្លូវអាកាសទាំងជនជាតិខ្មែរនិងជនជាតិបរទេស ត្រូវបង្ហាញឯកសារពីរសំខាន់ៗ ដល់មន្ត្រីបម្រើសេវាកម្មចុះឈោះឡើងជិះយន្តហោះ (Check-in) គឺវិញ្ញាបនបត្រសុខភាព ដែលបញ្ជាក់គ្មានជំងឺកូវីដ១៩ និង ឯកសារធានារ៉ាប់រងសុខភាព ដែលមានទឹកប្រាក់យ៉ាងតិច៥ម៉ឺនដុល្លារ (សម្រាប់តែជនបរទេស)។
លោករដ្ឋមន្ត្រី បន្តថា ចំណុចទីពីរ រាល់វិញ្ញាបនបត្របញ្ជាក់សុខភាព និងឯកសារធានារ៉ាប់រងសុខភាព ត្រូវតែចេញដោយមន្ទីរពេទ្យ វិទ្យាស្ថានសុខាភិបាល ស្ថាប័ន ភ្នាក់ងារ ឬ ក្រុមហ៊ុន ដែលអាចជឿទុកចិត្តបាន និងអាចទាក់ទងបានគ្រប់ពេលវេលា។
តាមរយៈសេចក្តីណែនាំរបស់ខ្លួន លោក សង្កត់ធ្ងន់ដូច្នេះថា៖«ក្រុមហ៊ុនអាកាសចរណ៍ ពុំអាចដឹកអ្នកដំណើរតាមផ្លូវអាកាស មកកាន់ប្រទេសកម្ពុជាជាដាច់ខាត ប្រសិនបើចំណុចទីមួយនិងទីពីរ ពុំបានបំពេញ»។
ពេលចុះទៅពិនិត្យមើលសុខភាពរបស់អ្នកដំណើរ ដែលមកដល់កម្ពុជា តាមជើងហោះហើរ កាលពីយប់ថ្ងៃទី២៤ ឈានចូលថ្ងៃទី២៥ ខែឧសភា ឆ្នាំ២០២០ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើងពីវិធានការបន្ថែមថា អ្នកដំណើរទាំងអស់ ដែលមកដល់កម្ពុជា ត្រូវនៅដាច់ដោយឡែករយៈពេល១៤ថ្ងៃសិន (ចត្តាឡីស័ក) ទោះធ្វើតេស្តរកមិនឃើញជំងឺកូវីដ១៩ក៏ដោយ។
លោក ជា អូន អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល ប្រាប់សារព័ត៌មានថ្មីៗតាមទូរស័ព្ទ នៅព្រឹកថ្ងៃទី២៦ ខែឧសភាថា មកដល់ពេលនេះ ជើងហោះហើរកម្ពុជា នៅតែខ្សត់ភ្ញៀវដដែល។ លោក បញ្ជាក់ថា៖«នៅដដែលទេ អត់មាន [ភ្ញៀវទេ] តិចតួចណាស់»។
យ៉ាងណា អ្នកនាំពាក្យរូបនេះ អះអាងថា ភ្ញៀវ ដែលធ្វើដំណើរតាមជើងហោះហើរ ចូលមកកម្ពុជា មានការកើនឡើងគ្រាន់បើជាមុនបន្តិច។ លោក បន្តថា ថ្ងៃខ្លះ មានអ្នកដំណើរតាមជើងហោះហើរ២០នាក់ ហើយថ្ងៃខ្លះ ក៏កើនឡើងដល់៤០នាក់។
កាលពីថ្ងៃទី២០ ខែឧសភា ឆ្នាំ២០២០ លោក ម៉ម ប៊ុនហេង បានចេញសេចក្តីប្រកាសព័ត៌មាន ស្តីពីការអនុញ្ញាតឲ្យភ្ញៀវមកពីប្រទេសទាំង៦ គឺ អាមេរិក អេស្ប៉ាញ អ៊ីតាលី បារាំង អាល្លឺម៉ង់ និង អ៊ីរ៉ង់ ចូលមកកម្ពុជាវិញ។
ក្រៅពីតម្រូវឲ្យអ្នកដំណើរទាំងជនជាតិខ្មែរទាំងជនជាតិបរទេស ត្រូវមានវិញ្ញាបនបត្របញ្ជាក់សុខភាព និង តម្រូវឲ្យជនជាតិបរទេស ត្រូវមានឯកសារធានារ៉ាប់រងសុខភាព រដ្ឋមន្ត្រីសុខាភិបាល នៅទាមទារឲ្យអ្នកដំណើរទាំងអស់ ត្រូវធ្វើតេស្តរកជំងឺកូវីដ១៩ ពេលមកដល់កម្ពុជា ហើយទោះបីជាលទ្ធផលអវិជ្ជមាន ក៏ពួកគេ ត្រូវធ្វើចត្តាឡីស័ក១៤ថ្ងៃដែរ៕