ថៃ អនុម័តកញ្ចប់ថវិកាជិត ៦០ពាន់លានដុល្លារដើម្បីស្តារសេដ្ឋកិច្ចពី COVID-19

COVID-19

អន្តរជាតិ

ថៃ អនុម័តកញ្ចប់ថវិកាជិត ៦០ពាន់លានដុល្លារដើម្បីស្តារសេដ្ឋកិច្ចពី COVID-19

01, Jun 2020 , 10:04 am

រូបភាព

រូបភាព៖ AFP

ដោយ: ធៀន ភារិន្ទ

សភាថៃ នាថ្ងៃទី៣១ ខែឧសភា បានអនុម័តកញ្ចប់ថវិកាដ៏ច្រើនសម្បើម ដើម្បីគាំទ្រសេដ្ឋកិច្ច ដែលរងគ្រោះដោយសារតែជំងឺរលាកសួត ដែលបង្កដោយកូរ៉ូណាវីរុស។ កញ្ចប់ថវិកា ដែលអមដោយអនុក្រឹត្យចំនួនបីនេះ មានចំនួនទឹកប្រាក់ជិត ៦០ពាន់លានដុល្លារ។

ជាប្រទេសមានទំហំសេដ្ឋកិច្ចលំដាប់ទីពីរនៅក្នុងតំបន់អាស៊ីអាគ្នេយ៍ ថៃត្រូវបានអ្នកជំនាញប៉ាន់ប្រមាណថា នឹងបាត់បង់ទំហំសេដ្ឋកិច្ចប្រមាណ៦ ទៅ៧ភាគរយ នៅក្នុងឆ្នាំ២០២០។

ទាក់ទិនបញ្ហានេះ រដ្ឋសភាថៃ បានសម្រេចអនុម័តថវិកា ៥៩,៧ពាន់លានដុល្លារ ដើម្បីជួយសង្គ្រោះសេដ្ឋកិច្ចជាតិ ដែលរងគ្រោះ ដោយសារតែកូរ៉ូណាវីរុស និងការបិទប្រទេស។ ការអនុម័តនេះ នឹងបើកផ្លូវឲ្យក្រសួងហិរញ្ញវត្ថុថៃ ខ្ចីលុយពីបរទេសដើម្បីមកទ្រទ្រង់កញ្ចប់ថវិកាមួយនេះ។

ក្នុងកញ្ចប់ថវិកាគាំទ្រសេដ្ឋកិច្ចនេះ ថៃនឹងប្រើប្រាស់ថវិកាជាង ៣១ពាន់លានដុល្លារ ដើម្បីគាំទ្រសេដ្ឋកិច្ច និងការស្តារសង្គមឡើងវិញ បន្ទាប់ពីការវាយប្រហាររបស់ COVID-19។ ចំណែកកញ្ចប់ថវិកាជាង ១៥ពាន់លានដុល្លារ នឹងជួយសង្គ្រោះសហគ្រាសខ្នាតតូច និងមធ្យម និងទឹកប្រាក់ប្រមាណ ១២ពាន់លានដុល្លារទៀត នឹងប្រើដើម្បីទ្រទ្រង់ស្ថិរភាពហិរញ្ញវត្ថុរបស់ថៃ។ នេះបើតាមការចុះផ្សាយរបស់កាសែងបាំងកកប៉ុស្តិ៍។

ពាក់ព័ន្ធនឹងការអនុម័តកញ្ចប់ថវិកាដ៏ធំសម្បើមនេះ បក្សប្រឆាំងថៃ បានរិះគន់ថា ខ្វះតម្លាភាពក្នុងការបែកចែកថវិកា។ លោក Pijan Chaopattanapong សមាជិកសភាពមកពីបក្សឈានមុខ និយាយថា កញ្ចប់ថវិការដ៏ច្រើនសម្បើមបែបនេះ នឹងនាំឲ្យមានអំពើពុករលួយ ហើយអាចនឹងផ្តល់ផលប្រយោជន៍ដល់មនុស្សមួយក្រុមតូច ជាជាងប្រជាជនថៃជាច្រើននាក់។

ជាការឆ្លើយតបលោកនាយករដ្ឋមន្ត្រី ប្រាយុទ្ធ ចន្ទអូចា បានទាត់ចោលការរិះគន់ថា កញ្ចប់ថវិកាខ្វះតម្លាភាព។ បើតាមលោកប្រាយុទ្ធ កញ្ចប់ថវិកា ដែលប្រើប្រាស់សម្រាប់ស្តារសេដ្ឋកិច្ចនេះ គឺបើកចំហរឲ្យមានការត្រួតពិនិត្យជាសាធារណៈ ហើយទីភ្នាក់ងារជាច្រើនក៏អាចស៊ើបអង្កេតពីបញ្ហាពុករលួយទាក់ទងនឹងកញ្ចប់ថវិកានេះដែរ។

សូមបញ្ជាក់ថា គិតមកត្រឹមថ្ងៃនេះ ថៃមានករណី COVID-19 សរុបចំនួន ៣០៨១ករណី អ្នកស្លាប់ចំនួន ៥៧នាក់ និងអ្នកជាសះស្បើយ ២៩៦៣នាក់។ ដោយបារម្ភពីរលកឆ្លងទី២ នៃCOVID-19 ថៃបានពន្យារពេលដាក់ប្រទេសក្នុងភាពអាសន្នរហូតដល់ចុងខែមិថុនា។ យ៉ាងណាក៏ដោយ រដ្ឋាភិបាលថៃ ក៏បានបន្ធូរបន្ថយសកម្មភាពមួយចំនួនផងដែរ ដើម្បីជួយសង្គ្រោះសេដ្ឋកិច្ច ក៏ដូចជាប្រជាពលរដ្ឋរបស់ខ្លួន៕