ភ្នំពេញ៖ កម្ពុជាចំណាយប្រមាណ១ពាន់លានដុល្លារក្នុងមួយឆ្នាំៗ លើការនាំចូលបន្លែ ត្រី សាច់ ពីក្រៅប្រទេស។ សម្រាប់ឆ្នាំ២០២០នេះ កម្ពុជាមានតម្រូវការបន្លែ សាច់ ជាង២១៩ម៉ឺនតោន ក្នុងនោះមានការនាំចូលបន្លែ សាច់ ជិត៤០ម៉ឺនតោន ដើម្បីបំពេញតម្រូវការក្នុងស្រុក។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្ម បានថ្លែងសារព័ត៌មានថ្មីៗតាមទូរស័ព្ទនៅថ្ងៃទី២៦ឧសភានេះថា កម្ពុជាបានចំណាយថវិកា៣០០ទៅ៤០០លានដុល្លារ ក្នុងការនាំចូលសាច់សត្វក្នុងមួយឆ្នាំ។ លោក ផាន់ណារ៉ា សង្កត់ធ្ងន់ថា មុនពេលរឹតបន្តឹងនោះ កម្ពុជានាំចូលជ្រូកជាង២ម៉ឺនក្បាលក្នុងមួយថ្ងៃ ។ ប៉ុន្តែក្រោយរឹតបន្តឹងមក កម្ពុជានាំចូលជ្រូកប្រមាណ៦ពាន់ក្បាលប៉ុណ្ណោះក្នុងមួយថ្ងៃ។ សព្វថ្ងៃ កម្ពុជាមានតម្រូវការជ្រូកប្រមាណ៤ពាន់ក្បាលក្នុងមួយថ្ងៃ។
ក្រៅពីជ្រូក កម្ពុជា ក៏មានតម្រូវការនាំចូលបន្លែ ត្រី សាច់ ពីក្រៅប្រទេសផងដែរ។ កម្ពុជាបានចំណាយថវិកាជាង១០០០លានដុល្លារ ចំពោះការនាំចូលផលិតផលកសិកម្មទាំងនេះ។ នេះបើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា ប្រាប់សារព័ត៌មានថ្មីៗ ។
លោក ស្រ៊ុន ពៅ ថ្លែងដូច្នេះថា៖ «ការនាំចូលម្ហូបអាហារ មិនក្រោម១ពាន់លានដុល្លារទេ ក្នុងនោះ ត្រី សាច់ បន្លែ ពងមាន់ ពង់ទាដើម បើការនាំចូលជ្រូកតែមួយមុខ គឺមានជាង៤០០លានដុល្លារ»។
បើតាមរបាយការណ៍ក្រសួងកសិកម្ម នៅឆ្នាំ២០២០នេះ កម្ពុជាមានតម្រូវការបន្លែជាង១០៤ម៉ឺនតោន ក្នុងនោះកម្ពុជាអាចមានលទ្ធភាពផ្គត់ផ្គង់បន្លែបានជាង៧១ម៉ឺនតោន ស្មើនឹង៦៨ភាគរយ។ ក្នុងនោះកម្ពុជាត្រូវការនាំចូលបន្លែពីក្រៅប្រទេសជាង៣២ម៉ឺនតោន ស្មើនឹង៣២ភាគរយ។
ចំណែកតម្រូវការសាច់វិញ កម្ពុជាត្រូវការប្រមាណ២៩០ពាន់តោន ក្នុងនោះមានសាច់គោ ក្របី ជ្រូក មាន់ជាដើម។ កម្ពុជាមានលទ្ធភាពផលិតកម្មសត្វប្រមាណ២៣៩ពាន់តោន ស្មើនឹង៨២ភាគរយ ហើយត្រូវការនាំចូលប្រមាណ១៨ភាគរយបន្ថែមទៀត។ នេះបើតាមក្រសួងកសិកម្ម។
តំណាងអ្នកចិញ្ចឹមជ្រូកនៅក្រុមហ៊ុនម៉ុង រិទ្ធី លោក លី ឡាវីល បានលើកឡើងថា រដ្ឋាភិបាលគួរចេញវិធានការបញ្ឈប់ការនាំចូលផលិតផលកសិកម្ម ដែលកម្ពុជាបានខាតបង់ប្រមាណ១ពាន់លានដុល្លារ លើការនាំចូលបន្លែ ត្រី សាច់ជាដើម។ ជាក់ស្ដែងដូចការនាំចូលជ្រូក ដែលខាតបង់ប្រមាណ៤០០លានដុល្លារ។ លោក លី ឡាវីល បានសង្កត់ធ្ងន់ថា កម្ពុជាអាចបិទការនាំចូលបាន ដោយអាស្រ័យលើក្រសួងកសិកម្មប៉ុណ្ណោះ ព្រោះពលរដ្ឋកម្ពុជាអាចមានលទ្ធច្រើន ក្នុងការចិញ្ចឹមជ្រូកដោយមិនពិបាកផ្គត់ផ្គង់ឡើយ។
ពាក់ព័ន្ធការនាំចូលជ្រូកនេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានបញ្ជាក់ថា កម្ពុជាមិនទាន់អាចបញ្ឈប់ការនាំចូលជ្រូកពីក្រៅប្រទេសភ្លាមៗឡើយ ព្រោះស្ថានភាពចិញ្ចឹមជ្រូករបស់ពលរដ្ឋកាលពីមុនធ្លាក់ចុះខ្លាំង ហើយទើបតែមានលទ្ធភាពចិញ្ចឹមច្រើនឡើងវិញ ក្រោយរដ្ឋាភិបាល ចាប់ផ្ដើមរឹតបន្តឹងការនាំចូលនេះ។
រយៈពេល ២ទៅ៣ឆ្នាំខាងមុខទៀត ប្រសិនបើគ្មានជំងឺរាតត្បាតលើការចិញ្ចឹមជ្រូក កម្ពុជានឹងលែងពឹងផ្អែកលើការនាំចូលហើយ។ ជាក់ស្ដែងខេត្តព្រះសីហនុ បានបិទការនាំចូលជ្រូក ដើម្បីឲ្យអ្នកចិញ្ចឹមជ្រូកនៅទីនោះ មានលទ្ធផ្គត់ផ្គង់ក្នុងខេត្តបាន។ នេះបើតាមការលើកឡើងរបស់លោក តាន់ ផាន់ណារ៉ា ក្នុងសន្និសីទសារព័ត៌មាន ស្ដីពីការរឹតបន្តឹងជ្រូក កាលពីថ្ងៃទី២១ ឧសភា ឆ្នាំ២០២០។
សូមបញ្ជាក់ថា បច្ចុប្បន្នកម្ពុជាមិនមានការនាំចូលជ្រូកពីវៀតណាមឡើយ ពោលគឺនាំចូលតែពីប្រទេសថៃប៉ុណ្ណោះ ដោយសារជ្រូកនៅប្រទេសវៀតណាមតម្លៃខ្ពស់ជាងនៅកម្ពុជា។ សម្រាប់វិធានការរឹតបន្តឹងការនាំចូលជ្រូក បន្លែ ផ្លែឈើ គឺចាប់ផ្ដើមអនុវត្ត កាលពីថ្ងៃទី១៧ កុម្ភៈ ឆ្នាំ២០២០។ នេះបើតាមលោក ស្រ៊ុន ពៅ៕